Mata 1 - An Tiomnadh Nuadh anns an Eadar-Theangachadh Ùr Gàidhlig 2017

Sloinntearachd Ìosa

¹ Leabhar sloinntearachd Ìosa Crìosd, mhic Dhaibhidh, mhic Abrahàim:

² Ghin Abrahàm Ìsaac, ghin Ìsaac Iàcob, ghin Iàcob Iùdas agus a bhràithrean,

³ ghin Iùdas Phares agus Sàra o Thamar, ghin Phares Esrom, ghin Esrom Aram,

⁴ ghin Aram Aminadab, ghin Aminadab Naasòn, ghin Naasòn Salmon,

⁵ ghin Salmon Bòas o Rachab, ghin Bòas Obed o Rut, ghin Obed Iese,

⁶ ghin Iese Daibhidh an rìgh. Ghin Daibhidh an rìgh Solamh on bhean a bh' aig Uriah,

⁷ ghin Solamh Rebòam, ghin Rebòam Abia, ghin Abia Asa,

⁸ ghin Asa Iòsaphat, ghin Iòsaphat Iòram, ghin Iòram Òtsiah,

⁹ ghin Òtsiah Iòatam, ghin Iòatam Ahas, ghin Ahas Heseciah,

¹⁰ ghin Heseciah Manaseh, ghin Manaseh Amòs, ghin Amòs Iòsiah,

¹¹ ghin Iòsiah Iechoniah agus a bhràithrean, aig àm an fhògraidh do Bhàbilon.

¹² Às dèidh an fhògraidh do Bhàbilon: ghin Iechoniah Salatiel, ghin Salatiel Sorobabel,

¹³ ghin Sorobabel Abiud, ghin Abiud Eliacim, ghin Eliacim Asòr,

¹⁴ ghin Asòr Sadòc, ghin Sadòc Achim, ghin Achim Eliud,

¹⁵ ghin Eliud Eleàsar, ghin Eleàsar Matan, ghin Matan Iàcob,

¹⁶ ghin Iàcob Iòsaph, an duine aig Moire, on do rugadh Ìosa, ris an canar Crìosd.

¹⁷ Mar sin b' iad na ginealaichean uile o Abrahàm gu Daibhidh ceithir ginealaichean deug, agus o Dhaibhidh gu fògradh Bhàbiloin ceithir ginealaichean deug, agus o fhògradh Bhàbiloin gu Crìosd, ceithir ginealaichean deug.

Ìosa Crìosd ga Bhreith

¹⁸ A‑nis seo mar a bha breith Ìosa Crìosd: nuair a bha a mhàthair Moire air ceangal‑pòsaidh a dhèanamh le Iòsaph, mus tàinig iad còmhla, chaidh a faighinn torrach on Spiorad Naomh.

¹⁹ Ach on a bha Iòsaph, an duine aice, ionraic agus ain‑deònach a maslachadh, chuir e roimhe a cur air falbh gu dìomhair.

²⁰ Ach fhad 's a bha e a' smaoineachadh mu na rudan seo, seallaibh, nochd aingeal an Tighearna ris ann an aisling, ag ràdh, “Iòsaiph, a mhic Dhaibhidh, na biodh eagal ort Moire a ghabhail mar bhean, oir an nì a tha air a ghineamhainn innte, is ann on Spiorad Naomh a tha e.

²¹ Beiridh i mac, agus bheir thu Ìosa mar ainm air, oir sàbhailidh esan a shluagh om peacaidhean.”

²² Thachair seo uile airson 's gun deigheadh an rud a thuirt an Tighearna tron fhàidh a choileanadh, a tha ag ràdh,

²³ “Seallaibh, bidh an òigh torrach agus beiridh i mac, agus gabhaidh iad Emanuel air” (a tha a' ciallachadh, ‘Dia còmhla rinn’).

²⁴ Nuair a dhùisg Iòsaph às a chadal, rinn e mar a dh'iarr aingeal an Tighearna air: ghabh e a bhean thuige,

²⁵ ach cha do chuir e eòlas oirre gus an do rug i mac. Agus thug e Ìosa mar ainm air.