Marcus 12 - An Tiomnadh Nuadh anns an Eadar-Theangachadh Ùr Gàidhlig 2017

Cosamhlachd nan Droch Thuathanach

¹ Agus thòisich Ìosa air bruidhinn riutha ann an cosamhlachdan: “Chuir duine fìon‑lios, agus chuir e balla timcheall air agus chladhaich e amar‑fìona, agus thog e tùr; agus thug e air mhàl do thuathanaich e agus dh'fhàg e an dùthaich.

² Aig an àm cheart chuir e seirbheiseach gu na tuathanaich airson 's gum faigheadh e cuid de thoradh an fhìon‑lios uapa.

³ Ach ghlac iad e agus dhochainn iad e agus chuir iad uapa falamh e.

⁴ A‑rithist chuir e seirbheiseach eile thuca, agus bhuail iad air a' cheann e, agus làimhsich iad gu maslach e.

⁵ Agus chuir e fear eile thuca is mharbh iad esan. Agus mar seo le mòran a bharrachd: bhuail iad cuid dhiubh agus mharbh iad cuid eile.

⁶ “Bha fhathast aon fhear eile aige, mac a bu ghràdhach leis. Mu dheireadh chuir e esan thuca, ag ràdh, ‘Bheir iad urram dham mhac.’

⁷ “Ach thuirt na tuathanaich ud ri càch‑a‑chèile, ‘Is e seo an t‑oighre. Thigibh, marbhamaid e, agus bidh an oighreachd leinn fhèin.’

⁸ Rug iad air, agus mharbh iad e, agus thilg iad a‑mach às an fhìon‑lios e.

⁹ “Dè a nì am fear leis an robh am fìon‑lios? Thig e agus sgriosaidh e na tuathanaich agus bheir e am fìon‑lios do dh'fheadhainn eile.

¹⁰ Nach do leugh sibh an Sgriobtar seo: “‘A' chlach a dhiùlt na clachairean, chaidh ceann an oisein a dhèanamh dhith;

¹¹ chaidh seo a dhèanamh leis an Tighearna, agus is iongantach e nar sùilean‑ne’?”

¹² Agus bha iad a' sireadh cothrom a chur an grèim ach bha eagal an t‑sluaigh orra, oir thuig iad gum b' ann nan aghaidh fhèin a thuirt e a' chosamhlachd. Mar sin dh'fhàg iad e agus chaidh iad air falbh.

A' Pàigheadh Chìsean do Chèasar

¹³ An uair sin chuir iad cuid dhe na Pharasaich is dhe na Heròdianaich thuige airson 's gun glacadh iad na chainnt e.

¹⁴ Thàinig iad agus thuirt iad ris, “Fhir‑Teagaisg, tha fios againn gu bheil thusa fìrinneach agus nach eil dragh ort mu bheachd neach sam bith; oir chan eil thu a' gabhail suim de choltas dhaoine ach a' teagasg slighe Dhè ann am fìrinn. A bheil e laghail cìs a thoirt do Chèasar no nach eil? Am bu chòir dhuinn pàigheadh no nach bu chòir?”

¹⁵ Ach, a' tuigsinn an cuid cealgaireachd, thuirt e riutha, “Carson a tha sibh gam bhuaireadh? Thoiribh thugam bonn airgid agus leigibh leam coimhead air.”

¹⁶ Agus thug iad fear thuige, agus thuirt e riutha. “Cò leis a tha an coltas agus an sgrìobhadh seo?” Agus thuirt iadsan, “Le Cèasar.”

¹⁷ Thuirt Ìosa riutha, “Thugaibh do Chèasar na rudan a tha le Cèasar agus do Dhia na rudan a tha le Dia.” Agus ghabh iad iongnadh ris.

Pòsadh san Aiseirigh

¹⁸ Agus thàinig Sadusaich thuige, a tha ag ràdh nach eil aiseirigh ann, agus cheasnaich iad e, ag ràdh,

¹⁹ “Fhir‑Teagaisg, sgrìobh Maois dhuinne nam bàsaicheadh bràthair duine is gum fàgadh e bean, ach nach fàgadh e clann, gun gabhadh a bhràthair a' bhean thuige fhèin, agus gun togadh e sliochd dha bhràthair.

²⁰ Bha seachdnar bhràithrean ann; agus ghabh a' chiad fhear dhiubh bean is nuair a chaochail e cha do dh'fhàg e sliochd.

²¹ Agus ghabh an dara fear i, agus chaochail esan, gun shliochd fhàgail; agus an treas fear cuideachd.

²² Agus cha do dh'fhàg an t‑seachdnar sliochd. Mu dheireadh chaochail am boireannach cuideachd.

²³ San aiseirigh, nuair a dh'èireas iad a‑rithist, cò aca aig am bi i mar bhean? Oir bha i aig an t‑seachdnar mar bhean.”

²⁴ Thuirt Ìosa riutha, “Nach e seo an t‑adhbhar gu bheil sibh ceàrr, a chionn 's nach aithne dhuibh na Sgriobtaran no cumhachd Dhè?

²⁵ Oir nuair a dh'èireas iad o na mairbh, cha phòs iad, 's cha mhotha a thèid an toirt ann am pòsadh, ach tha iad mar ainglean air nèamh.

²⁶ Ach a thaobh nam marbh a bhith air an togail, nach do leugh sibh ann an leabhar Mhaois, sa chunntas mun phreas, mar a bhruidhinn Dia ris, ag ràdh, ‘Is mise Dia Abrahàim, agus Dia Ìsaaic, agus Dia Iàcoib’?

²⁷ Chan esan Dia nam marbh, ach nam beò. Tha sibhse gu math fada ceàrr!”

An Àithne as Motha

²⁸ Agus thàinig fear dhe na sgrìobhaichean, agus nuair a chuala e iadsan a' deasbad ri chèile, agus a' faicinn gun do fhreagair e gu math iad, dh'fhaighnich e dha, “Cò i a' phrìomh àithne dhiubh uile?”

²⁹ Fhreagair Ìosa, “Is i seo a' phrìomh thè: ‘Èist, O Israeil, an Tighearna ar Dia, is aon Tighearna e.

³⁰ Agus gràdhaichidh tu an Tighearna do Dhia led uile chridhe, agus led uile anam agus led uile inntinn, agus led uile neart.’

³¹ Is i seo an dara tè, ‘Gràdhaichidh tu do choimhearsnach mar thu fhèin.’ Chan eil àithne eile ann a tha nas motha na iad seo.”

³² Agus thuirt an sgrìobhaiche ris, “Ceart, fhir‑teagaisg. Is fìrinneach a thuirt thu gur e aon a th' annsan, agus nach eil aon eile ann ach esan.

³³ Agus a bhith ga ghràdhachadh leis a' chridhe gu lèir 's leis an tuigse gu lèir 's leis an neart gu lèir, agus a bhith a' gràdhachadh a choimhearsnaich mar e fhèin, tha sin fada nas motha na na tabhartasan‑loisgte 's na h‑ìobairtean gu lèir.”

³⁴ Agus nuair a chunnaic Ìosa gun do fhreagair e gu glic, thuirt e ris, “Chan eil thu fada o rìoghachd Dhè.” Agus às dèidh sin cha robh de mhisneachd aig neach sam bith an còrr cheistean a chur air.

Cò Dha a Tha an Crìosd na Mhac?

³⁵ Agus fhad 's a theagaisg Ìosa san teampall thuirt e, “Ciamar as urrainn dha na sgrìobhaichean a ràdh gur e an Crìosd Mac Dhaibhidh?

³⁶ Oir thuirt Daibhidh fhèin tron Spiorad Naomh: “‘Thuirt an Tighearna rim Thighearna: “Suidh aig mo dheas‑làimh gus an cuir mi do nàimhdean fod chasan.”’

³⁷ “Tha Daibhidh fhèin a' gabhail ‘Tighearna’ air. Ciamar mar sin a tha e na mhac dha?” Agus dh'èist am mòr‑shluagh gu toilichte ris.

Rabhadh an aghaidh Luchd‑Teagaisg an Lagha

³⁸ Agus na theagasg thuirt e, “Bithibh air ur faiceall o na sgrìobhaichean, leis an toigh l' a bhith a' coiseachd mun cuairt ann an culaidhean fada agus fàilte fhaighinn sna margaidhean,

³⁹ agus na prìomh chathraichean fhaighinn sna sionagogan, agus na h‑àiteachan urramach fhaighinn aig na cuirmean,

⁴⁰ a tha ag ithe suas taighean bhanntrach, agus, airson a bhith a' leigeil orra, a nì ùrnaighean fhada. Gheibh iad sin an dìteadh as motha.”

Tabhartas na Banntraich

⁴¹ Agus shuidh Ìosa sìos mu choinneamh àite an ionmhais, agus bha e a' sealltainn air an t‑sluagh a' tilgeil an airgid dhan chiste‑ionmhais, is thilg tòrr dhaoine beairteach mòran innte.

⁴² Thàinig banntrach bhochd agus thilg i dà bhonn bheag innte, luach sgillinn.

⁴³ Agus ghairm e a dheisciobail thuige is thuirt e riutha, “Gu fìrinneach tha mi ag ràdh ribh gun do thilg a' bhanntrach bhochd seo barrachd dhan chiste‑ionmhais na iadsan uile a thilg innte.

⁴⁴ Oir thilg iadsan uile às am mòr‑phailteas, ach thilg ise às a gainne a h‑uile rud bh' aice, fiù 's a bith‑beò gu lèir.”