Lùcas 4 - An Tiomnadh Nuadh anns an Eadar-Theangachadh Ùr Gàidhlig 2017

Buaireadh Ìosa anns an Fhàsach

¹ Agus thill Ìosa, làn dhen Spiorad Naomh, o Iòrdan agus bha e air a threòrachadh leis an Spiorad anns an fhàsach

² airson ceathrad latha, ga bhuaireadh leis an diabhal. Agus cha do dh'ith e rud sam bith anns na làithean sin: agus nuair a chaidh an crìochnachadh, bha e acrach.

³ Thuirt an diabhal ris, “Mas tu Mac Dhè, can ris a' chloich seo tionndadh na h‑aran.”

⁴ Agus fhreagair Ìosa e, “Tha e sgrìobhte, ‘Chan ann air aran a‑mhàin a bhios duine beò.’”

⁵ Agus thug an diabhal suas e, agus sheall e dha rìoghachdan an t‑saoghail gu lèir ann an tiota tìm.

⁶ Agus thuirt an diabhal ris, “Bheir mise dhutsa an t‑ùghdarras seo gu lèir agus a' ghlòir aca, oir chaidh a thoirt thairis dhòmhsa, agus tha mi ga thoirt do neach sam bith as toigh leam.

⁷ Mar sin, ma nì thu adhradh dhòmhsa, is ann leatsa a bhios e gu lèir.”

⁸ Agus fhreagair Ìosa e, “Tha e sgrìobhte, ‘Nì thu adhradh dhan Tighearna do Dhia, agus dhàsan a‑mhàin nì thu seirbheis.’”

⁹ Agus thug e gu Ierusalem e, is chuir e air binnean an teampaill e, agus thuirt e ris, “Mas tu Mac Dhè, tilg thu fhèin sìos à seo.

¹⁰ Oir tha e sgrìobhte: ‘Bheir e àithne dha ainglean mud thimcheall, do ghleidheadh’;

¹¹ agus ‘Togaidh iad suas thu nan làmhan, air eagal 's gum buail thu do chas air cloich.’”

¹² Agus fhreagair Ìosa e, “Tha e air a ràdh, ‘Cha bhuair thu an Tighearna do Dhia.’”

¹³ Agus nuair a chrìochnaich an diabhal a h‑uile buaireadh, dh'fhalbh e uaithe gus an tigeadh àm fàbharach.

Ìosa air a Dhiùltadh ann an Nàsaret

¹⁴ Agus thill Ìosa a Ghalile ann an cumhachd an Spioraid, agus chaidh iomradh ma dheidhinn a‑mach air feadh a' cheàrnaidh mun cuairt gu lèir.

¹⁵ Agus bha e a' teagasg anns na sionagogan aca, a' faighinn molaidh on a h‑uile duine.

¹⁶ Agus thàinig e gu Nàsaret, far an do thogadh e, 's mar a b' fhasan dha, chaidh e a‑steach dhan t‑sionagog air latha na Sàbaid, is sheas e airson leughadh.

¹⁷ Agus chaidh rolla an fhàidh Isaiah a thoirt dha. Agus dh'fhuasgail e an rolla is lorg e an t‑àite far a bheil e sgrìobhte:

¹⁸ “Tha Spiorad an Tighearna orm, a chionn 's gun do dh'ung e mi airson an deagh sgeòil a shearmonachadh dha na bochdan. Tha e air mo chur a ghairm saorsa dha na braighdean agus fradharc air aiseag dha na doill, a thoirt saorsa dhan mhuinntir a tha air an claoidh,

¹⁹ a shearmonachadh bliadhna fàbhair an Tighearna.”

²⁰ Agus roilig e suas an rolla, thug e air ais dhan fhear‑frithealaidh e, is shuidh e. Agus bha sùilean a h‑uile duine a bh' anns an t‑sionagog a' coimhead gu geur air.

²¹ Agus thòisich e ag ràdh riutha, “An‑diugh chaidh an Sgriobtar seo a choileanadh nur n‑èisteachd‑se.”

²² Agus bhruidhinn iad uile gu math ma dheidhinn is ghabh iad iongnadh mu na faclan gràsmhor a bha a' tighinn a‑mach às a bheul. Agus thuirt iad, “Nach e seo mac Iòsaiph?”

²³ Agus thuirt e riutha, “Gun amharas canaidh sibh an gnàth‑fhacal seo rium: ‘A lighiche, leighis thu fhèin! Na chuala sinn a rinn thu ann an Capernàum, dèan an seo na do bhaile fhèin cuideachd.’”

²⁴ Agus thuirt e, “Gu deimhinn tha mi ag ràdh ribh, chan eil fàidh sam bith a' faighinn fàilte na dhùthaich fhèin.

²⁵ Ach gu fìrinneach tha mise ag ràdh ribh gun robh mòran bhanntrach ann an Israel ann an làithean Eliah, nuair a chaidh an t‑adhar a dhùnadh airson trì bliadhna agus sia mìosan, agus a bha gorta mhòr air feadh na tìre gu lèir.

²⁶ Ach cha deach Eliah a chur gu aon dhiubh, ach gu Sarepta Shìdoin, gu boireannach a bha na banntraich.

²⁷ Agus bha mòran lobhar ann an Israel aig àm Elisah am fàidh agus cha deach aon dhiubh a ghlanadh ach Nàaman an Sirianach.”

²⁸ Agus chaidh iadsan uile a bh' anns an t‑sionagog a lìonadh le feirg, nuair a chuala iad na rudan sin.

²⁹ Agus dh'èirich iad, is thilg iad a‑mach às a' bhaile e, agus thug iad leotha e gu mullach a' chnuic air an robh am baile aca air a thogail, airson a thilgeil sìos am bearradh.

³⁰ Ach a' gabhail tro am meadhan, dh'fhalbh e.

Ìosa a' Slànachadh Duine anns an Robh Deamhan

³¹ Agus chaidh e sìos gu Capernàum, baile ann an Galile, agus bha e gan teagasg air an t‑Sàbaid,

³² agus bha iad fo iongnadh mu theagasg‑san, oir bha ùghdarras aig fhacal‑san.

³³ Agus anns an t‑sionagog bha duine anns an robh spiorad deamhain neòghlain, agus dh'èigh e le guth mòr,

³⁴ “À! Dè do ghnothach‑sa rinne, Ìosa o Nàsaret? An tàinig thu gar sgrios? Is aithne dhòmhsa cò thu – Aon Naomh Dhè.”

³⁵ Agus chronaich Ìosa e, ag ràdh, “Bi sàmhach agus thig a‑mach às.” Agus nuair a bha an deamhan air esan a thilgeil sìos nam measg, thàinig e a‑mach às gun chron sam bith a dhèanamh air.

³⁶ Agus bha iad uile fo iongnadh agus thuirt iad ri chèile, “Dè an seòrsa cainnt a tha an seo? Oir le ùghdarras is cumhachd tha e a' toirt òrduigh dha na spioradan neòghlan, agus tha iad a' tighinn a‑mach.”

³⁷ Agus bha iomradh ma dheidhinn‑san a' dol a‑mach air feadh gach àite dhen cheàrnaidh mun cuairt.

Ìosa a' Slànachadh Mhòran

³⁸ Dh'èirich e às an t‑sionagog agus chaidh e a‑steach do thaigh Shìmoin. A‑nis bha màthair‑chèile Shìmoin a' fulang le fiabhras mòr, agus dh'fhaighnich iad do dh'Ìosa an cuidicheadh e i.

³⁹ Agus sheas e os a cionn, chronaich e am fiabhras, agus dh'fhàg e i. Agus dh'èirich i sa bhad, agus fhritheil i dhaibh.

⁴⁰ A‑nis, fhad 's a bha a' ghrian a' dol fodha, chaidh iadsan uile a bha tinn le iomadh seòrsa tinneis a thoirt thuige, agus chuir esan a làmhan air gach aon dhiubh, agus leighis e iad.

⁴¹ Agus bha deamhain cuideachd a' tighinn a‑mach à mòran, ag èigheach, “Is tusa Mac Dhè.” Ach chronaich e iad agus cha leigeadh e leotha bruidhinn, oir bha fios aca gum b' esan an Crìosd.

⁴² Agus nuair a thàinig an latha, dh'fhalbh e agus chaidh e gu àite fàsail. Agus bha an sluagh ga shireadh agus thàinig iad thuige, agus dh'fheuch iad ri a chumail om fàgail.

⁴³ Ach thuirt esan riutha, “Feumaidh mi soisgeul rìoghachd Dhè a shearmonachadh dha na bailtean eile cuideachd, oir is ann airson seo a chaidh mo chur a‑mach.”

⁴⁴ Agus bha e a' searmonachadh ann an sionagogan Iudèa.