Lùcas 1 - An Tiomnadh Nuadh anns an Eadar-Theangachadh Ùr Gàidhlig 2017

Coisrigeadh an Leabhair do Theophilus

¹ A chionn 's gu bheil mòran air gabhail os làimh cunntas a chur ri chèile mu na rudan a chaidh a choileanadh nar measg‑ne,

² dìreach mar a dh'earb iadsan rinne iad, a bha nan sùil‑fhianaisean agus nan luchd‑frithealaidh air an fhacal:

³ chunnaic mise iomchaidh e cuideachd – on a rannsaich mi a h‑uile rud gu mionaideach on toiseach – eachdraidh òrdail a sgrìobhadh dhut, a Theophiluis as uaisle,

⁴ airson 's gum faod cinnt a bhith agad mu na rudan a chaidh a theagasg dhut.

Fàidheadaireachd mu Bhreith Eòin Baistidh

⁵ Ann an làithean Heroid, rìgh Iudèa, bha sagart ann air an robh an t‑ainm Sachariah, de roinn shagartail Abia. Agus bha a bhean o nigheanan Aaroin, agus b' e Ealasaid an t‑ainm a bh' oirre.

⁶ Agus bha an dithis aca fìreanta mu choinneamh Dhè, gan giùlain fhèin gu neo‑lochdach ann an àithntean is òrduighean an Tighearna gu lèir.

⁷ Ach cha robh leanabh aca, a chionn 's gun robh Ealasaid neo‑thorrach, agus bha an dithis aca suas ann am bliadhnaichean.

⁸ A‑nis, fhad 's a bha esan a' frithealadh mar shagart mu choinneamh Dhè, nuair a bha an roinn aigesan fo dhleastanas frithealaidh –

⁹ a rèir cleachdadh na sagartachd – chaidh a thaghadh tro chrannchur airson a dhol a‑steach do theampall an Tighearna agus tùis a losgadh.

¹⁰ Agus bha mòr‑bhuidheann an t‑sluaigh gu lèir ag ùrnaigh a‑muigh aig àm na tùise.

¹¹ Is nochd aingeal leis an Tighearna ris, na sheasamh air taobh deas altair na tùise.

¹² Agus bha Sachariah fo dhragh mòr nuair a chunnaic e e, is bhuail eagal e.

¹³ Ach thuirt an t‑aingeal ris, “Na gabh eagal, a Shachariah; oir chaidh d' ùrnaigh a chluinntinn, agus beiridh do bhean Ealasaid mac dhut, agus bheir thu Eòin mar ainm air.

¹⁴ Agus bidh aoibhneas is toileachas ort; agus nì mòran gàirdeachas aig àm a bhreith.

¹⁵ Oir bidh e mòr mu choinneamh an Tighearna, agus chan òl e fìon no deoch‑làidir idir; agus bidh e air a lìonadh leis an Spiorad Naomh, fiù 's o bhroinn a mhàthar.

¹⁶ Agus tillidh e mòran de chloinn Israeil chun an Tighearna an Dia‑san.

¹⁷ Agus thèid e roimhesan ann an spiorad 's ann an cumhachd Eliah, airson cridheachan nan athraichean a thionndadh chun na cloinne, agus na h‑eas‑umhail gu gliocas nam fìrean, airson sluagh a dhèanamh deiseil dhan Tighearna a th' air an ullachadh.”

¹⁸ Agus thuirt Sachariah ris an aingeal, “Ciamar a bhios fios agam air a seo? Oir is e seann duine a th' annam, agus tha mo bhean suas ann am bliadhnaichean.”

¹⁹ Agus fhreagair an t‑aingeal e, “Is mise Gàbriel a tha a' seasamh mu choinneamh Dhè, agus chaidh mo chur airson bruidhinn riutsa agus an naidheachd mhath seo a thoirt thugad.

²⁰ Agus, seall, bidh thu balbh is gun chomas bruidhinn gus an latha nuair a thachras na rudan seo, a chionn 's nach do chreid thu m' fhaclan‑sa, a bhios air an coileanadh nan àm fhèin.”

²¹ Agus bha an sluagh a' feitheamh ri Sachariah, agus bha an dàil a rinn e anns an teampall a' cur iongnadh orra.

²² Agus nuair a thàinig e a‑mach, cha b' urrainn dha bruidhinn riutha, agus thuig iad gum faca e sealladh anns an teampall, oir chùm e air a' smèideadh riutha, agus dh'fhan e balbh.

²³ Agus nuair a bha làithean a fhrithealaidh seachad chaidh e dha thaigh fhèin.

²⁴ Às dèidh nan làithean sin dh'fhàs a bhean Ealasaid torrach, agus chùm i i fhèin air falach airson còig mìosan, ag ràdh,

²⁵ “Is ann mar seo a rinn an Tighearna rium anns na làithean san do sheall e orm, a' toirt mo mhaslaidh am measg dhaoine air falbh uam.”

Fàidheadaireachd mu Bhreith Ìosa

²⁶ Anns an t‑siathamh mìos, chaidh an t‑aingeal Gàbriel a chur o Dhia gu baile ann an Galile air an robh an t‑ainm Nàsaret,

²⁷ gu òigh a bha fo ghealladh‑pòsaidh aig fear dham b' ainm Iòsaph, de thaigh Dhaibhidh; b' e ainm na h‑òighe Moire,

²⁸ agus thàinig e thuice is thuirt e, “Fàilte, O thusa a fhuair fàbhar, tha an Tighearna còmhla riut!”

²⁹ Ach bha i fo dhragh mòr air sgàth an fhacail aige, agus dh'fheuch i ri reusanachadh gu dè an seòrsa fàilte a dh'fhaodadh a bhith an seo.

³⁰ Agus thuirt an t‑aingeal rithe, “Na bi fo eagal, a Mhoire; oir fhuair thu fàbhar le Dia.

³¹ Agus, seall, fàsaidh tu torrach nad bhroinn, agus beiridh tu mac, agus bheir thu Ìosa mar ainm air.

³² Bidh e mòr, agus thèid Mac an Aoin as Àirde a ghabhail air; agus bheir an Tighearna Dia rìgh‑chathair athar, Daibhidh, dha.

³³ Agus riaghlaidh e thairis air taigh Iàcoib gu sìorraidh, agus air a rìoghachd cha bhi crìoch.”

³⁴ Agus thuirt Moire ris an aingeal, “Ciamar as urrainn seo a bhith, on as e òigh a th' annamsa?”

³⁵ Agus fhreagair an t‑aingeal i, “Thig an Spiorad Naomh ort, agus cuiridh cumhachd an Aoin as Àirde sgàil ort. Mar sin, an leanabh naomh a bhios air a bhreith, gabhaidh iad Mac Dhè air.

³⁶ Agus, seall, do bhanacharaid Ealasaid, na seann aois, tha ise cuideachd torrach le mac; agus is e seo an t‑siathamh mìos dhìse air an deach neo‑thorrach a ghabhail,

³⁷ oir cha bhi rud sam bith do‑dhèante do Dhia.”

³⁸ Agus thuirt Moire, “Seall, is mise searbhanta an Tighearna; biodh e dèante riumsa a rèir d' fhacail.” Agus dh'fhàg an t‑aingeal i.

Moire a' Tadhal air Ealasaid

³⁹ Anns na làithean sin dh'èirich Moire agus chaidh i ann an cabhaig gu dùthaich nam beann, gu baile ann an Iùdah,

⁴⁰ agus chaidh i a‑steach do thaigh Shachariais, agus chuir i fàilte air Ealasaid.

⁴¹ Agus nuair a chuala Ealasaid fàilte Mhoire, leum an naoidhean na broinn, agus chaidh Ealasaid a lìonadh leis an Spiorad Naomh.

⁴² Agus dh'èigh i a‑mach le guth àrd, “Is beannaichte thu am measg bhoireannach, agus is beannaichte toradh do bhroinne!

⁴³ Agus carson a dh'èirich seo dhòmhsa, gun tigeadh màthair mo Thighearna thugam?

⁴⁴ Oir seall, cho luath 's a thàinig fuaim d' fhàilte gu mo chluasan, leum an naoidhean le aoibhneas nam bhroinn.

⁴⁵ Agus is beannaichte ise a chreid gun deigheadh na thuirt an Tighearna rithe a choileanadh.”

Òran Moire

⁴⁶ Agus thuirt Moire, “Tha m' anam ag àrdachadh an Tighearna,

⁴⁷ agus tha mo spiorad a' dèanamh gàirdeachais ann an Dia mo Shlànaighear:

⁴⁸ oir tha e air sealltainn air staid ìosal a shearbhanta: oir seall, o seo suas gabhaidh a h‑uile ginealach ‘beannaichte’ orm.

⁴⁹ Oir tha an t‑Aon a tha cumhachdach air rudan mòra a dhèanamh dhomh; agus is naomh ainm‑san.

⁵⁰ Agus tha a thròcair dhaibhsan dhan eagal e – o ghinealach gu ginealach.

⁵¹ Nochd e neart le a ghàirdean; sgap e na h‑uaibhrich ann an smuain an cridhe.

⁵² Tha e air an luchd‑riaghlaidh a thoirt a‑nuas on cathraichean, agus tha e air iadsan a bha iriosal àrdachadh.

⁵³ Lìon e an fheadhainn a bha acrach le rudan matha; agus na daoine saidhbhir chuir e air falbh falamh.

⁵⁴ Chuidich e a sheirbheiseach Israel gus a thròcair a chuimhneachadh.

⁵⁵ Mar a thuirt e ri ar n‑athraichean, ri Abrahàm agus ri a shliochd gu sìorraidh.”

⁵⁶ Agus dh'fhan Moire còmhla ri Ealasaid mu thrì mìosan, agus thill i dha taigh fhèin.

Àm Breith Eòin Baistidh

⁵⁷ A‑nis thàinig an t‑àm airson leanabh a bhith aig Ealasaid, agus rug i mac.

⁵⁸ Agus chuala a coimhearsnaich 's a càirdean gun robh an Tighearna air mòr‑thròcair a shealltainn dhi: agus rinn iad gàirdeachas còmhla rithe.

⁵⁹ Agus air an ochdamh latha thàinig iad a thimcheall‑ghearradh an leanaibh, agus bha iad a' dol a thoirt ainm athar air, Sachariah,

⁶⁰ ach fhreagair a mhàthair, “Chan e idir; ach thèid Eòin a ghabhail air.”

⁶¹ Agus thuirt iad rithe, “Chan eil neach am measg do chàirdean air a bheil an t‑ainm seo.”

⁶² Agus smèid iad air athair, a' faighneachd dha dè a bu toigh leis‑san a thoirt air.

⁶³ Agus dh'iarr e clàr‑sgrìobhaidh, is sgrìobh e “Is e Eòin ainm.” Agus ghabh iad uile iongnadh.

⁶⁴ Agus anns a' bhad chaidh a bheul fhosgladh is a theanga fhuasgladh, agus bhruidhinn e, a' moladh Dhè.

⁶⁵ Agus thàinig eagal air an coimhearsnaich gu lèir; agus chaidh bruidhinn mu na rudan sin uile air feadh dùthaich àrd Iudèa air fad.

⁶⁶ Agus iadsan uile a chuala iad, ghlèidh iad nan cridhe iad, ag ràdh, “Dè, ma‑thà, an seòrsa leanaibh a bhios an seo?” Oir bha làmh an Tighearna còmhla ris.

Fàidheadaireachd Shachariah

⁶⁷ Agus bha athair, Sachariah, air a lìonadh leis an Spiorad Naomh, is rinn e fàidheadaireachd, ag ràdh:

⁶⁸ “Beannaichte gun robh an Tighearna Dia Israeil, a chionn 's gun do thadhail e air a shluagh, agus gun do shaor e iad.

⁶⁹ Agus gun do thog e suas adharc sàbhalaidh dhuinne ann an taigh a sheirbheisich Daibhidh,

⁷⁰ mar a thuirt e tro bheul fhàidhean naomha fhèin, o shean,

⁷¹ sàbhaladh o ar nàimhdean agus o làimh na feadhna sin uile aig a bheil fuath dhuinn.

⁷² A dhèanamh tròcair air ar n‑athraichean, agus an cùmhnant naomh aige a chuimhneachadh,

⁷³ a' mhionn a mhionnaich e dhar n‑athair Abrahàm, thug e dhuinn

⁷⁴ gum biodh sinne, às dèidh dhuinn a bhith air ar saoradh o làimh ar nàimhdean, a' dèanamh seirbheis dha às aonais eagail

⁷⁵ ann an naomhachd is ann am fìreantachd ma choinneamh fad ar làithean.

⁷⁶ Agus thusa, a leanaibh, thèid fàidh an Aoin as àirde a ghabhail ort; oir thèid thu ron Tighearna, a dh'ullachadh a shlighean,

⁷⁷ a thoirt eòlas sàbhalaidh dha shluagh, tro mhathanas am peacaidhean,

⁷⁸ air sgàth tròcair chaomh ar Dè‑ne, leis an tadhail èirigh‑na‑grèine oirnn on àirde

⁷⁹ airson solas a thoirt dhaibhsan a tha nan suidhe ann an dorchadas agus ann an sgàil a' bhàis, airson ar casan a threòrachadh a‑steach do shlighe na sìthe.”

⁸⁰ Agus dh'fhàs an leanabh, agus chaidh a neartachadh ann an spiorad, agus bha e anns an fhàsach gu latha an fhoillseachaidh phoblaich aige do dh'Israel.