Gnìomharan 9 - An Tiomnadh Nuadh anns an Eadar-Theangachadh Ùr Gàidhlig 2017

Iompachadh Shauil

¹ Ach chaidh Saul – fhathast a' sèideadh a‑mach mhaoidhidhean is mhurt an aghaidh deisciobail an Tighearna – chun an àrd‑shagairt

² agus dh'iarr e litrichean gu na sionagogan ann an Damascas air, airson 's, nam faigheadh e neach sam bith a bhuineadh dhan t‑Slighe, fireannaich no boireannaich, gun toireadh e ceangailte gu Ierusalem iad.

³ A‑nis fhad 's a chaidh e air a shlighe, theann e dlùth ri Damascas agus gu grad dheàlraich solas o nèamh mun cuairt air.

⁴ Agus a' tuiteam chun na talmhainn chuala e guth ag ràdh ris, “A Shauil, a Shauil, carson a tha thu gam gheur‑leanmhainn‑sa?”

⁵ Agus thuirt esan, “Cò thu, a Thighearna?” Agus thuirt an Tighearna, “Is mise Ìosa a tha thu a' geur‑leanmhainn.

⁶ Ach èirich agus thalla a‑steach dhan bhaile, agus thèid innse dhut dè a dh'fheumas tu a dhèanamh.”

⁷ Sheas na daoine a bha a' siubhal còmhla ris is gun smid aca, a' cluinntinn a' ghutha ach gun neach sam bith fhaicinn.

⁸ Dh'èirich Saul on talamh, agus ged a bha a shùilean fosgailte, chan fhaca e sìon. Mar sin threòraich iad air làimh e is thug iad gu Damascas e.

⁹ Agus airson trì latha bha e gun fhradharc, agus cha do dh'ith 's cha do dh'òl e.

¹⁰ A‑nis bha deisciobal ann an Damascas dham b' ainm Ananias. Thuirt an Tighearna ris ann an sealladh, “Ananiais!” Agus thuirt esan, “Seo mi, a Thighearna.”

¹¹ Agus thuirt an Tighearna ris, “Èirich is thalla dhan t‑sràid ris an canar Dìreach, agus aig taigh Iùdais faighnich airson duine o Tharsas ris an canar Saul, oir seall, tha e ag ùrnaigh,

¹² agus tha e air duine dhan ainm Ananias fhaicinn ann an sealladh a' tighinn a‑steach agus a' sìneadh a làmhan air airson 's gum faigh e a fhradharc air ais.”

¹³ Ach fhreagair Ananias, “A Thighearna, chuala mi o mhòran mun duine seo, na rinn e de dh'olc rid naoimh ann an Ierusalem.

¹⁴ Agus an seo tha ùghdarras aige o na h‑àrd‑shagartan iadsan uile a cheangal a tha a' gairm air d' ainm‑sa.”

¹⁵ Ach thuirt an Tighearna ris, “Thalla, oir is e soitheach taghte dhòmhsa a th' anns an duine seo airson m' ainm a ghiùlain mu choinneamh nan Cinneach is rìghrean is chloinn Israeil.

¹⁶ Oir seallaidh mise dha uimhir 's a dh'fheumas e fhulang air sgàth m' ainm‑sa.”

¹⁷ Mar sin dh'fhalbh Ananias is chaidh e a‑steach dhan taigh. Agus a' sìneadh a làmhan air thuirt e, “A bhràthair Saul, tha an Tighearna Ìosa, a nochd riut air an rathad air an tàinig thu, air mise a chur airson 's gum faigheadh tu do fhradharc air ais agus gum biodh tu air do lìonadh leis an Spiorad Naomh.”

¹⁸ Agus sa bhad thuit rudeigin mar lannan o a shùilean agus chaidh a fhradharc aiseag dha. An uair sin dh'èirich e agus chaidh a bhaisteadh,

¹⁹ agus a' gabhail bìdh, chaidh a neartachadh. A‑nis airson corra latha bha e còmhla ri na deisciobail ann an Damascas.

Saul ann an Damascas agus ann an Ierusalem

²⁰ Agus sa bhad shearmonaich e Ìosa anns na sionagogan, ag ràdh, “Is esan Mac Dhè.”

²¹ Agus bha iadsan uile a chuala e fo iongnadh agus thuirt iad, “Nach e seo esan a rinn sgrios ann an Ierusalem air an fheadhainn a ghairm air an ainm seo? Agus nach tàinig e an seo airson 's gun toireadh e ceangailte iad gu na h‑àrd‑shagartan?”

²² Ach dh'fhàs Saul na bu mhotha ann an neart, agus chuir e troimh‑a‑chèile na h‑Iùdhaich a bha a' fuireach ann an Damascas le bhith a' dearbhadh gum b' e Ìosa an Crìosd.

²³ Nuair a bha mòran làithean air a dhol seachad, rinn na h‑Iùdhaich innleachd le chèile airson 's gum marbhadh iad e,

²⁴ ach chaidh fios air an innleachd aca a thoirt do Shaul. Bha iad a' dèanamh faire air na geataichean a latha 's a dh'oidhche airson a mharbhadh.

²⁵ Ach thug a dheisciobail leotha san oidhche e agus leig iad sìos e ann am basgaid mhòr tro fhosgladh anns a' bhalla.

²⁶ Agus nuair a bha e air tighinn gu Ierusalem, dh'fheuch e ri e fhèin aonadh ris na deisciobail. Ach bha eagal orra uile roimhe, oir cha do chreid iad gum b' e deisciobal a bha ann.

²⁷ Ach ghabh Barnabas grèim air agus thug e gu na h‑abstoil e agus dh'innis e dhaibh mar a bha e air an Tighearna fhaicinn air an rathad is gun do bhruidhinn e ris agus mar a shearmonaich e gu dàn ann an Damascas ann an ainm Ìosa.

²⁸ Mar sin chaidh e a‑steach agus a‑mach nam measg ann an Ierusalem, a' searmonachadh gu dàn ann an ainm an Tighearna.

²⁹ Agus bhruidhinn e is rinn e deasbaireachd an aghaidh nan Iùdhach Greugach. Ach bha iad ag iarraidh a mharbhadh.

³⁰ Ach nuair a fhuair na bràithrean seo a‑mach, thug iad sìos gu Cesarèa e agus chuir iad air falbh gu Tarsas e.

³¹ Mar sin bha sìth aig an eaglais air feadh Iudèa gu lèir is Ghalile is Shamaria, agus bha i air a daingneachadh. Agus a' coiseachd ann an eagal an Tighearna 's ann an cofhurtachd an Spioraid Naoimh, dh'fhàs i ann an àireamh.

Eneas agus Dorcas

³² A‑nis fhad 's a chaidh Peadar an siud 's an seo nam measg gu lèir, thàinig e cuideachd a‑nuas gu na naoimh a bha a' fuireach ann an Lida.

³³ An sin fhuair e duine àraidh dham b' ainm Eneas, a bha rè ochd bliadhna air an leabaidh, oir bha a' phairilis air.

³⁴ Agus thuirt Peadar ris, “Eneais, tha Ìosa Crìosd gad leigheas. Èirich is càirich do leabaidh.” Agus sa bhad dh'èirich e.

³⁵ Agus chunnaic iadsan uile a bha a' fuireach ann an Lida is ann an Sàron e, agus thionndaidh iad chun an Tighearna.

³⁶ A‑nis ann an Iopa bha bana‑dheisciobal dham b' ainm Tabita, a tha, air eadar‑theangachadh, a' ciallachadh Dorcas. Bha ise làn de dheagh obraichean is de ghnìomhan carthannais a bha i a' dèanamh gun sgur.

³⁷ Anns na làithean sin dh'fhàs i tinn is chaochail i, agus nuair a bha iad air a glanadh, shìn iad ann an seòmar uachdarach i.

³⁸ Bhon a bha Lida faisg air Iopa, chuir na deisciobail – a' cluinntinn gun robh Peadar an sin – dithis fhear thuige, a' guidhe air, “Thig thugainn gun dàil!”

³⁹ Mar sin dh'èirich Peadar is chaidh e còmhla riutha. Agus nuair a ràinig e, thug iad dhan t‑seòmar uachdarach e. Sheas na banntraichean uile ri thaobh, a' caoineadh agus a' sealltainn nan lèintean‑fada is nam badan aodaich eile a rinn Dorcas fhad 's a bha i còmhla riutha.

⁴⁰ Ach chuir Peadar iad uile a‑mach, agus chaidh e air a ghlùinean is rinn e ùrnaigh; agus a' tionndadh chun a' chuirp, thuirt e, “A Thabita, èirich.” Agus dh'fhosgail i a sùilean is nuair a chunnaic i Peadar shuidh i suas.

⁴¹ Agus thug e a làmh dhi, agus thog e suas i. An uair sin a' gairm nan naomh agus nam banntraichean, sheall e dhaibh beò i.

⁴² Agus fhuair iad fios air a seo air feadh Iopa uile, agus chreid mòran anns an Tighearna.

⁴³ Agus dh'fhan e ann an Iopa airson mòran làithean còmhla ri fear dham b' ainm Sìmon, fear‑deasachaidh leathair.