Gnìomharan 5 - An Tiomnadh Nuadh anns an Eadar-Theangachadh Ùr Gàidhlig 2017

Ananias agus Saphira

¹ Ach reic duine àraidh dham b' ainm Ananias, cuide ri a bhean Saphira, pìos seilbh

² agus, le fios a bhith aig a bhean cuideachd air, chùm e air ais cuid dhen airgead agus thug e dìreach pàirt dheth is shìn e aig casan nan abstol e.

³ Ach thuirt Peadar, “Ananiais, carson a lìon Sàtan do chridhe gus breug innse dhan Spiorad Naomh agus gus pàirt de phrìs na talmhainn a chumail air ais?

⁴ Fhad 's a bha e agad, nach b' ann leat a bha e? Agus às dèidh a reic, nach robh còir agad air? Carson a shuidhich thu nad chridhe an gnìomh seo a dhèanamh? Cha b' ann do dhaoine a dh'innis thu breug ach do Dhia.”

⁵ Nuair a chuala Ananias na briathran seo, thuit e sìos is chaidh an deò às. Agus thàinig eagal mòr orrasan uile a chuala ma dheidhinn.

⁶ Dh'èirich na daoine òga agus shuain iad e agus ghiùlain iad a‑mach e is dh'adhlaic iad e.

⁷ Thachair, mu thrì uairean às dèidh sin, gun tàinig a bhean a‑steach is gun fhios aice air na bh' air tachairt.

⁸ Agus thuirt Peadar rithe, “Innis dhòmhsa an do reic sibh an talamh seo airson na h‑uiread seo?” Agus thuirt ise, “Seadh, airson na h‑uiread sin.”

⁹ Ach thuirt Peadar rithe, “Carson a dh'aontaich sibh còmhla Spiorad an Tighearna a bhuaireadh? Seall, tha casan na feadhna a dh'adhlaic d' fhear aig an doras, agus giùlainidh iad thusa a‑mach cuideachd.”

¹⁰ Sa bhad thuit i sìos aig a chasan agus chaidh an deò aiste. Agus nuair a thàinig na fir òga a‑steach fhuair iad marbh i, agus ghiùlain iad a‑mach i agus dh'adhlaic iad i ri taobh an duine aice.

¹¹ Agus thàinig eagal mòr air an eaglais gu lèir, agus orrasan uile a chuala mu na rudan seo.

Na h‑Abstoil a' Slànachadh Mhòran

¹² A‑nis chaidh mòran chomharraidhean agus mhìorbhailean a dhèanamh am measg an t‑sluaigh le làmhan nan abstol. Agus bha iad uile a dh'aon inntinn ann an sgàil‑thaigh Sholaimh.

¹³ Cha dùraigeadh gin dhen chòrr aonadh riutha, ach bha mòr‑mheas aig an t‑sluagh orra.

¹⁴ Agus chaidh tòrr a bharrachd chreidmheach a chur ris an Tighearna, sluagh mòr, an dà chuid de dh'fhir agus de bhoireannaich,

¹⁵ air chor 's gun tug iad fiù 's a‑mach na h‑euslaintich dha na sràidean agus gun do shìn iad air leapannan is air sìneadairean iad, airson 's nuair a ghabhadh Peadar seachad gun tuiteadh fiù 's fhaileas orra.

¹⁶ Chruinnich an sluagh cuideachd o na bailtean mu thimcheall air Ierusalem, a' toirt leotha euslainteach is feadhainn a bha a' fulang le spioradan neòghlan, agus bha iad uile air an leigheas.

Na h‑Abstoil a' Fulang Geur‑Leanmhainn

¹⁷ Ach dh'èirich an t‑àrd‑shagart, agus iadsan uile a bha còmhla ris ('s e sin buidheann nan Sadusach), 's iad air an lìonadh le eud,

¹⁸ agus ghlac iad na h‑abstoil agus chuir iad dhan phrìosan phoblach iad.

¹⁹ Ach san oidhche dh'fhosgail aingeal dhen Tighearna dorsan a' phrìosain agus threòraich e a‑mach iadsan, agus thuirt e,

²⁰ “Thallaibh 's seasaibh is innsibh briathran na beatha seo gu lèir dhan t‑sluagh san teampall.”

²¹ Agus nuair a chuala iad seo, chaidh iad a‑steach dhan teampall aig briseadh an latha agus bha iad a' teagasg. A‑nis nuair a thàinig an t‑àrd‑shagart, agus iadsan a bha còmhla ris, ghairm iad cruinn a' Chomhairle agus Seanadh chloinn Israeil gu lèir agus chuir iad fios dhan phrìosan airson 's gun deigheadh iadsan a thoirt thuca.

²² Ach nuair a thàinig na h‑oifigearan, cha d' fhuair iad sa phrìosan iad; mar sin thill iad agus thug iad aithris air a seo,

²³ ag ràdh, “Fhuair sinne am prìosan glaiste gu ro thèarainte, agus na maoir nan seasamh aig na dorsan, ach nuair a dh'fhosgail sinn iad, cha d' fhuair sinn duine sam bith a‑staigh.”

²⁴ A‑nis nuair a chuala an caiptean agus na h‑àrd‑shagartan na briathran seo, bha iad fo imcheist mhòr mun deidhinn, a thaobh dè a thigeadh às a seo.

²⁵ Ach thàinig cuideigin agus thug e an cunntas seo dhaibh: “Seallaibh! Tha na daoine a chuir sibh dhan phrìosan nan seasamh san teampall agus a' teagasg an t‑sluaigh.”

²⁶ An uair sin chaidh an caiptean le oifigearan agus thug iad leotha iad: cha b' ann tro cho‑èigneachadh, oir bha an t‑eagal orra on t‑sluagh – gun fhios nach biodh iad air an clachadh leotha.

²⁷ Agus nuair a bha iad air an toirt leotha, chuir iad mu choinneamh na Comhairle iad. Agus cheasnaich an t‑àrd‑shagart iad,

²⁸ ag ràdh, “Thug sinne òrdugh teann gun teagasg a dhèanamh san ainm seo, agus fhathast lìon sibhse Ierusalem le ur teagasg, agus tha sibh a' cur romhaibh fuil an duine sin a thoirt oirnne.”

²⁹ Ach fhreagair Peadar agus na h‑abstoil, ag ràdh, “Tha e nas cudromaiche ùmhlachd a thoirt do Dhia na do dhaoine!

³⁰ Thog Dia ar n‑athraichean Ìosa, a mharbh sibhse tro a chrochadh air crann.

³¹ Dh'àrdaich Dia esan aig a dheas‑làimh na Phrionnsa 's na Shlànaighear, airson aithreachas a thoirt do dh'Israel, agus mathanas pheacaidhean.

³² Agus tha sinne nar fianaisean dha air na rudan seo, agus an Spiorad Naomh cuideachd, a thug Dia dhaibhsan a tha umhail dha.”

³³ Nuair a chuala iad seo ghabh iad an caoch agus bha iad ag iarraidh am marbhadh.

³⁴ Ach dh'èirich Pharasach àraidh dham b' ainm Gamaliel sa Chomhairle, fear‑teagaisg an lagha, aig an robh urram an t‑sluaigh gu lèir, agus thug e òrduighean na daoine a chur a‑mach airson ùine bhig.

³⁵ Agus thuirt e riutha, “Fheara Israeil, thoiribh an aire dè a tha sibh a' cur romhaibh a dhèanamh le na daoine seo.

³⁶ Oir ro na làithean seo dh'èirich Tadeus, ag agairt gum b' e cuideigin a bh' ann fhèin, agus cheangail àireamh dhaoine, mu thimcheall air ceithir cheud, iad fhèin ris. Chaidh esan a mharbhadh agus chaidh iadsan a dh'aontaich ris a sgapadh is thàinig iad gu neoni.

³⁷ Às a dhèidh, dh'èirich Iùdas an Galilèach, ann an làithean a' chunntais‑sluaigh, agus tharraing e air falbh mòran dhaoine. Chaidh cur às dhàsan cuideachd agus chaidh iadsan uile a dh'aontaich leis a sgapadh.

³⁸ Mar sin san t‑suidheachadh againne, tha mi ag ràdh ribh, fanaibh air falbh o na daoine seo agus leigibh leotha, oir mas ann o dhaoine a tha am plana no an obair seo, thèid cur às dha.

³⁹ Ach mas ann o Dhia a tha e, chan urrainn dhuibhse an tilgeil sìos, gun fhios nach biodh sibh air ur faighinn a' cogadh an aghaidh Dhè!” Mar sin dh'aontaich iad ris,

⁴⁰ agus nuair a bha iad air na h‑abstoil a ghairm a‑steach, dhochainn iad iad agus dh'òrdaich iad dhaibh gun bruidhinn ann an ainm Ìosa, agus leig iad às iad.

⁴¹ Mar sin dh'fhàg iadsan làthaireachd na Comhairle, a' dèanamh gàirdeachais a chionn 's gun deach an cunntadh airidh air eas‑urram fhulang airson an ainm.

⁴² Agus gach latha, san teampall 's o thaigh gu taigh, cha do sguir iad a theagasg is a' shearmonachadh an deagh sgeòil – Ìosa, an Crìosd.