Gnìomharan 4 - An Tiomnadh Nuadh anns an Eadar-Theangachadh Ùr Gàidhlig 2017

Peadar agus Eòin mu choinneamh na Comhairle

¹ Agus fhad 's a bha iad a' bruidhinn ris an t‑sluagh, thàinig na sagartan is caiptean an teampaill is na Sadusaich thuca,

² fo dhragh mòr a chionn 's gun robh iad a' teagasg an t‑sluaigh agus a' searmonachadh aiseirigh o na mairbh tre Ìosa.

³ Agus chuir iad an grèim iad is chuir iad ann am prìosan iad gus an ath latha, oir bha am feasgar ann mu thràth.

⁴ Ach chreid mòran dhiubhsan a bh' air am facal a' chluinntinn; agus thàinig àireamh nan daoine gus a bhith mu thimcheall air còig mìle.

⁵ Air an ath latha chruinnich na riaghladairean is na seanairean is na sgrìobhaichean aca ann an Ierusalem,

⁶ agus Annas an t‑àrd‑shagart is Caiaphas is Eòin is Alecsander is iadsan uile a bha de theaghlach an àrd‑shagairt.

⁷ Agus nuair a bha iad air an suidheachadh sa mheadhan dh'fhaighnich iad, “Dè an cumhachd, no dè an t‑ainm leis an do rinn sibh seo?”

⁸ An uair sin, làn dhen Spiorad Naomh, thuirt Peadar riutha, “A riaghladairean is èildearan an t‑sluaigh,

⁹ ma tha sinne an‑diugh air ar ceasnachadh mu dheagh ghnìomh a chaidh a dhèanamh do chrioplach, a thaobh ciamar a chaidh a shlànachadh,

¹⁰ biodh e aithnichte dhuibhse uile is do shluagh Israeil gu lèir gur ann le ainm Ìosa Crìosd o Nàsaret, a cheus sibhse, a thog Dia o na mairbh – le ainm‑san tha an duine seo na sheasamh slàn an seo nur làthair‑se.

¹¹ Is esan “‘a' chlach a chaidh a dhiùltadh leibhse, an luchd‑togail, a thàinig gus a bhith na clach‑cinn an oisein.’

¹² “Agus chan eil slàinte ann an neach sam bith eile; oir chan eil ainm sam bith eile fo nèamh air a thoirt am measg dhaoine leis am feum sinn a bhith air ar sàbhaladh.”

¹³ A‑nis nuair a chunnaic iad dànadas Pheadair is Eòin, agus a thuig iad gum b' e daoine gun fhoghlam agus cumanta a bh' annta, ghabh iad iongnadh. Agus dh'aithnich iad gun robh iadsan air a bhith còmhla ri Ìosa.

¹⁴ Ach a' faicinn an duine a chaidh a leigheas na sheasamh còmhla riutha, cha robh sìon aca ri ràdh mar fhreagairt.

¹⁵ Ach nuair a bha iad air òrdachadh dhaibh a' Chomhairle fhàgail, rinn iad còmhradh ri chèile,

¹⁶ ag ràdh, “Dè a nì sinn leis na daoine seo? Oir tha e aithnichte gun deach comharra mìorbhaileach a dhèanamh tromhpa – follaiseach do luchd‑àiteachaidh Ierusaleim gu lèir – agus chan urrainn dhuinne sin àicheadh.

¹⁷ Ach airson 's nach tèid seo a sgaoileadh nas fhaide buileach am measg an t‑sluaigh, thugamaid rabhadh dhaibh gun a bhith a' bruidhinn tuilleadh ri neach sam bith anns an ainm seo.”

¹⁸ Agus ghairm iad orra agus dh'àithn iad dhaibh gun a bhith a' bruidhinn no a' teagasg idir ann an ainm Ìosa.

¹⁹ Ach fhreagair Peadar is Eòin iad, “A bheil e ceart ann am fianais Dhè èisteachd ribhse seach ri Dia? Breithnichibh,

²⁰ oir chan urrainn dhuinne ach na rudan a chunnaic is a chuala sinn innse.”

²¹ Agus nuair a bha iad air barrachd maoidhidh a dhèanamh orra, leig iad às iad, gun dòigh fhaighinn air am peanasachadh, air sgàth an t‑sluaigh, oir bha iad uile a' moladh Dhè airson an rud a thachair.

²² Oir bha an duine air an deach an comharra leigheis a dhèanamh còrr is ceathrad bliadhna a dh'aois.

Ùrnaigh nan Creidmheach

²³ Nuair a chaidh an leigeil às, thàinig iad gu 'n cuideachd fhèin, agus thug iad cunntas air a h‑uile rud a bha na h‑àrd‑shagartan is na h‑èildearan air a ràdh riutha.

²⁴ Agus nuair a chuala iad seo, a dh'aon inntinn thog iad suas an guth ri Dia agus thuirt iad, “A Thighearna, is tusa a rinn nèamh is talamh is a' mhuir is a h‑uile sìon a th' annta,

²⁵ a thuirt leis an Spiorad Naomh, tro bheul ar n‑athar Daibhidh, do sheirbheiseach: “‘Carson a ghabh na Cinnich an caoch, agus a rinn an sluagh innleachd dhìomhain?’

²⁶ Sheas rìghrean na talmhainn suas, agus chaidh na riaghladairean a chruinneachadh còmhla an aghaidh an Tighearna, agus an aghaidh an Aoin Ungte aige.'

²⁷ “Oir gu fìrinneach sa bhaile seo bha, air an cruinneachadh còmhla an aghaidh do sheirbheisich naoimh Ìosa, a dh'ung thu, an dà chuid Herod is Pontius Pìlat, còmhla ris na Cinnich is slòigh Israeil,

²⁸ a dhèanamh ge b' e dè a ro‑òrdaich do làmh 's do rùn a thachradh.

²⁹ A‑nis, a Thighearna, thoir aire dha na maoidhidhean aca agus ceadaich dhad sheirbheisich gum bruidhinn iad d' fhacal leis a h‑uile dànachd,

³⁰ fhad 's a shìneas tu a‑mach do làmh airson leigheas, agus a tha comharraidhean is iongantasan air an dèanamh trod sheirbheiseach naomh Ìosa.”

³¹ Agus nuair a bha iad air ùrnaigh a dhèanamh, bha an t‑àite san robh iad cruinn air a chrathadh, agus chaidh iad uile a lìonadh leis an Spiorad Naomh agus dh'aithris iad facal Dhè le dànachd.

Na Creidmhich a' Roinn an Cuid

³² Agus bha a' chuideachd dhiubhsan a chreid de dh'aon chridhe is anam, agus cha tuirt neach sam bith gum bu leis fhèin a bha gin dhe na rudan a bu sheilbh dha, ach bha a h‑uile rud aca gu coitcheann.

³³ Agus le sàr‑chumhachd bha na h‑abstoil a' toirt fianais do dh'aiseirigh an Tighearna Ìosa, agus bha mòr‑ghràs orra uile.

³⁴ Cha robh aon neach ann an dìth nam measg, oir na h‑uimhir 's aig an robh fearainn no taighean, reic iad iad agus, a' toirt leotha luach nan rudan a chaidh a reic,

³⁵ shìn iad e aig casan nan abstol agus bha e air a roinn do gach neach mar a bha feum aige air.

³⁶ Mar sin reic Iòsaph, dhan tug na h‑abstoil an t‑ainm Barnabas (a tha a' ciallachadh ‘Mac na Cofhurtachd’) Lèbhitheach dham bu dùthaich Cìopras,

³⁷ achadh a bh' aige agus thug e an t‑airgead leis agus chuir e aig casan nan abstol e.