Gnìomharan 20 - An Tiomnadh Nuadh anns an Eadar-Theangachadh Ùr Gàidhlig 2017

Tro Mhacedònia agus tron Ghrèig

¹ Às dèidh dhan ùpraid sgur, chuir Pòl fios air na deisciobail, agus às dèidh am misneachadh, dh'fhàg e soraidh leotha agus chaidh e air falbh a Mhacedònia.

² Nuair a bha e air a dhol tro na sgìrean sin agus air am misneachadh le mòran bhriathran, thàinig e dhan Ghrèig.

³ Chuir e seachad trì mìosan an sin. A chionn 's gun robh na h‑Iùdhaich air innleachd a dhèanamh na aghaidh agus gun robh e gus seòladh gu Siria, chuir e roimhe tilleadh tro Mhacedònia.

⁴ Chaidh Sopater o Bherèa, mac Phirois, còmhla ris; agus dhe na Tesalònianaich, Aristarchus is Secundus; agus Gaius o Dherbe, agus Timòteus; agus de mhuinntir na h‑Àisia, Tichicus is Trophimus.

⁵ Chaidh iad seo air adhart air thoiseach agus bha iad a' feitheamh oirnn ann an Tròas.

⁶ Ach sheòl sinne air falbh o Philipi às dèidh làithean an Arain Neo‑Ghortaichte, agus ann an còig làithean thàinig sinn thucasan aig Tròas, far an do dh'fhan sinn airson seachd làithean.

Eutichus air a Thogail o na Mairbh aig Tròas

⁷ Air a' chiad latha dhen t‑seachdain, nuair a bha sinn cruinn còmhla airson aran a bhriseadh, bhruidhinn Pòl riutha, a' cur roimhe fàgail air an ath latha, agus lean e air a' bruidhinn gu meadhan‑oidhche.

⁸ Agus bha tòrr lampaichean san t‑seòmar uachdarach far an robh sinn cruinn.

⁹ Agus thuit duine òg dham b' ainm Eutichus, a bha na shuidhe aig an uinneig, na throm‑chadal fhad 's a chùm Pòl air a bruidhinn. Agus fo bhuaidh a' chadail, thuit e sìos on treas làr agus chaidh a thogail marbh.

¹⁰ Ach chaidh Pòl sìos, agus shìn e e fhèin air, agus ga ghabhail na ghàirdeanan, thuirt e, “Na bithibh fo dhragh, oir tha a bheatha ann!”

¹¹ Agus nuair a bha Pòl air a dhol suas agus air aran a bhriseadh agus air ithe, rinn e còmhradh leotha airson ùine fhada, gu briseadh an latha, agus mar sin dh'fhalbh e.

¹² Agus thug iad leotha beò an duine òg, agus cha b' ann gu beag a bha iad air an cofhurtachadh.

Soraidh Phòil dha na h‑Èildearan Ephèsianach

¹³ Ach a' dol air adhart chun an t‑soithich, sheòl sinn airson Asos, a' cur romhainn Pòl a ghabhail air bòrd às a sin, oir bha esan air a chur an òrdugh mar sin, a' cur roimhe a dhol air a chois fhèin.

¹⁴ Agus nuair a choinnich e rinn aig Asos, thug sinn air bòrd e agus chaidh sinn gu Mitilène.

¹⁵ Agus a' seòladh às a sin ràinig sinn air an latha a lean mu choinneamh Chiois; an ath latha chaidh sinn thairis gu Samos, agus an ath latha thàinig sinn gu Miletus.

¹⁶ Oir bha Pòl air cur roimhe seòladh seachad air Ephesus, airson 's nach fheumadh e ùine a chosg ann an Àisia, oir bha e a' dèanamh cabhaig gus a bhith ann an Ierusalem, ma bha e an comas, air latha na Caingis.

¹⁷ O Mhiletus chuir e fios gu Ephesus is ghairm e èildearan na h‑eaglaise thuige.

¹⁸ Agus nuair a thàinig iad thuige, thuirt e riutha, “Is aithne dhuibhse sib' fhèin mar a bha mi beò nur measg fad na h‑ùine on a' chiad latha a chuir mi cas air Àisia,

¹⁹ a' dèanamh seirbheis dhan Tighearna le gach uile irioslachd is le deòir is le deuchainnean a thachair dhomh tro innleachdan nan Iùdhach;

²⁰ mar nach do tharraing mi air ais o bhith a' cur an cèill dhuibh rud sam bith a bha feumail, agus gur teagasg gu poblach o thaigh gu taigh,

²¹ a' toirt fianais an dà chuid do dh'Iùdhaich is do Ghreugaich mu aithreachas a thaobh Dhè agus mu chreideamh nar Tighearna Ìosa Crìosd.

²² “Agus a‑nis, seallaibh, tha mi a' dol gu Ierusalem, air mo cho‑èigneachadh leis an Spiorad, gun fhios agam dè a thachras dhomh an sin,

²³ ach gu bheil an Spiorad Naomh a' toirt fianais dhomh anns gach baile gu bheil cuibhrichean is fulangasan a' feitheamh orm.

²⁴ Ach chan eil mi a' cunntadh mo bheatha mar luachmhor no prìseil dhomh fhèin, ma thèid agam a‑mhàin air mo thuras agus a' mhinistrealachd a fhuair mi on Tighearna Ìosa a chrìochnachadh, a' toirt fianais shòlaimte mu shoisgeul gràs Dhè.

²⁵ “Agus a‑nis, seallaibh, is aithne dhomh nach fhaic duine agaibhse m' aghaidh‑sa a‑rithist, ged a chaidh mi mun cuairt a' searmonachadh na rìoghachd nar measg.

²⁶ Mar sin, tha mi a' toirt fianais dhuibh air an latha seo gu bheil mi neoichiontach on fhuil agaibh uile.

²⁷ Oir cha do tharraing mi air ais o chomhairle Dhè gu lèir a chur an cèill dhuibh.

²⁸ Cumaibh deagh aire oirb' fhèin 's air an treud gu lèir, anns an do rinn an Spiorad Naomh nur fir‑coimheid sibh gus eaglais Dhè a bhuachailleachd, a cheannaich e le fhuil fhèin.

²⁹ Is aithne dhomh, às dèidh dhomh fàgail, gun tig madaidhean‑allaidh garga nur measg, nach caomhain an treud;

³⁰ agus o ur measg fhèin gun èirich daoine ag ràdh rudan fiara, airson nan deisciobal a tharraing air falbh às an dèidh.

³¹ Mar sin fanaibh faireil, a' cuimhneachadh nach do sguir mise a latha 's a dh'oidhche fad thrì bliadhna air gach aon agaibh earalachadh le deòir.

³² “Agus a‑nis tha mi gur n‑earbsadh do Dhia agus do dh'fhacal a ghràis‑san, a tha comasach air ur daingneachadh is oighreachd a thoirt dhuibh am measg na feadhna sin uile a th' air an naomhachadh.

³³ Cha do shanntaich mi airgead no òr no aodach neach sam bith.

³⁴ Tha fios agaib' fhèin gun do fhritheil na làmhan seo dha na feuman a bh' agamsa is acasan a bha còmhla rium.

³⁵ Anns a h‑uile sìon sheall mi dhuibh gur ann tro bhith ag obair cruaidh san dòigh seo a dh'fheumas sinn iadsan a tha lag a chuideachadh agus cuimhneachadh air briathran an Tighearna Ìosa, mar a thuirt e fhèin, ‘Tha e nas beannaichte rud a thoirt seachad na a ghabhail.’”

³⁶ Agus nuair a bha e air na rudan sin a ràdh, chaidh e air a ghlùinean, agus rinn e ùrnaigh còmhla riutha uile.

³⁷ Agus bha mòran caoinidh nam measg gu lèir; chuir iad an gàirdeanan mu amhaich Phòil agus bha iad ga phògadh –

³⁸ fo àmhghar gu sònraichte air sgàth an fhacail a bha e air a ràdh, nach fhaiceadh iad aghaidh‑san a‑rithist. Agus chaidh iad còmhla ris chun an t‑soithich.