Gnìomharan 2 - An Tiomnadh Nuadh anns an Eadar-Theangachadh Ùr Gàidhlig 2017

An Spiorad Naomh a' Tighinn aig a' Chaingis

¹ Nuair a thàinig latha na Caingis, bha iad uile còmhla san aon àite.

² Agus gu grad thàinig o nèamh fuaim mar dhian‑ruith gaoithe chumhachdaich, agus lìon i an taigh gu lèir anns an robh iad nan suidhe.

³ Agus nochd teangannan sgoilte mar theine riutha agus shìn e air gach aon dhiubh.

⁴ Agus bha iad uile air an lìonadh leis an Spiorad Naomh agus thòisich iad air bruidhinn ann an teangannan eile, mar a thug an Spiorad comas còmhraidh dhaibh.

⁵ A‑nis bha Iùdhaich a' fuireach ann an Ierusalem, daoine cràbhach bhon a h‑uile nàisean fo nèamh.

⁶ Agus nuair a chaidh am fuaim seo a dhèanamh, thàinig an sluagh còmhla, agus chuir seo troimh‑a‑chèile iad a chionn 's gun robh gach aon dhiubh gan cluinntinn a' bruidhinn na chànan fhèin.

⁷ Agus bha iad uile fo iongnadh 's fo mhòr‑iongantas, ag ràdh, “Èist, nach e Galilèaich a th' annta sin uile a tha a' bruidhinn?

⁸ Agus ciamar a tha sinne gan cluinntinn, gach aon againn nar cànan fhèin, anns an deach ar breith?

⁹ Partaich is Medich is Elamaich is luchd‑còmhnaidh Mhesopotamia, Iudèa is Chapadòcia, Phontuis is Àisia,

¹⁰ Phrigia is Phamphilia, na h‑Èipheit is na pàirtean de Libia timcheall Chirène, agus luchd‑tadhail on Ròimh,

¹¹ an dà chuid Iùdhaich is proseilitich, Cretich is Arabaich – tha sinn gan cluinntinn a' bruidhinn nar teangannan fhèin mu ghnìomhan cumhachdach Dhè.”

¹² Agus bha iad uile fo iongnadh agus fo dhragh mòr, ag ràdh ri càch‑a‑chèile, “Dè a tha seo a' ciallachadh?”

¹³ Ach rinn feadhainn eile magadh ag ràdh, “Tha iad làn de dh'fhìon ùr.”

Peadar a' Bruidhinn ris an t‑Sluagh

¹⁴ Ach, a' seasamh còmhla ris an aon fhear deug, thog Peadar a ghuth agus thuirt e riutha, “Fheara Iudèa, agus a luchd‑còmhnaidh Ierusaleim uile, biodh fios agaibh air a seo, agus èistibh rim bhriathran‑sa.

¹⁵ Oir chan eil iad seo air mhisg, mar a tha sibhse a' saoilsinn, o nach eil e ach naoi uairean sa mhadainn!

¹⁶ Ach is e seo an rud a chaidh a ràdh leis an fhàidh Ioel:

¹⁷ “‘Agus tachraidh anns na làithean deireannach, tha Dia ag ràdh, gun dòirt mise a‑mach dhem Spiorad air a h‑uile feòil; agus nì ur mic is ur nigheanan fàidheadaireachd, agus chì ur fir òga seallaidhean is bidh ur seann daoine ag aisling aislingean.

¹⁸ Is fiù 's air mo sheirbheisich agus air mo bhana‑sheirbheisich anns na làithean sin dòirtidh mise a‑mach mo Spiorad, agus nì iad fàidheadaireachd.

¹⁹ Agus seallaidh mise iongantasan anns na nèamhan shuas agus comharraidhean air an talamh shìos: fuil, agus teine, agus smùid de cheò.

²⁰ Bidh a' ghrian air a tionndadh gu dorchadas agus a' ghealach gu fuil, mun tig latha mòr agus glòrmhor an Tighearna.

²¹ Agus tachraidh gun tèid a h‑uile neach a ghairmeas air ainm an Tighearna a shàbhaladh.’

²² “Fheara Israeil, èistibh ris na briathran seo: Ìosa o Nàsaret, duine a chaidh a dhearbhadh le Dia dhuibhse, le obraichean cumhachdach is iongantasan is comharraidhean, a rinn Dia troimhesan nur measg‑se, mar tha fios agaib' fhèin,

²³ an t‑Ìosa seo, a chaidh a thoirt thairis le comhairle chinntich agus ro‑eòlas Dhè, ga cheusadh le làmhan dhaoine mì‑riaghailteach, mharbh sibh e.

²⁴ Ach thog Dia suas e, ga shaoradh o phiantan a' bhàis, a chionn 's nach robh e an comas dha a bhith air a chumail leis a' bhàs.

²⁵ Oir thuirt Daibhidh ma dheidhinn: “‘Chunnaic mi an Tighearna an‑còmhnaidh mum choinneamh, oir tha e aig mo dheas‑làimh, airson 's nach tèid mo chrathadh.

²⁶ Mar sin bha mo chridhe toilichte agus rinn mo theanga gàirdeachas; agus bidh m' fheòil cuideachd beò ann an dòchas.

²⁷ Oir chan fhàg thu m' anam ann an Ifrinn, cha mhotha a leigeas tu led Aon Naomh gum faic e truaillidheachd.

²⁸ Tha thu air slighean na beatha a dhèanamh aithnichte dhòmhsa; lìonaidh tu le aoibhneas mi led làthaireachd.’

²⁹ “A bhràithrean, faodaidh mi a ràdh ribh le dànadas mun phrìomh‑athair Daibhidh, gun do bhàsaich e is gun deach adhlacadh, agus gu bheil an tuam aige againn gus an latha an‑diugh.

³⁰ Agus, mar sin, a chionn 's gum b' e fàidh a bh' ann agus e fiosrach gun robh Dia air bòideachadh le mionnan dha gun suidhicheadh e aon dhe a shliochd air a rìgh‑chathair‑san,

³¹ chunnaic e ro‑làimh is bhruidhinn e mu dheidhinn aiseirigh Chrìosd, nach robh e air a thrèigsinn do dh'Ifrinn; cha mhotha a chunnaic fheòil‑san truaillidheachd.

³² An t‑Ìosa seo thog Dia suas, agus dhe sin tha sinne uile nar fianaisean.

³³ Mar sin, air àrdachadh gu deas‑làimh Dhè agus air gealladh an Spioraid Naoimh fhaighinn on Athair, tha e air an rud seo a dhòrtadh a‑mach a tha sibhse a' faicinn agus a' cluinntinn.

³⁴ Oir cha deach Daibhidh suas dha na nèamhan, ach tha esan e fhèin ag ràdh: “‘Thuirt an Tighearna rim Thighearna: “Suidh aig mo dheas‑làimh

³⁵ gus an cuir mi do nàimhdean nan stòl fod chasan.”’

³⁶ “Mar sin biodh fios cinnteach aig taigh Israeil gu lèir gun do rinn Dia an dà chuid, na Thighearna agus na Chrìosd, an t‑Ìosa seo a cheus sibhse.”

³⁷ A‑nis nuair a chuala iad seo, bha iad air an lot chun a' chridhe, agus thuirt iad ri Peadar 's ris a' chòrr dhe na h‑abstoil, “A bhràithrean, dè a nì sinn?”

³⁸ Agus thuirt Peadar riutha, “Dèanaibh aithreachas agus bithibh air ur baisteadh, gach aon agaibh ann an ainm Ìosa Crìosd airson mathanas ur peacaidhean, agus gheibh sibh tiodhlac an Spioraid Naoimh.

³⁹ Oir tha an gealladh dhuibhse agus dhur cloinn agus dha na h‑uile a tha fad' às, na h‑uiread 's a ghairmeas an Tighearna ar Dia thuige fhèin.”

⁴⁰ Agus le mòran bhriathran eile thug e fianais agus chùm e air gan earalachadh, ag ràdh, “Sàbhailibh sib' fhèin on ghinealach choirbte seo.”

⁴¹ Mar sin bha iadsan a ghabh ri fhacal‑san air am baisteadh, agus chaidh mu thrì mìle anam a chur riutha an latha sin.

Co‑Chomann nan Creidmheach

⁴² Agus choisrig iad iad fhèin do theagasg nan abstol agus do cho‑chomann, agus do bhriseadh arain agus do dh'ùrnaighean.

⁴³ Agus thàinig eagal air a h‑uile h‑anam agus bha mòran mhìorbhailean is chomharraidhean gan dèanamh leis na h‑abstoil.

⁴⁴ Agus bha iadsan uile a chreid anns an aon àite agus bha a h‑uile rud aca gu coitcheann.

⁴⁵ Agus bha iad a' reic an saidhbhreis is am maoin agus a' roinn seo am measg nan uile, a rèir 's mar a bha feum aig gach neach.

⁴⁶ Agus latha às dèidh latha, a' leantainn orra a dh'aon inntinn san teampall, agus a' briseadh arain o thaigh gu taigh, ghabh iad am biadh le cridheachan aoibhneach is iriosal,

⁴⁷ a' moladh Dhè agus iad le fàbhar aca on t‑sluagh gu lèir. Agus chuir an Tighearna iadsan a bha gan teàrnadh ris an àireamh aca latha às dèidh latha.