Gnìomharan 19 - An Tiomnadh Nuadh anns an Eadar-Theangachadh Ùr Gàidhlig 2017

Pòl ann an Ephesus

¹ Agus thachair, fhad 's a bha Apollos aig Corint, gun deach Pòl tro sgìrean àrd na tìre agus thàinig e gu Ephesus. An sin fhuair e cuid de dheisciobail.

² Agus thuirt e riutha, “An d' fhuair sibh an Spiorad Naomh nuair a chreid sibh?” Agus thuirt iadsan ris, “Cha d' fhuair, cha chuala sinne fiù 's gu bheil Spiorad Naomh ann.”

³ Agus thuirt e, “Dè ma‑thà am baisteadh dhan deach ur baisteadh?” Thuirt iad, “Do bhaisteadh Eòin.”

⁴ Agus thuirt Pòl, “Bhaist Eòin le baisteadh an aithreachais, a' cantainn ris an t‑sluagh creidsinn san fhear a bha a' tighinn às a dhèidh, is e sin Ìosa.”

⁵ Nuair a chuala iad seo, chaidh am baisteadh ann an ainm an Tighearna Ìosa.

⁶ Agus nuair a bha Pòl air a làmhan a shìneadh orra, thàinig an Spiorad Naomh orra, agus thòisich iad air bruidhinn ann an teangannan agus air fàidheadaireachd.

⁷ Bha mu dhà fhear dheug ann gu lèir.

⁸ Agus chaidh esan a‑steach dhan t‑sionagog agus bhruidhinn e gu dàn fad thrì mìosan, a' reusanachadh agus a' cur ìmpidh orra mu rìoghachd Dhè.

⁹ Ach nuair a dh'fhàs cuid rag agus nach do chreid iad, a' bruidhinn gu h‑olc mun t‑Slighe mu choinneamh an t‑sluaigh, tharraing e air ais uapa agus thug e na deisciobail leis, a' reusanachadh gach latha ann an talla‑òraid Thirannuis.

¹⁰ Lean seo airson dà bhliadhna, air chor is gun cuala luchd‑còmhnaidh na h‑Àisia gu lèir facal an Tighearna, an dà chuid Iùdhaich agus Greugaich.

¹¹ Bha Dia a' dèanamh mhìorbhailean iongantach le làmhan Phòil,

¹² air chor is gun robh fiù 's nèapraigean no aparain a bh' air beantainn dha chraiceann air an giùlain air falbh thucasan a bha tinn, is dh'fhàg an tinneasan iad agus thàinig na spioradan neòghlan a‑mach asta.

¹³ Ach ghabh cuid dhen mhuinntir Iùdhach, luchd tilgeil a‑mach dheamhan, a bha a' dol o àite gu àite, os làimh ainm an Tighearna Ìosa ainmeachadh thairis orrasan san robh na spioradan olca, ag ràdh, “Tha mi gar cur fo mhionnan tro Ìosa, a tha Pòl a' searmonachadh.”

¹⁴ Bha seachdnar mhac Scebha, àrd‑shagart Iùdhach, a' dèanamh seo.

¹⁵ Ach fhreagair an spiorad olc iad, “Ìosa is aithne dhomh, agus tha eòlas agam air Pòl, ach cò a th' annaibhse?”

¹⁶ Agus leum an duine anns an robh an spiorad olc orra, fhuair e làmh‑an‑uachdair orra agus thug e buaidh orra, air chor is gun do theich iad a‑mach às an taigh sin rùisgte agus air an leòn.

¹⁷ Fhuair uile luchd‑còmhnaidh Ephesuis eòlas air a seo, an dà chuid Iùdhaich is Greugaich. Agus thuit eagal orra uile, agus bha ainm an Tighearna Ìosa air àrd‑mholadh.

¹⁸ Thàinig mòran cuideachd dhiubhsan a chreid, ag aideachadh 's ag innse an gnìomhan.

¹⁹ Agus thug grunn dhiubhsan a bh' air draoidheachd a chur an gnìomh an leabhraichean cruinn còmhla agus loisg iad ann am fianais nan uile iad. Agus chunntais iad an luach aca is fhuair iad a‑mach gun tàinig e gu caogad mìle bonn airgid.

²⁰ Mar sin chùm facal an Tighearna air a' fàs agus a' buadhachadh gu cumhachdach.

²¹ A‑nis às dèidh dha na rudan seo a bhith air an crìochnachadh, chuir Pòl roimhe san Spiorad gabhail seachad tro Mhacedònia is Achaiah agus a dhol gu Ierusalem, ag ràdh, “Às dèidh dhomh a bhith an sin, feumaidh mi cuideachd an Ròimh fhaicinn.”

²² Agus às dèidh dha dithis dhen luchd‑cuideachaidh aige a chur do Mhacedònia – Timòteus is Erastus – dh'fhan esan e fhèin ann an Àisia airson greis.

An Aimhreit ann an Ephesus

²³ Mun àm sin dh'èirich buaireadh nach bu bheag mun t‑Slighe.

²⁴ Oir thug duine dham b' ainm Demetrius, ceàrd‑airgid, a rinn ionadan‑coisrigte airgid do dh'Artemis, malairt nach bu bheag dhan luchd‑ciùird.

²⁵ Chruinnich e còmhla iad sin, leis an luchd‑obrach a bh' ann an ciùird ionann riutha, agus thuirt e, “Fheara, tha fios agaibh gur ann on chiùrd seo a tha ar beairteas againne.

²⁶ Agus tha sibh a' faicinn is a' cluinntinn gu bheil – chan ann a‑mhàin ann an Ephesus ach cha mhòr ann an Àisia gu lèir – am Pòl seo air ìmpidh a chur air sluagh mòr dhaoine 's air an tionndadh air falbh, ag ràdh nach diathan iad idir a tha dèante le làmhan.

²⁷ Agus tha cunnart ann, chan e a‑mhàin gun tuiteadh a chiùird seo againne ann am mì‑chliù, ach cuideachd gum biodh teampall na ban‑dè mòire air a mheas mar neoni, agus fiù 's gun tèid a cur o chathair a mòrachd‑se, ise dha bheil Àisia uile agus an saoghal a' dèanamh adhraidh.”

²⁸ Nuair a chuala iadsan seo chaidh an lìonadh le feirg is thòisich iad ag èigheach, “Is mòr Artemis nan Ephèsianach!”

²⁹ Bha am baile air a lìonadh leis an aimhreit, agus ruith iad le aon toil dhan taigh‑chluiche, a' tarraing Ghaiuis is Aristarchuis leotha, companaich‑siubhail Phòil o Mhacedònia.

³⁰ Ach nuair a mhiannaich Pòl a dhol a‑steach am measg a' cho‑chruinneachaidh, cha leigeadh na deisciobail leis.

³¹ Agus chuir fiù 's cuid de riaghladairean na h‑Àisia, a bha nan caraidean dha, fios thuige agus bha iad ga earalachadh gun a dhol a‑steach dhan taigh‑chluiche.

³² A‑nis dh'èigh cuid aon rud, agus cuid rud eile, oir bha an co‑chruinneachadh troimh‑a‑chèile agus cha b' aithne dhan mhòr‑chuid dhiubh carson a bha iad air tighinn còmhla.

³³ Phiobraich cuid dhen t‑sluagh Alecsander, a bha na h‑Iùdhaich air a chur air adhart. Agus a' smèideadh le a làimh, bha Alecsander ag iarraidh dìon a dhèanamh air fhèin dhan t‑sluagh.

³⁴ Ach nuair a dh'aithnich iad gum b' e Iùdhach a bh' ann, dh'èigh iad a‑mach le aon ghuth, airson mu dhà uair a thìde, “Is mòr Artemis nan Ephèsianach!”

³⁵ Às dèidh do chlèireach a' bhaile an sluagh a shocrachadh, thuirt e, “Fheara Ephesuis, cò a th' ann dha nach aithne gur e Ephesus a tha na gleidheadair‑teampaill do dh'Artemis mhòr, agus dhen ìomhaigh naoimh a thuit a‑nuas o nèamh?

³⁶ Mar sin seach nach urrainn na rudan seo a bhith air an àicheadh, bu chòir dhuibh a bhith sàmhach agus gun rud sam bith bras a dhèanamh.

³⁷ Oir tha sibh air na daoine seo a thoirt an seo nach eil nam mèirlich teampaill no nach eil a' toirt toibheim dhar ban‑dia.

³⁸ Mar sin, ma tha gearan aig Demetrius agus aig an luchd‑ciùird an aghaidh neach sam bith, tha na cùirtean fosgailte agus tha uachdaran ann. Thoireadh iad casaidean an aghaidh càch‑a‑chèile.

³⁹ Ach ma tha sibh a' sireadh dad a bharrachd, bidh e air a rèiteachadh sa cho‑chruinneachadh laghail.

⁴⁰ Oir tha sinn ann an cunnart a bhith air ar cur fo chasaid aimhreit an‑diugh, oir chan urrainn dhuinn adhbhar a thoirt seachad airson a' chruinneachaidh mhì‑rianail seo.”

⁴¹ Agus nuair a thuirt e na rudan seo, chuir e air falbh an co‑chruinneachadh.