Gnìomharan 12 - An Tiomnadh Nuadh anns an Eadar-Theangachadh Ùr Gàidhlig 2017

Teicheadh Mìorbhaileach Pheadair on Phrìosan

¹ Mun àm sin shìn Herod an rìgh làmhan air cuid a bhuineadh dhan eaglais airson cron a dhèanamh orra.

² Agus mharbh e Seumas bràthair Eòin leis a' chlaidheamh.

³ Nuair a chunnaic e gun do thoilich seo na h‑Iùdhaich, chaidh e air adhart agus ghlac e Peadar cuideachd. B' iad làithean an Arain Neo‑Ghortaichte a bh' ann.

⁴ Agus nuair a bha e air a ghlacadh, chuir e dhan phrìosan e, ga thoirt thairis do cheithir buidhnean shaighdearan airson a ghleidheadh, a' cur roimhe a thoirt a‑mach dhan t‑sluagh às dèidh na Càisge.

⁵ Mar sin chaidh Peadar a chumail sa phrìosan, ach bha ùrnaigh dhùrachdach ga dèanamh ri Dia air a shon leis an eaglais.

⁶ A‑nis nuair a bha Herod gus a thoirt a‑mach, air an dearbh oidhche sin, bha Peadar na chadal eadar dithis shaighdearan, air a cheangal le dà shlabhraidh, agus bha luchd‑faire mu choinneamh an dorais a' geàrd a' phrìosain.

⁷ Agus seall, nochd aingeal dhen Tighearna gu grad ri thaobh, agus dheàlraich solas sa chealla. Bhuail e Peadar air a chliathaich agus dhùisg e e, ag ràdh, “Èirich gu grad!” Agus thuit na slabhraidhean far a làmhan.

⁸ Agus thuirt aingeal an Tighearna ris, “Dùin do chrios is cuir ort do chuarain.” Agus rinn e mar sin. Agus thuirt e ris, “Cuir ort d' aodach‑uachdair is lean mise.”

⁹ Agus chaidh e a‑mach is lean e e. Cha robh fios aige gun robh an rud a bha ga dhèanamh leis an aingeal fìor, ach shaoil e gun robh e a' faicinn sealladh.

¹⁰ Nuair a bha iad air a dhol seachad air a' chiad agus air an dara geàrd, thàinig iad chun a' gheata iarainn a tha a' dol chun a' bhaile. Dh'fhosgail e dhaibh leis fhèin, agus chaidh iadsan a‑mach is chaidh iad sìos aon t‑shràid, agus sa bhad dh'fhàg an t‑aingeal e.

¹¹ Nuair a thàinig Peadar thuige fhèin, thuirt e, “A‑nis tha mi cinnteach gun do chuir an Tighearna an t‑aingeal aige a‑mach agus gun do shàbhail e mi o làimh Heroid agus on a h‑uile sìon a bha an sluagh Iùdhach a' sùileachadh.”

¹² Nuair a thuig e sin, chaidh e gu taigh Màiri, màthair Eòin aig an robh Marcas mar ainm eile, far an robh mòran air cruinneachadh 's iad ag ùrnaigh.

¹³ Agus nuair a ghnog e air doras a' gheata, thàinig bana‑sheirbheiseach dham b' ainm Ròda a fhreagairt.

¹⁴ Nuair a dh'aithnich i guth Pheadair, na h‑aoibhneis cha do dh'fhosgail i an geata ach ruith i a‑steach agus dh'innis i gun robh Peadar na sheasamh aig a' gheata.

¹⁵ Thuirt iad rithe, “Tha thu às do rian.” Ach lean ise oirre a' cumail a‑mach gum b' ann mar seo a bha, ach bha iadsan ag ràdh, “'S e an t‑aingeal aige a th' ann.”

¹⁶ Ach lean Peadar air a' gnogadh, agus nuair a dh'fhosgail iad an doras, chunnaic iad e agus bha iad fo iongnadh.

¹⁷ Ach a' smèideadh riutha le a làimh gum biodh iad sàmhach, chuir e an cèill dhaibh mar a bha an Tighearna air a thoirt às a' phrìosan. Agus thuirt e, “Innsibh na rudan seo do Sheumas agus dha na bràithrean.” An uair sin dh'fhàg e agus chaidh e a dh'àite eile.

¹⁸ A‑nis nuair a thàinig an latha, cha bu bheag am buaireadh am measg nan saighdearan a thaobh dè a thachair do Pheadar.

¹⁹ Agus às dèidh do Herod a shireadh agus nach d' fhuair e e, cheasnaich e an luchd‑faire agus thug e òrdugh gum bu chòir an cur gu bàs. An uair sin chaidh Herod sìos o Iudèa gu Cesarèa, agus dh'fhuirich e an sin.

Bàs Heroid

²⁰ A‑nis bha e fìor fheargach le sluagh Thìruis agus Shìdoin, agus thàinig iad thuige a dh'aon inntinn, agus às dèidh dhaibh Blastus, seòmradair an rìgh, a thoirt a thaobh, dh'iarr iad sìth, a chionn 's gun robh an tìr acasan an eisimeil tìr an rìgh airson biadh.

²¹ Air an latha a chaidh a shuidheachadh chuir Herod na trusgain rìoghail aige air, ghabh e an t‑àite‑suidhe aige air cathair a' bhreitheanais, agus lìbhrig e òraid dhaibh.

²² Agus bha an sluagh ag èigheach, “Guth dè, agus chan e guth duine!”

²³ Sa bhad bhuail aingeal dhen Tighearna sìos e, a chionn 's nach tug e a' ghlòir do Dhia, agus chaidh ithe le cnuimhean is chaidh an deò às.

²⁴ Ach chùm facal Dhè air a' fàs is a' dol am meud.

²⁵ Agus thill Barnabas is Saul o Ierusalem, nuair a bha iad air a' mhisean aca a choileanadh, a' toirt leotha Eòin, dham b' ainm eile Marcas.