Gnìomharan 11 - An Tiomnadh Nuadh anns an Eadar-Theangachadh Ùr Gàidhlig 2017

Peadar a' Mìneachadh a Ghnìomhan

¹ A‑nis chuala na h‑abstoil agus na bràithrean a bh' air feadh Iudèa gun robh na Cinnich cuideachd air gabhail ri facal Dhè.

² Mar sin nuair a chaidh Peadar suas gu Ierusalem rinn iadsan a bha dhen timcheall‑ghearradh connspaid ris, ag ràdh,

³ “Chaidh thu gu daoine nach robh air an timcheall‑ghearradh agus dh'ith thu còmhla riutha.”

⁴ Ach thòisich Peadar agus mhìnich e dhaibh gu h‑òrdail e.

⁵ “Bha mi ann am baile Iopa ag ùrnaigh, agus ann an neul chunnaic mi sealladh, rudeigin mar shiota mòr a' tighinn a‑nuas, air a leigeil sìos o nèamh le a cheithir oiseanan, agus thàinig e a‑nuas thugam.

⁶ A' geur‑amharc air, thug mi an aire do bheathaichean ceithir‑chasach na talmhainn is dha na h‑ainmhidhean fiadhaich is do shnàgairean is do dh'eòin an adhair.

⁷ Agus chuala mi guth ag ràdh rium, ‘Èirich, a Pheadair. Marbh is ith.’

⁸ “Ach thuirt mise, ‘Cha dèan, a Thighearna; oir cha deach sìon a bha truaillte no neòghlan riamh a‑steach nam bheul‑sa.’

⁹ Ach fhreagair an guth an dara h‑uair, ‘An rud a rinn Dia glan, na gabh thusa truaillte air.’

¹⁰ Thachair seo trì tursan, agus an uair sin chaidh a h‑uile rud a tharraing suas a‑rithist do nèamh.

¹¹ “Agus seallaibh, aig a' mhòmaid sin fhèin sheas triùir fhear aig an taigh san robh sinn, a chaidh a chur thugam o Chesarèa.

¹² Agus thuirt an Spiorad rium a dhol còmhla riutha, gun bhreith a thoirt. Thàinig an sianar bhràithrean seo cuideachd còmhla rium, agus chaidh sinn a‑steach do thaigh an duine.

¹³ Agus dh'innis e dhuinn mar a bha e air an t‑aingeal fhaicinn na sheasamh na thaigh agus ag ràdh, ‘Cuir daoine gu Iopa, agus cuir a dh'iarraidh Shìmoin, ris an canar Peadar;

¹⁴ cuiridh esan an cèill teachdaireachd dhut leis am bi thu air do shàbhaladh, thusa agus do theaghlach gu lèir.’

¹⁵ “Nuair a thòisich mi air bruidhinn, thuit an Spiorad Naomh orrasan, dìreach mar a thuit e oirnne aig an toiseach.

¹⁶ Agus chuimhnich mise facal an Tighearna, mar a thuirt e, ‘Bhaist Eòin le uisge, ach bidh sibhse air ur baisteadh leis an Spiorad Naomh.’

¹⁷ Mar sin, ma thug Dia an t‑aon thiodhlac dhaibhsan 's a thug e dhuinne nuair a chreid sinne san Tighearna Ìosa Crìosd, cò mise gum b' urrainn dhomh bacadh a chur air Dia?”

¹⁸ Nuair a chuala iad na rudan seo bha iad sàmhach. Agus ghlòraich iad Dia, ag ràdh, “Mar sin, thug Dia dha na Cinnich cuideachd an t‑aithreachas a tha gu beatha.”

An Eaglais ann an Antioch

¹⁹ A‑nis shiubhail iadsan a chaidh a sgapadh, air sgàth a' gheur‑leanmhainn a dh'èirich co‑cheangailte ri Steaphan, cho fada ri Phenice is Cìopras is Antioch, gun am facal a bhruidhinn ri neach sam bith ach na h‑Iùdhaich.

²⁰ Ach bha cuid dhiubh, fir o Chìopras is o Chirène, nuair a thàinig iad gu Antioch a bhruidhinn ri na Greugaich cuideachd, a' searmonachadh an Tighearna Ìosa.

²¹ Agus bha làmh an Tighearna còmhla riutha, agus thionndaidh àireamh mhòr dhe na chreid chun an Tighearna.

²² Agus thàinig iomradh air a seo gu cluasan na h‑eaglaise ann an Ierusalem, agus chuir iad Barnabas gu Antioch.

²³ Nuair a thàinig e 's a chunnaic e gràs Dhè, bha e toilichte agus dh'earalaich e orra uile fantainn dìleas nan cridhe dhan Tighearna,

²⁴ oir b' e duine math a bh' ann, làn dhen Spiorad Naomh is de chreideamh. Agus chaidh sluagh fìor mhòr a chur ris an Tighearna.

²⁵ An uair sin chaidh Barnabas gu Tarsas a' choimhead airson Shauil,

²⁶ agus nuair a bha e air fhaighinn thug e gu Antioch e. Airson fad bliadhna choinnich iad ris an eaglais is theagaisg iad sluagh mòr dhaoine. Agus chaidh Crìosdaidhean a ghabhail air na deisciobail an toiseach ann an Antioch.

²⁷ A‑nis anns na làithean sin thàinig fàidhean a‑nuas o Ierusalem gu Antioch.

²⁸ Agus sheas aon dhiubh, dham b' ainm Agabus, suas agus rinn e aithnichte tron Spiorad gum biodh gort mhòr air feadh an t‑saoghail. (Ghabh seo àite ann an làithean Chlaudiuis.)

²⁹ Mar sin chuir na deisciobail romhpa, gach aon a rèir a chomais, gun cuireadh iad cuideachadh gu na bràithrean a bha a' fuireach ann an Iudèa.

³⁰ Agus rinn iad sin, ga chur gu na h‑èildearan le làimh Bharnabais is Shauil.