Galàtianach 4 - An Tiomnadh Nuadh anns an Eadar-Theangachadh Ùr Gàidhlig 2017

¹ A‑nis tha mi ag ràdh, cho fada 's a tha an t‑oighre na leanabh, chan eil e diofraichte ann an dòigh sam bith o sheirbheiseach, ged a tha e na thighearna de gach nì,

² ach tha e fo luchd‑gleidhidh is stiùbhardan gus an tig an t‑àm a dh'òrdaich an t‑athair.

³ Mar sin cuideachd sinne, nuair a bha sinn nar leanabanan, bha sinn ann an daorsa fo phrionnsapalan bunasach an t‑saoghail.

⁴ Ach nuair a thàinig lànachd na h‑ùine, chuir Dia a Mhac fhèin a‑mach, air a bhreith o mhnaoi, air a bhreith fon lagh,

⁵ airson 's gun saoradh e iadsan a bha fon lagh, gus am faigheadh sinne uchd‑mhacachd na cloinne.

⁶ Agus air sgàth 's gur e mic a th' annaibh, tha Dia air Spiorad a Mhic fhèin a chur nar cridheachan, ag èigheach, “Abba! Athair!”

⁷ Mar sin chan eil thu nad sheirbheiseach tuilleadh, ach nad mhac, agus ma tha thu nad mhac, tha thu nad oighre cuideachd, tro Dhia.

Cùram Phòil dha na Galàtianaich

⁸ Ge‑tà, aig an àm sin, nuair nach b' aithne dhuibh Dia, rinn sibh seirbheis mar thràillean dhaibhsan nach eil nan diathan a thaobh nàdair.

⁹ Ach a‑nis on a tha sibh air aithne a dhèanamh air Dia, no nas fheàrr, tha sibh air ur n‑aithneachadh le Dia, ciamar as urrainn dhuibh tionndadh air ais a‑rithist gu prionnsapalan bunasach an t‑saoghail – 's iad lag is gun fhiach – dham bu toigh leibh a‑rithist a bhith fo dhaorsa?

¹⁰ Bidh sibh a' cumail làithean is mìosan is ràithean is bliadhnaichean.

¹¹ Tha eagal orm air ur son gur dòcha gun do rinn mi saothair dhuibh gu dìomhain.

¹² Tha mi a' guidhe oirbh, a bhràithrean, bithibh mar a tha mise, oir tha mise cuideachd mar a tha sibhse. Cha do rinn sibh eucoir sam bith ormsa.

¹³ Tha fios agaibh gum b' ann air sgàth laigse cuirp a shearmonaich mi an soisgeul dhuibh an toiseach;

¹⁴ agus an rud sin a bha na dheuchainn dhuibh nam chorp, cha do chuir sibh ann an suarachas no fo ghràin, ach ghabh sibh rium mar aingeal Dhè, mar Chrìosd Ìosa.

¹⁵ Càite mar sin a bheil ur beannachd? Oir tha mi a' dèanamh fianais dhuibh, nam b' e is gun robh e an comas, gum biodh sibh air ur sùilean fhèin a spìonadh a‑mach 's air an toirt dhòmhsa.

¹⁶ Mar sin an deach mo dhèanamh nam nàmhaid dhuibh le bhith ag innse na fìrinn dhuibh?

¹⁷ Tha iad eudmhor mur deidhinn, ach chan ann gu math. Ach tha iad ag iarraidh ur dùnadh a‑mach airson 's gum biodh sibh eudmhor mun deidhinn fhèin.

¹⁸ Ach tha e an‑còmhnaidh math a bhith eudmhor ann an deagh dhòigh, agus chan ann an‑còmhnaidh nuair a tha mi an làthair còmhla ribh.

¹⁹ Mo chlann bheaga, dham bheil mi a‑rithist a' fulang saothair‑aiseid, gus an tèid Crìosd a dhealbh annaibh,

²⁰ b' fheàrr leam gun robh mi an làthair còmhla ribh an‑dràsta agus gun atharraichinn mo ghuth, oir tha mi ann an imcheist mur deidhinn.

Hagar agus Sara

²¹ Innsibh dhomh, sibhse lem bu mhiann a bhith fon lagh, nach eil sibh a' cluinntinn an lagh?

²² Oir tha e sgrìobhte gun robh dithis mhac aig Abrahàm, aon le bana‑thràill agus aon le mnà shaor.

²³ Ach bha fear na bana‑thràill air a bhreith a rèir na feòla, agus fear na mnà shaoir tron ghealladh.

²⁴ Tha seo a' bruidhinn gu samhlachail, oir is iad seo dà cho‑cheangal: aon dhiubh o Bheinn Shinài a tha a' breith chloinne airson daorsa; is ise Hagar.

²⁵ Oir is Hagar beinn Shinài ann an Aràibia, agus tha i a' co‑fhreagradh air an Ierusaleim a tha a‑nis ann, agus tha ise fo dhaorsa cuide ri a cloinn.

²⁶ Ach tha an t‑Ierusaleim a tha shuas saor, is ise ar màthair.

²⁷ Oir tha e sgrìobhte: “Dèan gàirdeachas a bhean neo‑thorraich, nach eil a' breith chloinne; bris a‑mach agus leig èigh, thusa nach eil a' fulang cràdh‑breith; oir is lìonmhoire clann na mnaoi aonaranaich na na mnaoi aig a bheil fear‑pòsta.”

²⁸ A‑nis a bhràithrean, tha sibhse mar a bha Ìsaac, nur cloinn a' gheallaidh.

²⁹ Ach mar – aig an àm sin – a rinn esan a rugadh a rèir na feòla geur‑leanmhainn airsan a rugadh a rèir an Spioraid, 's ann mar sin a tha e a‑nis cuideachd.

³⁰ Ach dè a tha an Sgriobtar ag ràdh? “Tilg a‑mach a' bhana‑thràill agus a mac, oir cha bhi mac na bana‑thràill idir na oighre còmhla ri mac na mnaoi saoire.”

³¹ Mar sin, a bhràithrean, cha sinne clann na bana‑thràill, ach na mnaoi saoire.