Galàtianach 3 - An Tiomnadh Nuadh anns an Eadar-Theangachadh Ùr Gàidhlig 2017

Creideamh no Cumail an Lagha

¹ Ò Ghalàtianacha amaideach! Cò a chuir draoidheachd oirbh? Fa chomhair ur sùilean bha Crìosd air a thaisbeanadh gu soilleir air a cheusadh.

² Is e seo an aon rud a tha mi ag iarraidh ionnsachadh uaibh: an d' fhuair sibh an Spiorad tro obraichean an lagha no tro èisteachd creideimh?

³ A bheil sibh cho amaideach? Às dèidh dhuibh tòiseachadh san Spiorad, a bheil sibh a‑nis air ur dèanamh foirfe leis an fheòil?

⁴ An do dh'fhuiling sibh na h‑uiread de rudan gu dìomhain – mas ann dha‑rìribh gu dìomhain a bha e?

⁵ Mar sin, a bheil esan a tha a' toirt an Spioraid dhuibh agus ag obrachadh mhìorbhailean nur measg ga dhèanamh tro obraichean an lagha, no tro èisteachd creideimh?

⁶ Eadhon mar a chreid Abrahàm Dia agus a chaidh a mheasadh dha mar fhìreantachd.

⁷ Mar sin biodh fios agaibh gur iadsan a tha dhen chreideamh a tha nam mic do dh'Abrahàm.

⁸ Agus an Sgriobtar, a' ro‑aithneachadh gum fìreanaicheadh Dia na Cinnich tro chreideamh, shearmonaich e an soisgeul ro‑làimh do dh'Abrahàm, ag ràdh, “Annadsa bidh na Cinnich gu lèir air am beannachadh.”

⁹ Mar sin tha iadsan a tha dhen chreideamh air am beannachadh còmhla ri Abrahàm, an creidmheach.

¹⁰ Oir na h‑uimhir 's a tha de dh'obraichean an lagha, tha iad fo mhallachd; oir tha e sgrìobhte, “Is mallaichte gach neach nach buannaich anns a h‑uile sìon a tha sgrìobhte ann an leabhar an lagha, gus an dèanamh.”

¹¹ A‑nis tha e follaiseach nach eil neach sam bith air fhìreanachadh tron lagh ann am fianais Dhè; oir, “Bidh am fìrean beò tro chreideamh.”

¹² Ach chan eil an lagh de chreideamh; ach, “An duine a nì iad, bidh e beò air an rèir.”

¹³ Shaor Crìosd sinne o mhallachd an lagha, tro thighinn gus a bhith na mhallachd air ar son – oir tha e sgrìobhte, “Is mallaichte gach neach a chrochas air crann” –

¹⁴ airson 's, ann an Crìosd Ìosa, gum faodadh beannachd Abrahàim tighinn air na Cinnich, airson 's gum faigheadh sinne gealladh an Spioraid tro chreideamh.

An Lagh agus an Gealladh

¹⁵ A bhràithrean, tha mi a' bruidhinn mar dhuine; ged nach biodh ann ach co‑cheangal duine, ma tha e air a dhaingneachadh, cha chuir neach sam bith às dha, no ris.

¹⁶ A‑nis chaidh na geallaidhean a ràdh ri Abrahàm 's ri a shìol. Chan eil e ag ràdh, “Agus do shìolan,” mar gun robh e a' bruidhinn mu thòrr, ach an àite sin mu aon, “Agus dhad shìol‑sa,” 's e sin Crìosd.

¹⁷ Is e seo a tha mi ag ràdh: chan eil an lagh – a thàinig ceithir cheud 's a trithead bliadhna às dèidh làimh – a' cur às do cho‑cheangal a dhaingnich Dia roimhe, mar gun cuireadh e às dhan ghealladh.

¹⁸ Oir mas ann on lagh a tha an oighreachd, chan eil i tuilleadh on ghealladh; ach thug Dia gu saor i do dh'Abrahàm tro ghealladh.

¹⁹ Carson ma‑thà an lagh? Chaidh a chur ris air sgàth eas‑ùmhlachd, às dèidh dha a bhith air òrdachadh tro ainglean le làimh eadar‑mheadhanair, gus an tigeadh an sìol dhan deach an gealladh a thoirt.

²⁰ Ach chan eil eadar‑mheadhanair airson aon a‑mhàin; ach tha Dia na aon.

²¹ Mar sin, a bheil an lagh an aghaidh gheallaidhean Dhè? Na tachradh e gu bràth! Oir nan robh lagh air a bhith air a thoirt seachad a b' urrainn beatha a bhuileachadh, an uair sin bhiodh fìreantach dha‑rìribh on lagh.

²² Ach tha an Sgriobtar air a h‑uile duine a ghlasadh fon pheacadh, airson 's gum faodadh an gealladh – tro chreideamh Ìosa Crìosd – a bhith air a thoirt dhaibhsan a tha a' creidsinn.

²³ Ach mus tàinig creideamh, bha sinn air ar geàrd fon lagh, air ar glasadh suas gus am biodh an creideamh a bha a' dol a thighinn air fhoillseachadh.

²⁴ Mar sin tha an lagh air a bhith na oide‑foghlaim dhuinn gu Crìosd, airson 's gum bitheamaid air ar fìreanachadh tro chreideamh.

²⁵ Ach a‑nis on a tha creideamh air tighinn, chan eil sinn tuilleadh fo oide‑foghlaim.

Mic Dhè

²⁶ Oir tha sibh uile nur mic do Dhia tro chreideamh ann an Crìosd Ìosa.

²⁷ Oir na h‑uimhir agaibh 's a bh' air ur baisteadh do Chrìosd, chuir sibh Crìosd oirbh.

²⁸ Chan eil Iùdhach no Greugach, chan eil daor no saor, chan eil fireann no boireann ann; oir tha sibh uile nur n‑aon ann an Crìosd Ìosa.

²⁹ Agus mas ann le Crìosd a tha sibh, mar sin is sibhse sìol Abrahàim, oighreachan a rèir a' gheallaidh.