Galàtianach 2 - An Tiomnadh Nuadh anns an Eadar-Theangachadh Ùr Gàidhlig 2017

Pòl air a Ghabhail ris leis na h‑Abstoil

¹ An uair sin às dèidh ceithir bliadhna deug chaidh mi suas a‑rithist a dh'Ierusalem còmhla ri Barnabas, a' toirt Thìtuis leam cuideachd.

² Is ann air sgàth taisbeanaidh a chaidh mi suas; agus chuir mi an cèill dhaibh an soisgeul a tha mi a' searmonachadh am measg nan Cinneach, ach rinn mi sin gu h‑uaigneach, dhaibhsan air an robh meas, air eagal – air dhòigh sam bith – gun robh mi a' ruith, no gun ruithinn, gu dìomhain.

³ Ach cha deach toirt air Tìtus, a bha còmhla rium – ged a b' e Greugach a bh' ann a bhith air a thimcheall‑ghearradh.

⁴ Ach air sgàth bràithrean‑brèige a chaidh a thoirt a‑steach gun fhiosta 's a bh' air goid a‑steach gus faire a dhèanamh air an t‑saorsa a th' againn ann an Ìosa Crìosd, airson ar toirt fo dhaorsa –

⁵ dhaibhsan cha do ghèill sinn ann an ùmhlachd fiù 's airson mòmaid, airson 's gum fanadh fìrinn an t‑soisgeil còmhla ribhse.

⁶ Ach on fheadhainn sin air an robh meas gum bu chuideigin iad (chan eil ge b' e dè a bh' annta a' dèanamh diofair dhòmhsa, chan eil suim aig Dia do choltas duine) – oir iadsan air an robh meas, cha tug iad sìon dhòmhsa.

⁷ Ach air a' chaochladh, a' faicinn gun deach soisgeul an neo‑thimcheall‑ghearraidh earbsadh dhòmhsa, mar a chaidh soisgeul an timcheall‑ghearraidh earbsadh do Pheadar

⁸ (oir esan a dh'obraich tro Pheadar na abstolachd‑san dhan timcheall‑ghearradh, dh'obraich e dhòmhsa cuideachd dha na Cinnich),

⁹ agus ag aithneachadh a' ghràis a chaidh a thoirt dhomh, thug Seumas is Cèphas is Eòin – a bh' air am meas a bhith nan colbhan – dhòmhsa is do Bharnabas deas‑làimh a' chomainn airson 's gun deigheadh sinne gu na Cinnich agus iadsan chun an timcheall‑ghearraidh.

¹⁰ A‑mhàin, dh'iarr iad oirnn cuimhneachadh air na bochdan, an dearbh nì a bha mi ro‑dheònach a dhèanamh.

Pòl a' Seasamh an aghaidh Pheadair

¹¹ Ach nuair a thàinig Cèphas gu Antioch, sheas mi na aghaidh, a chionn 's gun robh e air a dhìteadh.

¹² Oir mus tàinig daoine àraidh o Sheumas, bhiodh e ag ithe còmhla ri na Cinnich; ach nuair a thàinig iadsan, tharraing e air ais agus dhealaich e e fhèin, air eagal mhuinntir an timcheall‑ghearraidh.

¹³ Agus ghabh an còrr dhe na h‑Iùdhaich pàirt còmhla ris sa chealgaireachd, air chor 's gun deach fiù 's Barnabas a thoirt air seachran leis a' chealgaireachd aca.

¹⁴ Ach nuair a chunnaic mise nach robh iad a' coiseachd gu dìreach a rèir fìrinn an t‑soisgeil, thuirt mi ri Cèphas, mun coinneamh uile, “Ma tha thusa, a tha nad Iùdhach, beò mar a tha na Cinnich 's nach ann mar a tha na h‑Iùdhaich, ciamar a tha thu a' toirt air na Cinnich a bhith beò mar Iùdhaich?

¹⁵ “Tha sinne nar n‑Iùdhaich a thaobh nàdair 's chan ann nar peacaich o na Cinnich,

¹⁶ a dh'aindeoin sin, le fios a bhith againn nach eil duine air fhìreanachadh o obraichean an lagha, ach tro chreideamh ann an Ìosa Crìosd, tha fiù 's sinne air creidsinn ann an Ìosa Crìosd, airson 's gum faod sinn a bhith air ar fìreanachadh tro chreideamh ann an Crìosd agus chan ann tro obraichean an lagha; oir tro obraichean an lagha, cha bhi feòil sam bith air a fìreanachadh.

¹⁷ “Ach, fhad 's a bha sinn a' sireadh a bhith air ar fìreanachadh ann an Crìosd 's gu robh sinn air ar faighinn nar peacaich, a bheil Crìosd mar sin na mhinistear peacaidh? Na tachradh e gu bràth!

¹⁸ Oir ma thogas mi suas a‑rithist na sgrios mi, tha mi gam dhearbhadh fhèin mar chiontaiche.

¹⁹ Oir tron lagh bhàsaich mi chun an lagha, airson 's gum bithinn beò do Dhia. Tha mi air a bhith air mo cheusadh còmhla ri Crìosd,

²⁰ agus cha mhise tuilleadh a tha beò, ach Crìosd a tha beò annamsa. Agus a' bheatha a tha mi a‑nis a' caitheamh san fheòil tha mi a' caitheamh tro chreideamh ann am Mac Dhè, a thug gràdh dhomh agus a thug e fhèin seachad air mo shon.

²¹ Chan eil mi a' diùltadh gràs Dhè, oir nan robh fìreantachd tron lagh, 's ann gun adhbhar a fhuair Crìosd bàs.”