Galàtianach 1 - An Tiomnadh Nuadh anns an Eadar-Theangachadh Ùr Gàidhlig 2017

¹ Pòl, abstol, chan ann o dhaoine, no tro dhaoine, ach tro Ìosa Crìosd agus tro Dhia an t‑Athair, a thog suas o na mairbh e –

² agus na bràithrean gu lèir a tha còmhla rium, Gu eaglaisean Ghalàtia:

³ Gràs dhuibh agus sìth, o Dhia ar n‑Athair agus an Tighearna Ìosa Crìosd,

⁴ a thug e fhèin seachad airson ar peacaidhean airson 's gun saoradh e sinn on linn olc a tha an làthair, a rèir toil ar Dè agus ar n‑Athar,

⁵ dhàsan gun robh a' ghlòir gu saoghal nan saoghal. Amen.

Chan Eil Soisgeul Eile Ann

⁶ Tha iongnadh orm gu bheil sibh, cho luath, air ur tionndadh air falbh uaithesan a ghairm sibh le gràs Chrìosd, gu soisgeul eile –

⁷ chan e gu bheil soisgeul eile ann, ach tha feadhainn ann a tha gur buaireadh 's ag iarraidh soisgeul Chrìosd fhiaradh.

⁸ Ach fiù 's nan robh sinne, no aingeal o nèamh, a' dol a shearmonachadh soisgeul dhuibh a tha an aghaidh an fhear a shearmonaich sinne dhuibh, biodh e mallaichte!

⁹ Mar a tha sinn air a ràdh roimhe, tha mise a‑nis ag ràdh a‑rithist, ma tha neach sam bith a' searmonachadh soisgeul a tha an aghaidh na fhuair sibh, biodh e mallaichte!

¹⁰ Oir a bheil mi a‑nis a' feuchainn ri moladh dhaoine fhaighinn, no moladh Dhè? No a bheil mi a' strì gus daoine a thoileachadh? Nam bithinn fhathast a' feuchainn ri daoine a thoileachadh, cha bhithinn nam sheirbheiseach do Chrìosd.

Pòl air a Ghairm le Dia

¹¹ Oir tha mi a' dèanamh aithnichte dhuibh, a bhràithrean – an soisgeul a chaidh a shearmonachadh leamsa – nach ann a rèir duine a tha e.

¹² Oir cha b' ann o dhuine a fhuair mi e, cha mhotha a chaidh a theagasg dhomh, ach fhuair mi e tro thaisbeanadh Ìosa Crìosd.

¹³ Oir tha sibh air cluinntinn mun chaitheamh‑beatha a b' àbhaist a bhith agam ann an Iùdhachas, mar a bha mi a' geur‑leanmhainn eaglais Dhè thar tomhas agus a' feuchainn ri a sgrios.

¹⁴ Agus bha mi a' dèanamh adhartais ann an Iùdhachas thar mhòran dhem chomhaoisean am measg mo chinnidh fhèin, 's mi na b' fhìor eudmhoire buileach airson dualchasan mo shinnsireachd.

¹⁵ Ach nuair a b' e deagh thoil Dhè e – a chuir air leth mi o bhroinn mo mhàthar 's a ghairm mi tro a ghràs‑san –

¹⁶ a mhac fhèin fhoillseachadh annamsa, airson 's gun searmonaichinn e am measg nan Cinneach, cha do ghabh mi comhairle sa bhad o fhuil 's o fheòil;

¹⁷ cha mhotha a chaidh mi suas a dh'Ierusalem thucasan a bha nan abstoil romham, ach chaidh mi a dh'Aràibia, agus thill mi air ais a‑rithist gu Damascas.

¹⁸ An uair sin, an ceann trì bliadhna, chaidh mi suas a dh'Ierusalem a thadhal air Cèphas agus dh'fhan mi còmhla ris còig làithean deug.

¹⁹ Ach chan fhaca mi gin dhe na h‑abstoil eile, ach Seumas a‑mhàin, bràthair an Tighearna.

²⁰ A‑nis a thaobh nan rudan a tha mi a' sgrìobhadh thugaibh, seallaibh, mu choinneamh Dhè, chan eil mi ag innse breug.

²¹ An uair sin chaidh mi gu ceàrnaidhean Shiria is Chilicia.

²² Agus cha robh eòlas aig eaglaisean Iudèa a bh' ann an Crìosd air m' aodann;

²³ ach a‑mhàin, bha iad ga chluinntinn air a ràdh, “Tha esan a b' àbhaist a bhith gar geur‑leanmhainn a‑nis a' searmonachadh a' chreideimh a dh'fheuch e ri sgrios aig aon àm.”

²⁴ Agus bha iad a' glòrachadh Dhè air mo shon‑sa.