Ephèsianach 6 - An Tiomnadh Nuadh anns an Eadar-Theangachadh Ùr Gàidhlig 2017

Clann agus Pàrantan

¹ A chlann, bithibh umhail dhur pàrantan san Tighearna, oir tha seo ceart.

² “Thoir urram dhad athair 's dhad mhàthair” (is i seo a' chiad àithne le gealladh),

³ “airson 's gun èirich gu math dhut is gum bi thu fada beò air an talamh.”

⁴ Agus athraichean, na brosnaichibh ur clann gu fearg, ach togaibh iad ann am foghlam 's ann an teagasg an Tighearna.

Seirbheisich agus Maighstirean

⁵ A sheirbheiseacha, bithibh umhail dhur maighstirean a rèir na feòla, le eagal is ball‑chrith ann an sìmplidheachd ur cridhe, mar do Chrìosd;

⁶ chan ann le seirbheis sùile, mar fheadhainn a thoilicheas daoine, ach mar sheirbheisich Chrìosd, a' dèanamh toil Dhè on anam,

⁷ le deagh rùn a' dèanamh seirbheis, mar dhan Tighearna, 's chan ann do dhaoine,

⁸ le fios a bhith agaibh, ge b' e dè am math a nì gach aon agaibh, gum faigh e an rud seo fhèin air ais on Tighearna, eadar gum b' e tràill no saoranach a th' ann.

⁹ Agus a mhaighstirean, dèanaibh‑se na h‑aon rudan dhaibhsan, agus sguiribh a mhaoidheadh, is fios agaibh gu bheil an dà chuid am maighstir‑san 's ur maighstir‑se air nèamh, agus nach eil leth‑bhreith ann leis‑san.

Armachd Dhè

¹⁰ Mu dheireadh, bithibh làidir san Tighearna agus ann an treise a chumhachd.

¹¹ Cuiribh oirbh làn‑armachd Dhè, airson 's gum bi sibh an comas air seasamh an aghaidh innleachdan mheallta an diabhail.

¹² Oir chan eil sinn a' gleac ri fuil is feòil, ach ri riaghladairean, ri ùghdarrasan, ri cumhachdan‑saoghail an dorchadais seo, ri cumhachdan spioradail na h‑aingidheachd sna h‑àiteachan nèamhaidh.

¹³ Mar sin, togaibh suas làn‑armachd Dhè, airson 's gum bi sibh comasach air ‘cur an aghaidh’ san latha olc agus às dèidh a h‑uile sìon a dhèanamh, seasamh.

¹⁴ Seasaibh mar sin, 's ur leasraidh crioslaichte le fìrinn is uchd‑èideadh na fìreantachd oirbh

¹⁵ agus, mar bhrògan airson ur casan, ullachadh soisgeul na sìthe;

¹⁶ anns a h‑uile sìon, a' togail suas sgiath a' chreideimh, leis am bi sibh comasach air uile shaighdean theinnteach an fhir uilc a mhùchadh.

¹⁷ Agus gabhaibh clogaid na slàinte, is claidheamh an spioraid – as e facal Dhè.

¹⁸ Leis a h‑uile seòrsa ùrnaigh is tagraidh, dèanaibh ùrnaigh an‑còmhnaidh san Spiorad, agus le seo san amharc, dèanaibh faire leis a h‑uile buannachadh is thagradh airson nan naomh gu lèir.

¹⁹ Agus dèanaibh ùrnaigh air mo shon‑sa gun deigheadh comas bruidhne a thoirt dhòmhsa ann am fosgladh mo bheòil, airson 's gum foillsich mi, le dànachd, dìomhaireachd an t‑soisgeil,

²⁰ dham bheil mi nam thosgaire ann an sèidhnichean, airson 's gum bruidhinn mi gu dàna mu dheidhinn, mar as còir dhomh bruidhinn.

Fàiltean Dheireannach

²¹ Ach airson 's gum bi fios agaibhse cuideachd air na rudan a bhuineas dhòmhsa, agus dè a tha mi a' dèanamh, foillsichidh Tichicus, am bràthair gràdhach is ministear dìleas san Tighearna a h‑uile sìon dhuibh.

²² Tha mi air a chur thugaibh airson an adhbhair seo fhèin, airson 's gum biodh fios nan rudan a bhuineas dhuinne agaibh, agus gun toireadh e cofhurtachd dhur cridheachan.

²³ Sìth gu robh dha na bràithrean, agus gràdh le creideamh, o Dhia an t‑Athair agus an Tighearna Ìosa Crìosd.

²⁴ Gu robh gràs còmhla riuthasan uile a tha a' gràdhachadh ar Tighearna Ìosa Crìosd ann an neo‑thruaillidheachd.