Ephèsianach 3 - An Tiomnadh Nuadh anns an Eadar-Theangachadh Ùr Gàidhlig 2017

Sàr‑Rùn Dhè dha na Cinnich

¹ Air an adhbhar seo, tha mise Pòl, prìosanach Chrìosd Ìosa air ur son‑se a Chinneacha –

² mas e 's gun cuala sibh dha‑rìribh mu stiùbhardachd gràis Dhè a chaidh a thoirt dhomh air ur son‑se,

³ mar sin gun robh, an dìomhaireachd air a dèanamh aithnichte dhomh tro thaisbeanadh, mar a sgrìobh mi roimhe gu h‑aithghearr.

⁴ Tro bhith a' leughadh seo, faodaidh sibh a bhith a' tuigsinn mo lèirsinn a thaobh dìomhaireachd Chrìosd,

⁵ nach robh air a dèanamh aithnichte do chloinn nan daoine ann an ginealaichean eile mar a tha i a‑nis air a bhith air a foillseachadh dha abstoil naomha 's dha fhàidhean leis an Spiorad:

⁶ gu bheil na Cinnich nan co‑oighreachan agus nan co‑bhuill dhen chorp, agus nan co‑luchd‑compàirt dhen ghealladh ann an Crìosd tron t‑soisgeul,

⁷ dhen robh mise air mo dhèanamh nam mhinistear, a rèir tiodhlac gràis Dhè, a chaidh a thoirt dhomh a rèir obrachaidh a chumhachd‑san.

⁸ Dhòmhsa, an neach as lugha dhe na naoimh gu lèir, chaidh an gràs seo a thoirt, beairteas Chrìosd – nach urrainnear a rannsachadh – a shearmonachadh am measg nan Cinneach,

⁹ agus gun dèanainn soilleir dè a th' ann an stiùbhardachd na dìomhaireachd a th' air a bhith falaichte o linntean ann an Dia a chruthaich a h‑uile sìon;

¹⁰ airson 's gum biodh gliocas ioma‑fhillte Dhè a‑nis air a dhèanamh aithnichte tron eaglais dha na riaghladairean 's dha na h‑ùghdarrasan anns na h‑àiteachan nèamhaidh.

¹¹ Bha seo a rèir an rùin shìorraidh a chuir e an gnìomh ann an Crìosd Ìosa ar Tighearna,

¹² anns a bheil dànachd is slighe chinnteach a‑steach againn tro chreideamh annsan.

¹³ Mar sin tha mi ag iarraidh oirbh nach caill sibh misneachd air sgàth mo thrioblaidean air ur son‑se, a tha nan glòir dhuibh.

Ùrnaigh airson nan Ephèsianach

¹⁴ Air an adhbhar seo tha mi a' lùbadh mo ghlùinean mu choinneamh an Athar,

¹⁵ air a bheil gach teaghlach air nèamh 's air thalamh air an ainmeachadh,

¹⁶ gun ceadaicheadh e dhuibh, a rèir beairteas a ghlòire, a bhith air ur neartachadh le cumhachd tro a Spiorad‑san san duine air an taobh a‑staigh,

¹⁷ airson 's gun gabh Crìosd còmhnaidh nur cridheachan tro chreideamh, gus, nuair a tha sibh air a bhith air ur freumhachadh 's air ur stèidheachadh ann an gràdh,

¹⁸ gum bi sibh an comas, cuide ris na naoimh gu lèir, air tuigsinn gu dè an leud, is an fhad is an doimhne, is an àirde

¹⁹ agus aithne a bhith agaibh air gràdh Chrìosd a tha thar eòlais, airson 's gum bi sibh air ur lìonadh gu uile lànachd Dhè.

²⁰ A‑nis dhàsan a tha an comas tòrr mòr nas pailte a dhèanamh thairis air nas urrainn dhuinne iarraidh no smaoineachadh, a rèir a' chumhachd a tha ag obrachadh annainn,

²¹ dhàsan gu robh glòir san eaglais agus ann an Crìosd Ìosa tro na linntean gu lèir, gu saoghal nan saoghal. Amen.