Ephèsianach 2 - An Tiomnadh Nuadh anns an Eadar-Theangachadh Ùr Gàidhlig 2017

Air ar Dèanamh Beò ann an Crìosd

¹ Agus bha sibh marbh ann an eu‑ceartan 's ann am peacaidhean,

² anns an do choisich sibh roimhe a rèir cùrsa an t‑saoghail seo, a rèir riaghladair cumhachd an adhair, an spiorad a tha a‑nis ag obrachadh ann an cloinn na h‑eas‑ùmhlachd,

³ 's nam measg bha sinne cuideachd beò roimhe ann an ana‑miannan ar feòla, a' dèanamh toil na feòla is nan smuaintean, agus bha sinn, a thaobh nàdair, nar cloinn na feirge, dìreach mar chàch.

⁴ Ach Dia, a tha beairteach ann an tròcair, air sgàth a mhòr‑ghràidh leis an do ghràdhaich e sinn,

⁵ eadhon nuair a bha sinn marbh nar peacaidhean, rinn e beò sinn còmhla ri Crìosd – tro ghràs chaidh ur sàbhaladh –

⁶ agus thog e sinne suas leis, is shuidhich e sinn sna h‑àiteachan nèamhaidh ann an Crìosd Ìosa,

⁷ airson 's gun sealladh e sna linntean ri teachd beairteas thar‑tomhas a ghràis ann an coibhneas dhuinne ann an Crìosd Ìosa.

⁸ Oir le gràs chaidh ur sàbhaladh tro chreideamh, agus sin chan ann uaib' fhèin; is e tiodhlac Dhè a th' ann

⁹ – chan ann o obraichean airson 's nach dèanadh neach sam bith bòstadh.

¹⁰ Oir is sinne obair‑san, air ar cruthachadh ann an Crìosd Ìosa airson deagh obraichean, a dh'ullaich Dia ro‑làimh, airson 's gun coisicheamaid annta.

Iùdhaich is Cinnich air an Rèiteachadh ann an Crìosd

¹¹ Mar sin cuimhnichibh gun robh sibhse roimhe, na Cinnich san fheòil, ris an canar “an neo‑thimcheall‑ghearradh,” leothasan ris an canar “an timcheall‑ghearradh” a th' air a dhèanamh san fheòil le làmhan –

¹² cuimhnichibh gun robh sibh aig an àm sin dealaichte o Chrìosd, nur coimhich do cho‑fhlaitheachd Israeil 's nur coigrich do chùmhnantan a' gheallaidh, às aonais dòchais agus gun Dia san t‑saoghal.

¹³ Ach a‑nis ann an Crìosd Ìosa tha sibhse a bha roimhe fad o làimh air a bhith air ur toirt faisg tro fhuil Chrìosd.

¹⁴ Oir is esan e fhèin ar sìth, a rinn an dà chuid nan aon agus a bhris sìos balla‑meadhain an dealachaidh, le bhith a' cur às, na fheòil, dhan nàimhdeas

¹⁵ as e Lagh nan àitheantan a chaidh a chur sìos ann an òrduighean, airson 's, ann fhèin, gun dèanadh e an dithis nan aon duine nuadh, mar sin a' dèanamh sìth,

¹⁶ agus gun dèanadh e an dà chuid rèidh ri Dia ann an aon chorp tro a chrann‑ceusaidh, mar sin a' cur às dhan nàimhdeas.

¹⁷ Agus thàinig e is shearmonaich e sìth dhuibhse a bha fad às agus sìth dhaibhsan a bha faisg.

¹⁸ Oir troimhesan tha slighe a‑steach aig an dà chuid againn ann an aon Spiorad chun an Athar.

¹⁹ Mar sin chan eil sibh tuilleadh nur coigrich 's nur coimhich, ach nur co‑shaoranaich le na naoimh agus nur muinntir teaghlaich Dhè,

²⁰ air ur togail air bunait nan abstol is nam fàidhean, le Crìosd Ìosa fhèin na chloich‑chinn an oisein,

²¹ anns a bheil an togalach gu lèir, air a cheangal ri chèile, a' fàs gus a bhith na theampall naomh san Tighearna;

²² anns a bheil sibhse cuideachd air ur togail còmhla gus a bhith nur n‑àite‑còmhnaidh do Dhia tron Spiorad.