Ephèsianach 1 - An Tiomnadh Nuadh anns an Eadar-Theangachadh Ùr Gàidhlig 2017

¹ Pòl, abstol Chrìosd Ìosa tro thoil Dhè, Gu na naoimh a th' ann an Ephesus agus a tha dìleas ann an Crìosd Ìosa:

² Gràs dhuibh agus sìth o Dhia ar n‑Athair agus on Tighearna Ìosa Crìosd.

Beannachdan Spioradail ann an Crìosd

³ Beannaichte gun robh Dia agus Athair ar Tighearna Ìosa Crìosd, a th' air ar beannachadh leis a h‑uile beannachd spioradail sna h‑àiteachan nèamhaidh ann an Crìosd,

⁴ dìreach mar a thagh e sinne annsan mus deach bunait an t‑saoghail a stèidheachadh, airson 's gum bitheamaid naomh agus neo‑choireach na làthair‑san. Ann an gràdh

⁵ ro‑òrdaich e sinne gu uchd‑mhacachd tro Ìosa Crìosd dha fhèin, a rèir deagh thoil a rùin,

⁶ gu moladh glòir a ghràis, a bhuilich e oirnn gu saor san Aon Ghràdhaichte.

⁷ Annsan tha saorsa againn tro fhuil‑san, mathanas ar peacaidhean, a rèir beairteas a ghràis,

⁸ a thug e dhuinn gu lìonmhor, sa h‑uile gliocas is tuigse,

⁹ a' dèanamh aithnichte dhuinn dìomhaireachd a rùin, a rèir a dheagh‑thoil a rùnaich e annsan,

¹⁰ mar phlana airson lànachd na h‑ùine, gus a h‑uile nì a chruinneachadh ann an Crìosd, rudan sna nèamhan agus air an talamh.

¹¹ Annsan tha sinn air oighreachd fhaighinn, às dèidh dhuinn a bhith air ar ro‑òrdachadh a rèir rùn an Aoin a tha ag obrachadh a h‑uile sìon a rèir comhairle a thoile fhèin,

¹² airson 's gum b' urrainn dhuinne, a chuir ar dòchas ann an Crìosd an toiseach, a bhith gu cliù a ghlòire‑san.

¹³ Annsan tha sibhse cuideachd, às dèidh dhuibh èisteachd ri facal na fìrinn, soisgeul ur sàbhalaidh, agus às dèidh dhuibh creidsinn ann, chaidh ur seuladh le Spiorad Naomh a' gheallaidh,

¹⁴ a tha na gheall dher n‑oighreachd, gu saorsa seilbhe Dhè, gu moladh a ghlòire‑san.

Taingealachd is Ùrnaigh

¹⁵ Air an adhbhar seo, a chionn 's gu bheil mi air cluinntinn mur creideamh san Tighearna Ìosa agus ur gràdh dha na naoimh gu lèir,

¹⁶ chan eil mi a' sgur a thoirt taing air ur son, a' cuimhneachadh oirbh nam ùrnaighean.

¹⁷ Tha mi ag ùrnaigh gun toireadh Dia ar Tighearna Ìosa Crìosd, Athair na glòire, spiorad gliocais is taisbeanaidh dhuibh, ann an eòlas airsan

¹⁸ – sùilean ur n‑inntinn a bhith air an soillseachadh airson 's gum bi fios agaibh dè an dòchas chun do ghairm e sibhse, dè a th' ann am beairteas glòir na h‑oighreachd aigesan sna naoimh,

¹⁹ agus dè a th' ann am mòralachd thar tomhas a' chumhachd‑san dhuinne a tha a' creidsinn, a rèir obrachaidh mhòir treise a' chumhachd

²⁰ a dh'obraich e ann an Crìosd nuair a thog e o na mairbh e agus a chuir e na shuidhe air a dheas‑làimh fhèin e sna h‑àiteachan nèamhaidh

²¹ fada os cionn gach uile riaghladh is ùghdarras is cumhachd is tighearnas, agus a h‑uile h‑ainm a th' air ainmeachadh, chan ann a‑mhàin san linn seo ach cuideachd san tè a tha ri thighinn.

²² Agus chuir e a h‑uile sìon fo chasan Chrìosd, agus thug e esan mar cheann thairis air a h‑uile sìon dhan eaglais,

²³ as i a chorp‑san, an lànachd aigesan a tha a' lìonadh a h‑uile sìon sna h‑uile.