Eòin 16 - An Tiomnadh Nuadh anns an Eadar-Theangachadh Ùr Gàidhlig 2017

¹ “Na rudan seo tha mi air a ràdh ribh airson 's nach tuislich sibh.

² Cuiridh iad às an t‑sionagog sibh; dha‑rìribh tha an uair a' tighinn nuair a shaoileas ge b' e cò a mharbhas sibh gu bheil e a' tairgse seirbheis do Dhia.

³ Agus nì iad na rudan seo air sgàth 's nach b' aithne dhaibh an t‑Athair, no mise.

⁴ Ach tha mi air na rudan seo a ràdh ribh airson 's, nuair a thig an uair, gun cuimhnich sibh gun do dh'innis mi dhuibh iad. Cha tuirt mi na rudan seo ribh on toiseach, a chionn 's gun robh mi còmhla ribh.”

⁵ “Ach a‑nis tha mi a' dol thuigesan a chuir a‑mach mi, agus chan eil aon agaibhse a' faighneachd dhomh, ‘Càit a bheil thu a' dol?’

⁶ Ach a chionn 's gun tuirt mi na rudan seo ribh, tha bròn air ur cridhe a lìonadh.

⁷ Ach tha mi ag innse na fìrinn dhuibh: is ann gu ur buannachd a tha e gu bheil mise a' falbh. Oir mura falbh mi, cha tig an Neach‑Cuideachaidh thugaibhse; ach ma dh'fhalbhas mi, cuiridh mi esan thugaibh.

⁸ Agus nuair a thig esan, dìtidh e an saoghal a thaobh peacaidh agus fìreantachd agus breitheanais:

⁹ a thaobh peacaidh, a chionn 's nach eil iad a' creidsinn annamsa;

¹⁰ a thaobh fìreantachd, a chionn 's gu bheil mi a' dol gum Athair, agus nach faic sibh nas motha mi;

¹¹ a thaobh bhreitheanais, a chionn 's gu bheil riaghladair an t‑saoghail seo air a dhìteadh.

¹² “Tha tòrr rudan agam fhathast ri ràdh ribh, ach chan urrainn dhuibh an giùlain an‑dràsta.

¹³ Ach nuair a thig esan, Spiorad na Fìrinn, treòraichidh e sibh a‑steach dha gach fìrinn. Oir cha bhruidhinn e uaithe fhèin; ach ge b' e dè a chluinneas e, canaidh e, agus cuiridh e an cèill dhuibhse na tha ri thighinn.

¹⁴ Glòraichidh esan mise, oir gabhaidh e dhem chuid‑sa agus cuiridh e an cèill dhuibhse e.

¹⁵ A h‑uile rud a th' aig an Athair, is ann leamsa a tha e; b' ann air an adhbhar sin a thuirt mi gun gabh e dhem chuid‑sa, agus gun cuir e an cèill dhuibhse e.

¹⁶ “Ùine bheag, agus chan fhaic sibh tuilleadh mi; agus a‑rithist ùine bheag, agus chì sibh mi.”

Tionndaidhidh Bròn nan Deisciobal gu Aoibhneas

¹⁷ Mar sin thuirt cuid dhe a dheisciobail ri chèile, “Dè a tha seo a tha e ag ràdh rinn, ‘Ùine bheag, agus chan fhaic sibh tuilleadh mi; agus a‑rithist ùine bheag, agus chì sibh mi,’ agus ‘A chionn 's gu bheil mi a' dol gum Athair’?”

¹⁸ Mar sin bha iad ag ràdh, “Dè a tha e a' ciallachadh le ‘ùine bheag’? Chan aithne dhuinne dè a tha e ag ràdh.”

¹⁹ B' aithne do dh'Ìosa gun robh iad ag iarraidh a cheasnachadh; mar sin thuirt e riutha, “An e seo a bha sibh a' faighneachd nur measg fhèin, dè a bha mi a' ciallachadh nuair a thuirt mi, ‘Ùine bheag, agus chan fhaic sibh tuilleadh mi; agus a‑rithist ùine bheag, agus chì sibh mi’?

²⁰ Gu deimhinn, deimhinn tha mi ag ràdh ribh gun dèan sibhse caoineadh is caoidh, ach nì an saoghal aoibhneas. Bidh sibhse brònach, ach tionndaidhidh ur bròn gu aoibhneas.

²¹ Nuair a tha leanabh aig boireannach, bidh i fo bhròn a chionn 's gu bheil a h‑uair air tighinn, ach nuair a tha i air an leanabh a' thoirt a‑steach dhan t‑saoghal, cha chuimhnich i air a h‑àmhghar tuilleadh, air sgàth an aoibhneis gun do rugadh leanabh a‑steach dhan t‑saoghal.

²² Mar sin, cuideachd, tha sibh brònach a‑nis, ach chì mise a‑rithist sibh agus nì ur cridhe aoibhneas, agus cha toir neach sam bith ur n‑aoibhneas uaibh.

²³ Air an latha sin chan iarr sibh rud sam bith ormsa. Gu deimhinn, deimhinn tha mi ag ràdh ribh, ge b' e dè a dh'iarras sibh air an Athair nam ainm‑sa, gun toir e dhuibh e.

²⁴ Gus a seo cha do dh'iarr sibh rud sam bith nam ainm‑sa. Iarraibh, agus gheibh sibh, airson 's gum bi ur n‑aoibhneas làn.

²⁵ “Na rudan seo tha mi air a ràdh ribh ann an samhlaidhean. Thig an uair anns nach bruidhinn mi tuilleadh ribh ann an samhlaidhean, ach innsidh mi gu soilleir dhuibh mun Athair.

²⁶ Air an latha sin iarraidh sibh nam ainm‑sa, agus chan eil mi ag ràdh ribh gun iarr mise air an Athair air ur son,

²⁷ oir tha gràdh aig an Athair fhèin oirbh, a chionn 's gun tug sibh gràdh dhòmhsa agus gun do chreid sibh gur ann o Dhia a thàinig mi.

²⁸ Thàinig mi on Athair agus tha mi air tighinn a‑steach dhan t‑saoghal; agus a‑nis tha mi a' fàgail an t‑saoghail agus a' dol chun an Athar.”

²⁹ Thuirt a dheisciobail ris, “A‑nis tha thu a' bruidhinn gu soilleir agus chan eil thu a' cleachdadh samhla.

³⁰ A‑nis tha fios againn gur aithne dhut a h‑uile rud agus nach feum thu duine sam bith a bhith gad cheasnachadh; is ann air sgàth seo a tha sinn a' creidsinn gur ann o Dhia a thàinig thu.”

³¹ Fhreagair Ìosa iad, “A bheil sibh a‑nis a' creidsinn?

³² Seallaibh, tha uair a' tighinn, dha‑rìribh tha e air tighinn mu thràth, anns am bi sibh air ur sgapadh, gach aon gu a chuid fhèin. Fàgaidh sibh mise nam aonar. Ach chan eil mi nam aonar, oir tha an t‑Athair còmhla rium.

³³ “Na rudan seo tha mi air a ràdh ribh airson 's gum biodh sìth agaibh annamsa. Anns an t‑saoghal bidh àmhghar agaibh. Ach biodh deagh mhisneachd agaibh! Thug mise buaidh air an t‑saoghal.”