Eòin 12 - An Tiomnadh Nuadh anns an Eadar-Theangachadh Ùr Gàidhlig 2017

Ìosa air Ungadh aig Betani

¹ Sia latha ron Chàisg, thàinig Ìosa gu Betani, far an robh Làsaras, a bha e air a thogail o na mairbh.

² An uair sin rinn iad suipear dha an sin. Bha Marta a' frithealadh agus bha Làsaras na aon dhiubhsan a shuidh aig a' bhòrd còmhla ris.

³ An uair sin ghabh Màiri mu leth liotair de dh'fhìor nàrd, acfhainn fìor chosgail, agus dh'ung i casan Ìosa agus thiormaich i a chasan le a falt. Chaidh an taigh a lìonadh le fàileadh cùbhraidh na h‑acfhainne.

⁴ Ach thuirt aon dhe na deisciobail aige, Iùdas Iscariot, a bha a' dol ga bhrathadh,

⁵ “Carson nach deach an acfhainn seo a reic airson tuarastal aon bhliadhna agus nach deach a thoirt dha na bochdan?”

⁶ Cha b' ann a chionn 's gun robh e fo chùram mu na bochdan a thuirt e seo, ach a chionn 's gum b' e mèirleach a bh' ann; bha an sporan aige agus bhiodh e a' togail leis na chaidh a chur ann.

⁷ Agus thuirt Ìosa, “Leig leatha, ach an glèidh i e airson latha m' adhlacaidh.

⁸ Oir tha na bochdan agaibh còmhla ribh an‑còmhnaidh, ach chan eil mise agaibh an‑còmhnaidh.”

⁹ Nuair a fhuair sluagh mòr dhe na h‑Iùdhaich a‑mach gun robh e an sin, thàinig iad, cha b' ann air sgàth Ìosa a‑mhàin, ach cuideachd airson Làsaras fhaicinn, a thog esan o na mairbh.

¹⁰ Ach rinn na h‑àrd‑shagartan innleachd airson Làsaras a mharbhadh cuideachd,

¹¹ a chionn 's air a sgàth‑san gun robh mòran dhe na h‑Iùdhaich a' falbh agus a' creidsinn ann an Ìosa.

An Dol‑a‑Steach Buadhmhor

¹² An ath latha, chuala am mòr‑shluagh a bh' air tighinn chun na Fèille gun robh Ìosa a' tighinn gu Ierusalem.

¹³ Ghlac iad geugan pailme, agus chaidh iad a‑mach ga choinneachadh, ag èigheach, “Hosanna!” “Is beannaichte esan a tha a' tighinn ann an ainm an Tighearna!” “Rìgh Israeil!”

¹⁴ Lorg Ìosa asal òg, agus shuidh e oirre, a rèir mar a tha e sgrìobhte,

¹⁵ “Na biodh eagal ort, a nighean Shioin; seall, tha do Rìgh a' tighinn, na shuidhe air searrach asail.”

¹⁶ Cha do thuig a dheisciobail na rudan seo aig an àm, ach nuair a chaidh Ìosa a ghlòrachadh, an uair sin chuimhnich iad gun robh na rudan seo sgrìobhte ma dheidhinn, agus gun deach na rudan seo a dhèanamh air a shon.

¹⁷ Mar sin lean an sluagh orra a' toirt fianais; iadsan a bha còmhla ris nuair a ghairm e Làsaras às an tuam agus a thog e o na mairbh e.

¹⁸ B' ann air an adhbhar seo a chaidh an sluagh a‑mach ga choinneachadh, a chionn 's gun cuala iad gun do rinn e an comharra mìorbhaileach seo.

¹⁹ Mar sin thuirt na Pharasaich ri càch‑a‑chèile, “Tha sibh a' faicinn nach eil sibh a' buannachadh rud sam bith. Seallaibh, tha an saoghal air a dhol às a dhèidh!”

Ìosa a' Fàidheadaireachd mu a Bhàs

²⁰ A‑nis bha Greugaich àraidh am measg na muinntir a chaidh suas airson adhradh a dhèanamh aig an Fhèill.

²¹ Mar sin thàinig iadsan gu Philip, a bha o Bhetsaida ann an Galile, agus dh'fhaighnich iad dha, “A thighearna, bu toigh leinn Ìosa fhaicinn.”

²² Dh'fhalbh Philip agus dh'innis e do dh'Anndra; agus dh'innis Anndra agus Philip do dh'Ìosa.

²³ Agus fhreagair Ìosa iad, “Tha an uair air tighinn airson Mac an Duine a bhith air a ghlòrachadh.

²⁴ Gu deimhinn, deimhinn tha mi ag ràdh ribh, mura tuit gràinne cruithneachd dhan talamh agus gum bàsaich i, fanaidh i na h‑aonar, ach ma bhàsaicheas i, bheir i a‑mach toradh mòr.

²⁵ Ge b' e cò a ghràdhaicheas a bheatha, caillidh e i, agus esan a dh'fhuathaicheas a bheatha anns an t‑saoghal seo, gleidhidh e i airson na beatha sìorraidh.

²⁶ Ma nì neach sam bith seirbheis dhòmhsa, feumaidh e mo leantainn; agus ge b' e àite anns am bi mise, an sin bidh mo sheirbheiseach cuideachd. Ma nì neach sam bith seirbheis dhòmhsa, bheir m' Athair urram dha.

²⁷ “A‑nis tha m' anam fo àmhghar, agus dè a chanas mi? ‘Athair, sàbhail mi on uair seo’? Ach is ann air an adhbhar seo a thàinig mi chun na h‑uarach seo.

²⁸ Athair, glòraich d' ainm!” An uair sin thàinig guth o nèamh, ag ràdh, “Tha mi air a ghlòrachadh, agus glòraichidh mi a‑rithist e.”

²⁹ Thuirt an sluagh, a sheas an làthair agus a chuala e, gun robh tàirneanach air a bhith ann. Thuirt feadhainn eile, “Bhruidhinn aingeal ris.”

³⁰ Fhreagair Ìosa, “Cha b' ann air mo shon‑sa a thàinig an guth seo, ach air ur son‑se.

³¹ A‑nis tha breitheanas an t‑saoghail seo ann; a‑nis bidh riaghladair an t‑saoghail seo air a thilgeil a‑mach.

³² Agus mise, nuair a bhios mi air mo thogail suas on talamh, tàirngidh mi na h‑uile thugam.”

³³ Ach thuirt e seo airson comharrachadh dè an seòrsa bàis leis an robh e a' dol a bhàsachadh.

³⁴ Fhreagair an sluagh e, “Chuala sinne on lagh gum fan an Crìosd gu sìorraidh. Ciamar as urrainn dhutsa a ràdh gum feum Mac an Duine a bhith air a thogail suas? Cò e Mac an Duine seo?”

³⁵ Thuirt Ìosa riutha, “Tha an solas nur measg airson ùine bhig fhathast. Coisichibh cho fada 's a tha an solas agaibh, airson 's nach beir an dorchadas oirbh. Oir an neach a tha a' coiseachd anns an dorchadas, chan aithne dha càit a bheil e a' dol.

³⁶ Cho fada 's a tha an solas agaibh, creidibh anns an t‑solas airson 's gun tig sibh gus a bhith nur cloinn de sholas.” Nuair a bha Ìosa air na rudan seo a ràdh dh'fhalbh e, agus dh'fhalaich e e fhèin uapa.

Na h‑Iùdhaich a' Cumail orra nan Eas‑Creideamh

³⁷ Ged a bha e air na h‑uimhir de chomharraidhean mìorbhaileach a dhèanamh man coinneamh, cha robh iad fhathast a' creidsinn ann.

³⁸ Bha seo airson 's gum biodh am facal a thuirt am fàidh Isaiah air a choileanadh: “A Thighearna, cò a chreid ar teachdaireachd agus cò dha a bha gàirdean an Tighearna air fhoillseachadh?”

³⁹ Cha robh e an comas dhaibh creidsinn, a chionn 's gun tuirt Isaiah cuideachd,

⁴⁰ “Tha e air an sùilean a dhalladh agus air an cridhe a dhèanamh cruaidh, airson 's nach faic iad len sùilean agus nach tuig iad len cridhe, agus nach tionndaidheadh iad 's gun slànaichinn‑sa iad.”

⁴¹ Thuirt Isaiah na rudan seo a chionn 's gum faca e glòir Ìosa, agus bhruidhinn e ma dheidhinn‑san.

⁴² A dh'aindeoin sin, chreid mòran fiù 's dhen luchd‑riaghlaidh ann. Ach air sgàth nam Pharasach cha do dh'aidich iad e, airson 's nach deigheadh an cur a‑mach às an t‑sionagog;

⁴³ oir bu ghràdhach leotha glòir dhaoine os cionn glòir Dhè.

⁴⁴ Agus dh'èigh Ìosa, “An neach a chreideas annamsa, chan ann annamsa a tha e a' creidsinn, ach anns an aon a chuir a‑mach mi.

⁴⁵ Agus an neach a tha gam fhaicinn‑sa, tha e a' faicinn an aoin a chuir a‑mach mi.

⁴⁶ Tha mi air tighinn a‑steach dhan t‑saoghal nam sholas, airson 's, ge b' e cò a chreideas annamsa, nach fan e anns an dorchadas.

⁴⁷ “Ma chluinneas neach sam bith mo bhriathran‑sa, agus nach cùm e iad, chan eil mise a' toirt breith air. Oir cha tàinig mi airson breith a thoirt air an t‑saoghal, ach airson an saoghal a shaoradh.

⁴⁸ An neach a tha gam dhiùltadh‑sa, agus nach eil a' gabhail rim bhriathran, tha aon ann a bheir breith air; am facal a thubhairt mi, bheir e breith air, air an latha dheireannach.

⁴⁹ Oir cha do bhruidhinn mi uam fhèin, ach thug an t‑Athair fhèin a chuir a‑mach mi àithne dhomh mu na chanainn agus dè a chanainn.

⁵⁰ Agus tha fios agam gur e beatha shìorraidh a tha na àithne‑san. Mar sin, na rudan a tha mi ag ràdh, tha mi ag ràdh mar a dh'innis an t‑Athair dhomh.”