Eòin 1 - An Tiomnadh Nuadh anns an Eadar-Theangachadh Ùr Gàidhlig 2017

Chaidh am Facal a Dhèanamh na Fheòil

¹ Anns an toiseach bha am Facal, agus bha am Facal còmhla ri Dia, agus b' e am Facal Dia.

² Bha e còmhla ri Dia anns an toiseach.

³ Chaidh a h‑uile rud a dhèanamh troimhesan; agus às aonais‑san cha deach aon rud a dhèanamh a chaidh a dhèanamh.

⁴ Annsan bha beatha, agus b' i a' bheatha sin solas dhaoine.

⁵ Tha an solas a' soillseachadh anns an dorchadas, ach cha tug an dorchadas buaidh air.

⁶ Thàinig duine a chaidh a chur o Dhia; b' e ainm‑san Eòin.

⁷ Thàinig e mar fhianais airson fianais a thoirt mun t‑solas, gus an creideadh na h‑uile troimhesan.

⁸ Cha b' esan idir an solas; ach thàinig e mar fhianais mun t‑solas.

⁹ Bha an solas fìor, a tha a' soillseachadh a h‑uile neach, a' tighinn dhan t‑saoghal.

¹⁰ Bha e anns an t‑saoghal, agus ged a chaidh an saoghal a dhèanamh troimhe, cha do dh'aithnich an saoghal e.

¹¹ Thàinig e gu a chuid fhèin, ach cha do ghabh a chuid fhèin ris.

¹² Ach dhan fheadhainn a ghabh ris, dhan fheadhainn a chreid na ainm, thug e dhaibh còir a bhith nan cloinn do Dhia –

¹³ a rugadh chan ann o fhuil, no o mhiann na feòla, no o thoil duine, ach o Dhia.

¹⁴ Chaidh am Facal a dhèanamh na fheòil agus ghabh e còmhnaidh nar measg. Chunnaic sinne a ghlòir‑san, mar ghlòir an Aonghin on Athair, làn gràis agus fìrinn.

¹⁵ Tha Eòin a' toirt fianais ma dheidhinn. Tha e ag èigheach, ag ràdh, “Is e seo esan air an do bhruidhinn mi: ‘Tha am fear a tha a' tighinn às mo dhèidh air thoiseach orm a chionn 's gun robh e romham.’”

¹⁶ Às a lànachd‑san fhuair sinn uile gràs às dèidh gràis.

¹⁷ Oir chaidh an lagh a thoirt tro Mhaois; ach thàinig gràs agus fìrinn tro Ìosa Crìosd.

¹⁸ Chan fhaca neach sam bith Dia riamh, ach rinn Dia an t‑Aonghin Mic, a tha ann an com an Athar, follaiseach e.

Eòin Baistidh a' Dol às Àicheadh gur Esan an Crìosd

¹⁹ A‑nis b' e seo fianais Eòin nuair a chuir Iùdhaich Ierusaleim sagartan agus Lèbhithich a dh'fhaighneachd dha, “Cò thusa?”

²⁰ Dh'aidich e agus cha deach e às àicheadh, ach dh'aidich e gu saor‑thoileach, “Cha mhise an Crìosd.”

²¹ Dh'fhaighnich iad dha, “Dè ma‑thà? An tusa Eliah?” Thuirt e, “Cha mhi.” “An tu am Fàidh?” Fhreagair e, “Cha mhi.”

²² Mu dheireadh thuirt iad, “Cò thu? Thoir freagairt dhuinn a bheir sinn air ais chun na feadhna a chuir a‑mach sinn. Dè a th' agad ri ràdh mud dheidhinn fhèin?”

²³ Thuirt Eòin ann am faclan Isaiah am fàidh, “Is mise guth neach ag èigheach anns an fhàsach, ‘Dèanaibh dìreach slighe an Tighearna.’”

²⁴ A‑nis dh'fhaighnich feadhainn dhe na Pharasaich a chaidh a chur a‑mach dha,

²⁵ “Carson ma‑thà a tha thu a' baisteadh mura tu an Crìosd, no Eliah, no am Fàidh?”

²⁶ Fhreagair Eòin, “Tha mise a' baisteadh le uisge, ach tha fear na sheasamh nur measg nach aithne dhuibh.

²⁷ Is esan am fear a tha a' tighinn às mo dhèidh, agus nach airidh mise air barraill a chuarain fhuasgladh.”

²⁸ Thachair seo ann am Betani air taobh thall Iòrdain, far an robh Eòin a' baisteadh.

Ìosa Uan Dhè

²⁹ Air an ath latha chunnaic Eòin Ìosa a' tighinn thuige agus thuirt e, “Seallaibh, Uan Dhè, a tha a' toirt air falbh peacadh an t‑saoghail!

³⁰ Is e seo esan a bha mi a' ciallachadh nuair a thuirt mi, ‘Tha fear a tha a' tighinn às mo dhèidh air thoiseach orm a chionn 's gun robh e romham.’

³¹ Cha b' aithne dhomh fhèin idir e, ach airson 's gum biodh e air fhoillseachadh do dh'Israel, thàinig mi a' baisteadh le uisge.”

³² An uair sin thug Eòin an fhianais seo: “Chunnaic mi an Spiorad a' tighinn a‑nuas o nèamh mar chalman agus a' fuireach air.

³³ Cha bhithinn air a bhith eòlach air, mura biodh am fear a chuir mi a bhaisteadh le uisge air innse dhomh, ‘Am fear air am faic thu an Spiorad a' tighinn a‑nuas agus a' fuireach, 's esan a bhaisteas leis an Spiorad Naomh.’

³⁴ Chunnaic mi agus tha mi a' toirt fianais gur e seo Mac Dhè.”

Deisciobail Eòin a' Leantainn Ìosa

³⁵ Air an ath latha bha Eòin an siud a‑rithist còmhla ri dithis dhe a dheisciobail.

³⁶ Nuair a chunnaic e Ìosa a' dol seachad, thuirt e, “Seallaibh, Uan Dhè!”

³⁷ Nuair a chuala an dithis dheisciobal e ag ràdh seo, lean iad Ìosa.

³⁸ A' tionndadh mun cuairt, chunnaic Ìosa iad a' leantainn agus dh'fhaighnich e, “Dè tha sibh ag iarraidh?” Thuirt iad, “A Rabaidh” (a tha a' ciallachadh ‘Fear‑Teagaisg’), “càit a bheil thu a' fuireach?”

³⁹ “Thigibh,” fhreagair e, “agus chì sibh.” Agus dh'fhalbh iad agus chunnaic iad far an robh e a' fuireach, agus chuir iad seachad an latha sin còmhla ris. Bha e mu cheithir uairean feasgar.

⁴⁰ B' e Anndra, bràthair Shìmoin Pheadair, fear dhen dithis a chuala na thuirt Eòin agus a lean Ìosa.

⁴¹ B' e a' chiad rud a rinn Anndra a bhràthair Sìmon a lorg agus innse dha, “Fhuair sinn am Mesiah” ('s e sin Crìosd).

⁴² Thug e gu Ìosa e. Choimhead Ìosa air agus thuirt e, “Is tusa Sìmon mac Eòin. Bidh Cèphas air a ghabhail ort” ('s e sin air eadar‑theangachadh, Peadar).

Ìosa a' Gairm Philip agus Natànael

⁴³ Air an ath latha chuir Ìosa roimhe a dhol a Ghalile. Fhuair e Philip agus thuirt e ris, “Lean mise.”

⁴⁴ Bha Philip o Bhetsaida, baile Anndra agus Pheadair.

⁴⁵ Fhuair Philip Natànael agus dh'innis e dha, “Fhuair sinne am fear mun do sgrìobh Maois anns an Lagh, agus mun do sgrìobh na fàidhean cuideachd – Ìosa o Nàsaret, mac Iòsaiph.”

⁴⁶ “An tig rud math sam bith a‑mach à Nàsaret?” dh'fhaighnich Natànael. Thuirt Philip, “Thig agus faic.”

⁴⁷ Nuair a chunnaic Ìosa Natànael a' tighinn thuige, thuirt e ma dheidhinn, “'S e seo fìor Israeleach, anns nach eil cealg.”

⁴⁸ “Ciamar as aithne dhut mi?” dh'fhaighnich Natànael. Fhreagair Ìosa, “Chunnaic mi thu nuair a bha thu fhathast fon chrann‑fhìge mun do ghairm Philip ort.”

⁴⁹ An uair sin fhreagair Natànael e, “A Rabaidh, is tusa Mac Dhè; is tusa Rìgh Israeil.”

⁵⁰ Fhreagair Ìosa, “Tha thu a' creidsinn a chionn 's gun do dh'innis mi dhut gum faca mi thu fon chrann‑fhìge. Chì thu rudan nas motha na sin.”

⁵¹ An uair sin thuirt e ris, “Gu deimhinn, deimhinn tha mi ag ràdh ribh, chì sibh nèamh air fhosgladh, agus ainglean Dhè a' dol suas agus a' tighinn a‑nuas air Mac an Duine.”