Eabhraidhich 13 - An Tiomnadh Nuadh anns an Eadar-Theangachadh Ùr Gàidhlig 2017

Comhairlean Dheireannach

¹ Gum mair gràdh bràithreil.

² 'S na dèanaibh dearmad air aoigheachd, oir le seo, gun fhios dhaibh, thug feadhainn aoigheachd do dh'ainglean.

³ Biodh cuimhne agaibh air prìosanaich mar gum biodh sib' fhèin ceangailte còmhla riutha, agus air an fheadhainn a tha fo àmhghar on a tha bodhaigean agaib' fhèin.

⁴ Biodh urram aig na h‑uile dhan phòsadh agus chan eil an leabaidh‑pòsaidh ri bhith air a truailleadh, oir nì Dia breitheanas air luchd‑strìopachais agus luchd‑adhaltranais.

⁵ Gum biodh ur caitheamh‑beatha saor o ghaol air airgead, bithibh toilichte leis na th' agaibh, oir thuirt esan: “Chan fhàg mise thu, agus cha trèig mi thu.”

⁶ Mar sin, canaidh sinne le misneachd: “'S e an Tighearna m' fhear‑cuideachaidh; cha bhi eagal orm. Dè a nì duine orm?”

⁷ Biodh cuimhne agaibh air ur ceannardan, a bhruidhinn facal Dhè ribh, agus leanaibh an creideamh‑san a' meòrachadh air toradh an caitheamh‑beatha‑san.

⁸ Tha Ìosa Crìosd ceudna an dè, agus an‑diugh agus gu sìorraidh.

⁹ Na bithibh air ur toirt air seachran le teagasgan a tha caochlaideach is coimheach; oir tha e math dhan chridhe a bhith air a neartachadh le gràs, agus chan ann le biadhan nach do rinn feum dhaibhsan a chleachd iad.

¹⁰ Tha altair againne agus chan eil còir acasan a tha ag adhradh sa phàillean ithe dhith.

¹¹ Oir tha cuirp nan ainmhidhean – aig a bheil am fuil air a toirt a‑steach dhan ionad naomh airson tairgse‑pheacaidh leis an àrd‑shagart – air an losgadh air taobh a‑muigh a' champa.

¹² Mar sin, dh'fhuiling Ìosa cuideachd air taobh a‑muigh a' gheata, airson 's gun naomhaicheadh e an sluagh tro fhuil fhèin.

¹³ Air an adhbhar seo, rachamaid a‑mach thuigesan air taobh a‑muigh a' champa, a' giùlain a mhaslaidh‑san.

¹⁴ Oir an seo, chan eil baile maireannach againn, ach tha sinn a' sireadh an Aoin a tha ri thighinn.

¹⁵ Mar sin, troimhesan tairgeamaid suas an‑còmhnaidh ìobairt molaidh gu Dia, is e sin, toradh bhilean ag aideachadh ainm‑san.

¹⁶ Na dìochuimhnichibh math agus co‑roinn a dhèanamh, oir tha Dia fìor thoilichte le ìobairtean mar seo.

¹⁷ Thoiribh feart dhur ceannardan agus bithibh umhail dhaibh, oir tha iadsan a' gabhail cùram dhur n‑anman oir bheir iad cunntas orra, airson 's gun tèid aca air sin a dhèanamh le aoibhneas 's chan ann le mulad; oir cha bhiodh seo gu sìon a bhuannachd dhuibh.

¹⁸ Guidhibh‑se air ar son‑ne, oir tha sinn cinnteach gu bheil deagh chogais againn, agus tha sinn a' miannachadh ar beatha a chur seachad gu math sa h‑uile sìon.

¹⁹ Ach tha mi a' guidhe nas motha oirbh seo a dhèanamh airson 's gum bi mi air mo thoirt air ais thugaibh nas luaithe.

Beannachadh agus Fàiltean Dheireannach

²⁰ Agus gum biodh Dia na sìthe – a thug air ais bho na mairbh ar Tighearna Ìosa, buachaille mòr nan caorach, tro fhuil a' chùmhnaint shìorraidh –

²¹ gur coileanadh leis gach rud math airson a thoil a dhèanamh, ag obrachadh nar measg na tha taitneach fa chomhair‑san, tro Ìosa Crìosd; dhàsan gu robh glòir fad saoghal nan saoghal. Amen.

²² Tha mi a' guidhe oirbh, a bhràithrean, gum fulaing sibh mo bhrath earalachaidh, oir sgrìobh mi gu goirid thugaibh.

²³ Biodh fios agaibh gun d' fhuair ar bràthair Timòteus fa sgaoil, agus chì mi sibh còmhla ris‑san, ma thig e a dh'aithghearr.

²⁴ Cuiribh fàilte air ur ceannardan gu lèir 's air na naoimh gu lèir. Tha an fheadhainn às an Eadailt a' cur fàilte oirbh.

²⁵ Gu robh gràs còmhla ribh uile.