Eabhraidhich 1 - An Tiomnadh Nuadh anns an Eadar-Theangachadh Ùr Gàidhlig 2017

Facal Deireannach Dhè: A Mhac

¹ Aig iomadh àm 's ann an iomadh dòigh, bhruidhinn Dia o shean ris na h‑athraichean tro na fàidhean,

² anns na làithean deireannach seo bhruidhinn e rinne tro a Mhac, a thagh e na oighre air a h‑uile sìon, tron do rinn e an cruinne‑cè cuideachd.

³ Is esan deàrrsadh a ghlòir‑san agus fìor ìomhaigh a shusbaint, a' cumail suas a h‑uile sìon le facal a chumhachd, às dèidh dha peacaidhean a ghlanadh air falbh, shuidh e air deas‑làimh na mòrachd sna h‑àrdan.

⁴ Mar a chaidh a dhèanamh mòran na b' fheàrr na na h‑ainglean, fhuair e mar oighreachd ainm a tha mòran nas urramaiche na an t‑ainm acasan.

Am Mac os cionn nan Ainglean

⁵ Oir, cò dhe na h‑ainglean ris an tuirt e riamh, “Is tusa mo mhac; an‑diugh ghin mi thu”? Agus a‑rithist, “Bidh mise nam Athair dha, agus bidh esan na Mhac dhòmhsa”?

⁶ Agus a‑rithist, nuair a tha e a' toirt a' chiad‑ghin chun an t‑saoghail, tha e ag ràdh: “Agus dèanadh ainglean Dhè gu lèir adhradh dhà.”

⁷ Agus mu na h‑ainglean tha e ag ràdh: “Fear a tha a' dèanamh ainglean nan spioradan, agus a sheirbheisich nan lasair theine.”

⁸ Ach mun Mhac: “Tha do rìgh‑chathair, a Dhè, gu saoghal nan saoghal, slat‑rìoghail a' cheartais, slat‑rìoghail do rìoghachd‑sa.

⁹ Bha gaol agad air fìreantachd agus bha fuath agad do dh'aingidheachd; mar sin, dh'ung Dia do Dhia thu le ola a' mhòr‑aoibhneis os cionn do chompanaich.”

¹⁰ Agus: “San toiseach, a Thighearna, stèidhich thu an talamh, agus 's iad na nèamhan obraichean do làmhan.

¹¹ Teirigidh iadsan, ach mairidh thusa; agus mar bhad aodaich, fàsaidh iad uile sean.

¹² Agus mar chleòc pasgaidh tu iad, mar bhad aodaich, bithidh iad air an atharrachadh cuideachd. Ach is tusa an neach ceudna agus chan fhàilnich do bhliadhnaichean.”

¹³ Ach cò dhe na h‑ainglean ris an tuirt e riamh: “Suidh air mo dheas‑làimh gus an suidhich mi do nàimhdean nan stòl airson do chasan”?

¹⁴ Nach eil iad uile nan spioradan‑frithealaidh, air an cur a‑mach gus seirbheis a dhèanamh dhaibhsan a tha an impis sàbhaladh fhaighinn mar oighreachd?