Colosianach 3 - An Tiomnadh Nuadh anns an Eadar-Theangachadh Ùr Gàidhlig 2017

Riaghailtean airson Beatha Naoimh

¹ Mar sin ma chaidh ur togail suas còmhla ri Crìosd, siribh na rudan a tha shuas, far a bheil Crìosd na shuidhe aig deas‑làimh Dhè.

² Biodh ur n‑aire air na rudan a tha shuas, chan ann air na rudan a th' air an talamh.

³ Oir bhàsaich sibh, agus tha ur beatha falaichte còmhla ri Crìosd ann an Dia.

⁴ Nuair a bhios Crìosd, ur beatha, air fhoillseachadh, an uair sin bidh sibhse cuideachd air ur foillseachadh còmhla ris ann an glòir.

⁵ Mar sin cuiribh gu bàs na tha talmhaidh nur cuirp: feise mhì‑mhoralta, neòghlaine, boile, miann uilc, sannt, a tha na iodhal‑adhradh.

⁶ Is ann air sgàth nan rudan seo a tha fearg Dhè a' tighinn air cloinn na h‑eas‑ùmhlachd,

⁷ agus anntasan bha sibhse cuideachd a' coiseachd uaireigin, nuair a bha sibh a' caitheamh ur beatha annta.

⁸ Ach a‑nis cuiribh cuideachd air falbh na rudan seo: fearg, corraich, mì‑rùn, toibheum, cainnt shalach, às ur beul.

⁹ Na innsibh breugan dha chèile, on a chuir sibh dhibh an seann duine còmhla ri a ghnìomhan,

¹⁰ agus gun do chuir sibh oirbh am fèin ùr, a th' air ath‑nuadhachadh ann an eòlas, a rèir ìomhaigh an fhir a chruthaich e –

¹¹ far nach eil Greugach no Iùdhach, timcheall‑ghearradh no neo‑thimcheall‑ghearradh, neach borb, Sitianach, tràill, saor; ach 's e Crìosd a h‑uile nì, agus tha e sa h‑uile nì.

¹² Mar sin, mar dhaoine taghte Dhè, naomh is gràdhaichte, cuiribh oirbh caomh‑thròcairean, coibhneas, irioslachd, ciùineas, foighidinn,

¹³ a' giùlain le chèile agus a' mathadh dha chèile, ma tha cùis‑ghearain aig neach an aghaidh neach; mar a thug Crìosd mathanas dhuibhse, mar sin bu chòir dhuibhse dèanamh cuideachd.

¹⁴ Thar nan rudan seo gu lèir cuiribh gràdh oirbh, nì a tha na cheangal coileantais.

¹⁵ Agus leigibh le sìth Dhè riaghladh nur cridheachan, chun an deach ur gairm dha‑rìribh ann an aon chorp; agus bithibh taingeil.

¹⁶ Leigibh le facal Dhè còmhnaidh a ghabhail annaibh gu saidhbhir, leis a h‑uile gliocas a' teagasg 's a' comhairleachadh a chèile le sailm is le laoidhean is le òrain spioradail, a' seinn le taingealachd nur cridheachan do Dhia.

¹⁷ Agus ge b' e dè a nì sibh, ann am facal no ann an gnìomh, dèanaibh iad uile ann an ainm an Tighearna Ìosa, a' toirt taing do Dhia an t‑Athair troimhesan.

Riaghailtean airson Teaghlaichean Chrìosdail

¹⁸ A mhnathan, bithibh umhail dhur fir, mar a tha iomchaidh san Tighearna.

¹⁹ Fheara‑pòsta, gràdhaichibh ur mnathan, agus na bithibh searbh riutha.

²⁰ A chlann, bithibh umhail dhur pàrantan sa h‑uile sìon, oir tha seo a' toileachadh an Tighearna.

²¹ Athraichean, na brosnaichibh ur clann gu feirg, air eagal 's gun caill iad am misneachd.

²² A sheirbheiseacha, sa h‑uile sìon, bithibh umhail dhur maighstirean a rèir na feòla, chan ann le seirbheis‑sùla, mar fheadhainn a tha a' toileachadh dhaoine, ach ann an sìmplidheachd cridhe, ann an eagal an Tighearna.

²³ Ge b' e dè a nì sibh, dèanaibh ur n‑obair o ur cridhe, mar dhan Tighearna 's chan ann airson dhaoine,

²⁴ le fios agaibh gum faigh sibh on Tighearna, duais na h‑oighreachd. Is ann dhan Tighearna Crìosd a tha sibh a' dèanamh seirbheis.

²⁵ Ach an neach a nì eucoir, gheibh e toillteanas na h‑eucoraich a rinn e, agus chan eil leth‑bhreith ann.