Colosianach 2 - An Tiomnadh Nuadh anns an Eadar-Theangachadh Ùr Gàidhlig 2017

¹ Tha mi ag iarraidh gum biodh fios agaibh air cho mòr 's a tha an spàirn a th' agam air ur son‑se, 's air an son‑san a th' ann an Laodicèa, agus air an son‑san gu lèir nach eil air m' aghaidh fhaicinn san fheòil

² airson 's gum biodh an cridheachan air am misneachadh, às dèidh dhaibh a bhith air an dlùth‑cheangal ri chèile ann an gràdh, airson ruigsinn air uile‑bheairteas làn‑dhearbhachd tuigse, 's air eòlas dìomhaireachd Dhè, as e Crìosd,

³ sa bheil uile ionmhasan a' ghliocais 's an eòlais falaichte.

⁴ Tha mi ag ràdh seo airson 's nach meall neach sam bith sibh le cainnt ìmpidheach.

⁵ Oir ged a tha mi air falbh uaibh san fheòil, a dh'aindeoin sin tha mi còmhla ribh san Spiorad, a' dèanamh gàirdeachais ann a bhith a' faicinn ur deagh òrdugh agus seasmhachd ur creideimh ann an Crìosd.

Lànachd Spioradail ann an Crìosd

⁶ Mar sin, mar a fhuair sibh Crìosd Ìosa ar Tighearna, coisichibh ann,

⁷ às dèidh dhuibh a bhith air ur freumhachadh 's air ur togail suas annsan, agus air ur dearbhadh sa chreideamh, dìreach mar a chaidh a theagasg dhuibh, a' cur thairis le taingealachd.

⁸ Dèanaibh cinnteach nach toir duine sam bith am bruid sibh le feallsanachd is mealltaireachd fhalamh, a rèir dualchais dhaoine, a rèir phrionnsapalan bhunasach an t‑saoghail, agus nach ann a rèir Chrìosd.

⁹ Oir annsan tha uile‑lànachd na Diadhachd a' gabhail còmhnaidh gu corporra,

¹⁰ agus annsan chaidh ur coileanadh, agus is esan an ceann os cionn gach riaghlaidh is ùghdarrais;

¹¹ agus annsan chaidh ur timcheall‑ghearradh le timcheall‑ghearradh air a dhèanamh às aonais làmhan, ann an cur dhibh corp na feòla le timcheall‑ghearradh Chrìosd;

¹² às dèidh dhuibh a bhith adhlaicte còmhla ris‑san ann am baisteadh, anns an deach sibh cuideachd ur togail suas còmhla ris tro chreideamh ann an obrachadh Dhè, a thog suas esan o na mairbh.

¹³ Agus sibhse a bha marbh nur n‑euceartan agus ann an neo‑thimcheall‑ghearradh ur feòla, bheothaich e còmhla ris, nuair a bha e air ar n‑euceartan gu lèir a mhathadh,

¹⁴ le bhith a' dubhadh às an clàr‑fhiachan, dèante de dh'òrduighean nar n‑aghaidh, a bha nàimhdeil rinn; agus thug e às an rathad e, nuair bha e tàirngte ris a' chrann‑ceusaidh.

¹⁵ Dhì‑armaich e na riaghladairean 's na h‑ùghdarrasan, agus nàraich e gu follaiseach iad, le bhith a' buadhachadh thairis orra – annsan.

Saorsa bho Riaghailtean Dhaonna

¹⁶ Mar sin na toireadh neach sam bith breith oirbh a thaobh bìdh, no dibhe, no a thaobh fèill, no gealaich ùir no sàbaidean –

¹⁷ a tha nan sgàil air na rudan a tha ri thighinn; ach is ann le Crìosd a tha an t‑susbaint.

¹⁸ Na goideadh duine sam bith ur duais uaibh le bhith a' gabhail tlachd ann am fèin‑irioslachadh is adhradh dha na h‑ainglean, a' seasamh gu dàna a thaobh nan seallaidhean a chunnaic e, air a shèideadh suas gun adhbhar le inntinn fheòlmhoir fhèin,

¹⁹ agus gun a bhith a' cumail grèim daingeann air a' Cheann om bheil an corp gu lèir air a bheathachadh 's air a cheangal ri chèile tro uilt is cheanglaichean, a' fàs le fàs Dhè.

²⁰ Ma tha sibh air bàsachadh còmhla ri Crìosd do spioradan bunasach an t‑saoghail, carson, mar gum biodh sibh fhathast beò san t‑saoghal, a tha sibh fo òrduighean,

²¹ “Na làimhsich, na blais, na bean”?

²² Thèid iadsan uile a‑mach à bith mar a tha iad air an cleachdadh, a rèir àitheantan is teagasgan dhaoine.

²³ Tha iad seo nan gnothaichean aig a bheil, dha‑rìribh, coltas gliocais ann an cràbhachd fèin‑dhèanta agus fèin‑ìsleachaidh agus mì‑chaomhnadh a' chuirp, ach a tha gun luach an aghaidh sàsachadh na feòla.