2 Tesalònianaich 3 - An Tiomnadh Nuadh anns an Eadar-Theangachadh Ùr Gàidhlig 2017

Iarrtas airson Ùrnaigh

¹ Mu dheireadh, bithibh ag ùrnaigh a bhràithrean air ar son‑ne, gun dèanadh facal an Tighearna adhartas luath agus gum biodh e air a ghlòrachadh, eadhon mar a bha e agaibhse.

² Agus gum biodh sinn air ar saoradh on olc agus o dhroch dhaoine, oir chan eil creideamh aig na h‑uile.

³ Ach tha an Tighearna dìleas, a stèidhicheas sibh agus a ghleidheas sibh o fhear‑an‑uilc.

⁴ Ach tha earbsa againn san Tighearna mur deidhinn‑se, gu bheil sibh a' dèanamh, agus gum bi sibh a' dèanamh, nan rudan sin a tha sinn cuideachd ag òrdachadh dhuibh.

⁵ A‑nis, gun treòraicheadh an Tighearna ur cridheachan a‑steach do ghràdh Dhè 's a‑steach do leanaltas Chrìosd.

Rabhadh an Aghaidh Leisge

⁶ Tha sinn ag òrdachadh dhuibh a bhràithrean, ann an ainm ar Tighearna Ìosa Crìosd, gun seachainn sibh a h‑uile bràthair a tha beò gu leisg agus nach ann a rèir an teagaisg a fhuair iad uainne.

⁷ Oir tha fios agaib' fhèin cho cudromach 's a tha e gun lean sibh ar n‑eisimpleir, oir cha robh sinne leisg nar measg‑se.

⁸ Cha mhotha a ghabh sinn mar thiodhlac o dhuine sam bith an t‑aran a dh'ith sinn, ach ann an saothair agus cruadal, a dh'oidhche 's a latha, bha sinn ag obair gus nach biodh sinn nar n‑uallach do dhuine agaibh.

⁹ Chan e nach eil ùghdarras againn, ach gus an toireadh sinn sinn fhèin mar phàtran dhuibhse, airson 's gun leanadh sibh ar n‑eisimpleir.

¹⁰ Oir eadhon nuair a bha sinn còmhla ribh, mar seo dh'òrdaich sinn dhuibh, nam biodh duine sam bith ann nach robh deònach obrachadh, nach motha a bu chòir dha ithe.

¹¹ Oir tha sinn a' cluinntinn gu bheil cuid beò nur measg gu leisg, gun a bhith ag obair idir, ach nan gobairean.

¹² A‑nis tha sinn ag òrdachadh agus ag earalachadh dhan leithid sin san Tighearna Ìosa Crìosd, gun obraich iad ann an ciùineas, gus an ith iad an aran fhèin.

¹³ Ach sibhse a bhràithrean, na caillibh ur misneachd ann a bhith a' dèanamh maith.

¹⁴ Agus ma tha duine sam bith ann nach eil umhail dhar facal tron litir seo, thoiribh an aire dhan duine sin, gun gnothach a ghabhail ris, gus am biodh e air a nàrachadh,

¹⁵ ach na measaibh mar nàmhaid e, ach thoiribh rabhadh dha mar bhràthair.

Fàiltean Dheireannach

¹⁶ A‑nis, gun toireadh Tighearna na sìthe fhèin sìth dhuibhse aig a h‑uile àm is anns a h‑uile dòigh. Gu robh an Tighearna còmhla ribh uile.

¹⁷ Tha am fàilte seo, a tha na comharra anns gach litir, sgrìobhte lem làimh‑sa, Pòl; seo mar a tha mi a' sgrìobhadh.

¹⁸ Gràs ar Tighearna Ìosa Crìosd gun robh còmhla ribh uile.