2 Corintianach 6 - An Tiomnadh Nuadh anns an Eadar-Theangachadh Ùr Gàidhlig 2017

¹ Agus ag obrachadh còmhla ris, tha sinne cuideachd a' dèanamh tagradh ribh gun gràs Dhè a ghabhail gu dìomhain.

² Oir tha e ag ràdh: “Ann an àm fàbharach dh'èist mi riut agus ann an latha an t‑sàbhalaidh chuidich mi thu.” Seallaibh, is e seo, a‑nis, an t‑àm fàbharach, is e seo, a‑nis, latha an t‑sàbhalaidh.

Cruadalan Phòil

³ Gun a bhith a' toirt adhbhar oilbheim ann an rud sam bith, airson 's nach fhaigh a' mhinistrealachd mì‑chliù,

⁴ ach sa h‑uile sìon gar dearbhadh fhèin mar sheirbheisich Dhè, ann am mòr‑leanaltas, ann an àmhgharan, ann an cruadalan, ann an èiginnean,

⁵ ann an dochainnean, ann am prìosanan, ann am buairidhean, ann an saothairean, ann an dìth cadail, ann an trasgaidhean;

⁶ ann am fìorghlaine, ann an eòlas, ann am foighidinn, ann an coibhneas, anns an Spiorad Naomh, ann an gràdh gun cheilg,

⁷ ann am facal na fìrinne, ann an cumhachd Dhè, le airm na fìreantachd air an làimh dheis is chlì;

⁸ tro urram agus eas‑urram, tro mhì‑chliù agus dheagh‑chliù; air ar faicinn mar mhealltairean, ach fìrinneach;

⁹ neo‑aithnichte, ach air a bheil deagh aithne; mar gun robh sinn a' faighinn bàs ach seallaibh, tha sinn beò; mar air ar peanasachadh agus gun a bhith air ar cur gu bàs;

¹⁰ brònach, ach an‑còmhnaidh a' dèanamh gàirdeachais; mar dhaoine bochda, ach a' dèanamh mòran beairteach, mar dhaoine aig nach eil sìon, ach a' sealbhachadh a h‑uile sìon.

¹¹ Tha sinn air bruidhinn gu h‑onarach ribhse, a Chorintianacha, tha ar cridhe air a bhith air fhosgladh gu mòr.

¹² Chan eil sibh air ur bacadh leinne, ach tha sibhse air ur bacadh nur miannan fhèin.

¹³ A‑nis mar fhreagairt – tha mi a' bruidhinn mar ri cloinn – fosglaibh ur cridheachan rinne cuideachd.

Rabhadh an aghaidh Iodhal‑Adhraidh

¹⁴ Na bithibh air ur faighinn fo chuing nan eas‑creidmheach. Oir dè an compàirteachas a th' aig fìreantachd le cion‑lagha? Agus dè an co‑chomann a th' aig solas le dorchadas?

¹⁵ Dè an còrdadh a th' aig Crìosd ri Belial? No dè an co‑roinn a th' aig creidmheach le eas‑creidmheach?

¹⁶ No dè an t‑aonta a th' aig teampall Dhè ri iodhalan? Oir is sinne teampall an Dè bheò; dìreach mar a thuirt Dia, “Gabhaidh mi còmhnaidh annta is coisichidh mi nam measg, agus bidh mise nam Dhia dhaibh is bidh iadsan nan sluagh dhòmhsa.”

¹⁷ “Mar sin, thigibh a‑mach om measg agus bithibh dealaichte, tha an Tighearna ag ràdh. Is na buinibh dhan rud neòghlan, agus cuiridh mise fàilte oirbh.”

¹⁸ Agus “Bidh mise nam Athair dhuibh, agus bidh sibhse nur mic is nur nigheanan dhòmhsa, tha an Tighearna uile‑chumhachdach ag ràdh.”