2 Corintianach 11 - An Tiomnadh Nuadh anns an Eadar-Theangachadh Ùr Gàidhlig 2017

Pòl agus na h‑Abstoil‑Brèige

¹ B' fheàrr leam gum fulaingeadh sibh beagan amaideachd uam, ach dha‑rìribh tha sibh a' fulang leam.

² Oir tha mi eudmhor mur deidhinn le eud diadhaidh; oir rinn mi ceangal‑pòsaidh eadar sibhse is aon fhear, airson 's gum faodainn ur nochdadh mar òigh fhìorghlan do Chrìosd.

³ Ach tha eagal orm, mar a mheall an nathair Eubha le a chuilbheartan, gum bi ur n‑inntinnean‑se air an treòrachadh air seachran o shìmplidheachd is fìorghlaine do Chrìosd.

⁴ Oir ma thig neach eile is gun searmonaich e Ìosa eile nach do shearmonaich sinne, no ma gheibh sibh spiorad eile nach d' fhuair sibh, no soisgeul eile ris nach do ghabh sibh, tha sibh ga fhulang gu math.

⁵ Oir tha mi a' meas nach eil mi dad air dheireadh air na h‑abstoil as iomraitiche.

⁶ Ach fiù 's ma tha mi mì‑sgileil ann an cainnt, a dh'aindeoin sin chan eil mi mar sin ann an eòlas; ach, sa h‑uile dòigh tha sinn air a h‑uile sìon a dhèanamh follaiseach dhuibhse.

⁷ No an do pheacaich mi le bhith gam irioslachadh fhèin airson 's gum biodh sibhse air ur n‑àrdachadh, a chionn 's gun do shearmonaich mi soisgeul Dhè dhuibh an‑asgaidh?

⁸ Chreach mi eaglaisean eile le bhith a' gabhail tuarastal uapa, airson seirbheis a dhèanamh dhuibhse.

⁹ Is nuair a bha mi an làthair còmhla ribh 's ann an dìth, cha robh mi nam eallach do neach sam bith; oir sholair na bràithrean a thàinig o Mhacedònia mo dhìth, agus sa h‑uile sìon chùm mise mi fhèin on a bhith nam eallach dhuibh, agus leanaidh mi orm.

¹⁰ Mar a tha fìrinn Chrìosd annam, cha tèid am bòstadh seo agam a stad ann an ceàrnaidhean Achaia.

¹¹ Carson? A chionn 's nach eil gràdh agam dhuibh? Tha fios aig Dia gu bheil!

¹² Ach na tha mi a' dèanamh, nì mi e, airson 's gun geàrr mi an cothrom uapasan a tha a' miannachadh cothrom a bhith aca a bhith dìreach mar a tha sinne, san rud mum bheil iadsan a' bòstadh.

¹³ Oir tha an leithid seo de dhaoine nan abstoil‑bhrèige – luchd‑obrach cealgach, gan cur fhèin ann an riochd abstoil Chrìosd.

¹⁴ Agus chan iongnadh sin, oir tha fiù 's Sàtan ga chur fhèin ann an riochd aingeal solais.

¹⁵ Mar sin chan eil e na rud mòr sam bith ma tha a sheirbheisich cuideachd gan cur fhèin ann an riochd sheirbheisich na fìreantachd – aig am bi an crìoch a rèir an obrach.

Pòl a' Bòstadh mu na Fulangasan Aige

¹⁶ A‑rithist tha mi ag ràdh, na saoileadh neach sam bith gu bheil mi amaideach; ach ma shaoileas, gabhaibh rium mar amadan, airson 's gun dèan mise cuideachd beagan bòstaidh.

¹⁷ Na tha mi ag ràdh, chan eil mi ag ràdh mar an Tighearna, ach mar ann an amaideachd sa chinnt bòstaidh seo.

¹⁸ On a tha mòran a' bòstadh a rèir na feòla, bòstaidh mise cuideachd.

¹⁹ Oir fulaingidh sibh gu toileach le amadain a chionn 's gu bheil sib' fhèin cho glic.

²⁰ Oir fulaingidh sibh e ma nì cuideigin tràillean dhuibh, no ma dh'itheas cuideigin sibh, no ma ghabhas cuideigin brath oirbh, ma dh'àrdaicheas cuideigin e fhèin, ma bhuaileas cuideigin air an aghaidh sibh.

²¹ Mo nàire, feumaidh mi a ràdh gu bheil sinne cuideachd air a bhith lag. Ach, ge b' e dè an seagh sa bheil neach sam bith eile dàna – tha mi a' bruidhinn gu h‑amaideach – tha mise a cheart cho dàna cuideachd.

²² An e Eabhraich a th' annta? 'S e 's annamsa. An e Israelich a th' annta? 'S e 's annamsa. An e sliochd Abrahàim a th' annta? 'S e 's annamsa.

²³ An e seirbheisich Chrìosd a th' annta? (Tha mi a' bruidhinn mar dhuine air chuthach.) Is motha na sin mise: ann am barrachd shaothairean, ann am prìosanan tòrr nas trice, air mo dhochann tursan gun àireamh, agus gu tric faisg air a' bhàs.

²⁴ Còig tursan fhuair mi o na h‑Iùdhaich ceathrad buille ach a h‑aon.

²⁵ Trì tursan chaidh mo bhualadh le slatan. Aon uair chaidh mo chlachadh. Trì tursan dh'fhulaing mi long‑bhriseadh; latha is oidhche bha mi san doimhneachd.

²⁶ Is tric a bha mi air turais, ann an cunnartan o aibhnichean, ann an cunnartan o ghadaichean, ann an cunnartan o mo chinneadh fhèin, ann an cunnartan o na Cinnich, ann an cunnartan sa bhaile, ann an cunnartan san fhàsach, ann an cunnartan aig muir, ann an cunnartan am measg bhràithrean breugach;

²⁷ ann an saothair is sgìos, tro mhòran oidhcheannan gun chadal, ann an acras is tart, ann an trasgan gu tric, ann am fuachd is lomnochd.

²⁸ Agus a bharrachd air na rudan a th' air an taobh a‑muigh, tha an t‑eallach làitheil orm – cùram nan eaglaisean gu lèir.

²⁹ Cò a tha lag, 's nach eil mise lag? Cò a th' air a threòrachadh gu peacadh 's nach eil mise a' losgadh le feirg?

³⁰ Ma dh'fheumas mi bòstadh, bòstaidh mi mu na rudan a bhuineas dham laigse.

³¹ Tha fios aig Dia agus Athair an Tighearna Ìosa Crìosd, esan a tha beannaichte gu sìorraidh, nach eil mi ag innse breug.

³² Ann an Damascas, bha an riaghladair fo Aretas an rìgh a' geàrdachadh baile muinntir Dhamascais airson mo ghlacadh,

³³ ach tro uinneig sa bhalla chaidh mo leigeil sìos ann an cliabh, agus chaidh mi às a làmhan.