1 Timòteus 6 - An Tiomnadh Nuadh anns an Eadar-Theangachadh Ùr Gàidhlig 2017

¹ Iadsan uile a tha fo chuing na tràilleachd, measadh iad am maighstirean fhèin airidh air a h‑uile h‑urram, airson 's nach tèid toibheum a thoirt do dh'ainm Dhè agus dhan teagasg.

² Agus na sealladh iadsan aig a bheil maighstirean creidmheach sìos orra a chionn 's gur e bràithrean a th' annta, ach dèanadh iad seirbheis nas fheàrr, air sgàth 's gur e creidmhich is luchd‑gràidh a th' anntasan a tha a' faighinn buannachd an deagh obrach‑san. Teagaisg is earalaich na rudan seo dhaibh.

Luchd‑Teagaisg Brèige agus Gràdh an Airgid

³ Ma tha duine sam bith a' teagasg sìon a tha eadar‑dhealaichte 's nach eil e a co‑chòrdadh ri facal fallain ar Tighearna Ìosa Crìosd, agus an teagasg a tha a rèir diadhaidheachd,

⁴ tha e air a shèideadh suas le pròis 's chan eil e a' tuigsinn sìon, ach tha iarrtas mì‑fhallain aige airson connspaid is argamaid mu fhacail, on tig farmad, strì, cùl‑chàineadh, mì‑earbsa olc,

⁵ argamaid gun sgur, na h‑inntinnean aca air an coirbteadh le daoine, agus às aonais na fìrinne, a' smaoineachadh gur e dòigh buannachd a th' anns an diadhaidheachd.

⁶ Ach 's e buannachd mhòr a th' anns an diadhaidheachd còmhla ri toil‑inntinn.

⁷ Oir cha tug sinn dad sam bith a‑steach dhan t‑saoghal, 's cha mhotha a tha sinn an comas dad a thoirt às.

⁸ Ach le biadh is còmhdachadh againn, bidh sinn toilichte leis na rudan sin.

⁹ Ach an fheadhainn a tha a' miannachadh a bhith beairteach, tha iad a' tuiteam ann am buaireadh 's ann an ribe, agus iomadh ana‑miann amaideach is cronail, rudan a tha a' bogadh dhaoine ann am milleadh 's ann an sgrios.

¹⁰ Oir 's e freumh gach gnè uilc gaol an airgid, leis an robh cuid – le bhith ga mhiannachadh – air an toirt a thaobh on chreideamh, agus iad fhèin air an lot troimhe le iomadh doilgheas.

Earail Dheireannach Phòil do Thimòteus

¹¹ Ach thusa, Ò fhir Dhè, teich o na rudan seo, ach dlùth‑lean ri fìreantachd, diadhaidheachd, creideamh, gràdh, leanaltas, caomhalachd.

¹² Cath deagh chath a' chreideimh, greimich air a' bheatha shìorraidh dhan deach do ghairm agus dhan do dh'aidich thu an deagh aideachadh mu choinneamh mhòran fhianaisean.

¹³ Tha mi a' cur ìmpidh ort mu choinneamh Dhè, a tha a' toirt beatha dha na h‑uile, agus Crìosd Ìosa a thug fianais mu choinneamh Phontius Pìlat an deagh aideachadh,

¹⁴ gun glèidh thu an t‑òrdugh gun choire, gun adhbhar càinidh, gus tighinn ar Tighearna Ìosa Crìosd,

¹⁵ a nochdas esan na àm fhèin – esan a tha na aon riaghladair beannaichte, Rìgh nan rìgh agus Tighearna nan tighearna,

¹⁶ a tha a‑mhàin neo‑bhàsmhor, a tha a' còmhnaidh ann an solas neo‑ruigsinneach, esan nach fhaca neach sam bith o mheasg dhaoine, 's nach motha is urrainn dhaibh fhaicinn; gu robh urram is cumhachd sìorraidh aige. Amen.

¹⁷ Dhaibhsan a tha beairteach san àm a tha an làthair, earalaich dhaibh gun a bhith àrd‑inntinneach no gun earbsa a chur ann am mì‑chinnt beairteis, ach ann an Dia, a tha a' toirt a h‑uile sìon dhuinne gu pailt airson am mealtainn;

¹⁸ gus math a dhèanamh, gus a bhith pailt ann an obraichean mhatha, gus a bhith fialaidh, deiseil gu bhith a' compàirteachadh.

¹⁹ A' stòradh suas dhaib' fhèin deagh bhunait airson an ama ri teachd, airson 's gun greimicheadh iad air na tha dha‑rìribh na bheatha.

²⁰ Ò! Thimòteuis, glèidh na chaidh earbsadh riut, a' tionndadh air falbh o fhaoin‑abairtean ain‑diadhaidh agus o chonnsachadh, a th' air ainmeachadh, gu breugach, mar “eòlas”,

²¹ tro bheil cuid le bhith ga aideachadh, air an slighe a chall a thaobh a' chreideimh. Gràs gu robh còmhla ribh uile.