1 Timòteus 1 - An Tiomnadh Nuadh anns an Eadar-Theangachadh Ùr Gàidhlig 2017

¹ Pòl, abstol Chrìosd Ìosa, a rèir òrdugh Dhè ar Slànaigheir agus Crìosd Ìosa ar dòchas,

² Gu Timòteus, fìor leanabh tro chreideamh: Gràs, tròcair is sìth o Dhia an t‑Athair agus o Chrìosd Ìosa ar Tighearna.

Rabhadh an aghaidh Luchd‑Teagaisg Bhreugach an Lagha

³ Dìreach mar a ghuidh mi ort fuireach ann an Ephesus, fhad 's a bha mi dol a‑steach do Mhacedònia, gum biodh tu ag àithne do chuid gun a bhith a' toirt seachad teagasg eadar‑dhealaichte.

⁴ No a bhith a' toirt aire do dh'fhaoin‑sgeòil is sinnsearachd gun chrìoch, a tha ag adhbhrachadh connspaid gun fheum, an àite obair stiùbhardachd teaghlach Dhè tro chreideamh.

⁵ Ach 's e amas na h‑àithne: gràdh à cridhe glan agus deagh chogais agus creideamh gun chealg,

⁶ on a tha cuid air a dhol air seachran 's air tionndadh a thaobh gu briathran falamh,

⁷ ag iarraidh a bhith nan luchd‑teagaisg an lagha, aig nach eil tuigse, chan ann a‑mhàin air na rudan air a bheil iad a' bruidhinn, ach cuideachd air na rudan a tha iad ag aithris le uiread de chinnt.

⁸ Ach tha fios againne gu bheil an lagh math, ma chleachdas neach sam bith e gu laghail.

⁹ Le fios air a seo, tha an lagh ann am bith, chan ann airson an neach fhìreanta, ach eadhon air an son‑san a tha mì‑riaghailteach, mì‑dhiadhaidh agus peacach, mì‑naomh agus eas‑creidmheach, luchd marbhaidh athraichean is mhàthraichean, murtairean,

¹⁰ luchd‑strìopachais, fir a tha ri feise, luchd‑malairt‑thràillean, breugairean, luchd‑mionnan‑bhreugach, agus ma tha rud sam bith eile ann a tha a' cur an aghaidh teagaisg a tha fallain,

¹¹ a rèir soisgeul glòire an Dè bheannaichte, a chaidh earbsadh riumsa.

Gràs an Tighearna do Phòl

¹² Tha taingealachd agam dhàsan a neartaich mi, Crìosd Ìosa ar Tighearna, air sgàth gun do mheas e mi dìleas, gam chur na sheirbheis.

¹³ Bha mise roimhe toibheumach agus nam gheur‑leanmhainniche agus nam dhuine stràiceil, ach fhuair mi tròcair, oir nam aineolas rinn mi e ann an eas‑creideamh.

¹⁴ Agus bha gràs ar Tighearna tuilleadh 's a' cur thairis, còmhla ri creideamh agus gràdh, ann an Crìosd Ìosa.

¹⁵ Tha am facal seo dìleas agus airidh air gabhail ris anns a h‑uile dòigh, gun tàinig Crìosd Ìosa dhan t‑saoghal gus peacaich a shàbhaladh, 's mise am prìomh fhear dhiubh.

¹⁶ Air an adhbhar seo fhuair mise tròcair, gus am foillsicheadh Crìosd Ìosa fhad‑fhoighidinn uile – annamsa, am prìomh fhear – mar eisimpleir dhan fheadhainn a bha gus creidsinn annsan, airson na beatha sìorraidh.

¹⁷ A‑nis, do Rìgh nan linntean, neo‑bhàsmhor, neo‑fhaicsinneach, an t‑aon Dia, gu robh urram agus glòir gu saoghal nan saoghal. Amen.

Ath‑Nuadhachadh Òrduigh Thimòteuis

¹⁸ An t‑òrdugh seo tha mi ag earbsadh riutsa, a Thimòteuis, a mhic, a rèir nam fàidheadaireachdan a chaidh an dèanamh mud dheidhinn‑sa roimhe, gus an cath thu tromhpa an deagh chath.

¹⁹ A' gleidheadh creideimh is deagh chogais; a tha cuid, às dèidh dhaibh an cur uapa, air long‑bhriseadh a dhèanamh a thaobh an creideimh,

²⁰ dhem bheil Himenèaus agus Alecsander – a thug mi thairis do Shàtan, gus am biodh iad air an teagasg gun a bhith ri toibheum.