1 Tesalònianaich 3 - An Tiomnadh Nuadh anns an Eadar-Theangachadh Ùr Gàidhlig 2017

¹ Mar sin nuair nach b' urrainn dhuinn cumail oirnn na b' fhaide, bha sinn toilichte a bhith air ar fàgail ann am baile na h‑Àithne nar n‑aonar.

² Agus chuir sinn Timòteus thugaibh, ar bràthair agus co‑obraiche Dhè ann an soisgeul Chrìosd, gus an stèidhicheadh e sibh agus gum misnicheadh e sibh a thaobh ur creideimh.

³ Na biodh neach sam bith air a chrathadh leis na trioblaidean seo, oir tha fios agaib' fhèin, gun robh sinn air ar n‑òrdachadh airson seo.

⁴ Oir eadhon nuair a bha sinn còmhla ribh, dh'innis sinn dhuibh ro‑làimh gu robh sinn a' dol a dh'fhulang trioblaid, eadhon mar a thachair e 's mar as aithne dhuibh.

⁵ Air an adhbhar sin, nuair nach b' urrainn dhomh cumail orm, chuir mi a dh'fhaighinn fios mur creideamh, mus buaireadh fear a' bhuairidh sibh air dhòigh sam bith, agus gun tigeadh ar saothair gu bhith dìomhain.

Aithris Mhisneachail Thimòteuis

⁶ Ach a‑nis on a thill Timòteus thugainn uaibhse, agus gun do dh'aithris e deagh‑sgeul ur creideimh 's ur gràidh, agus gu bheil deagh chuimhne agaibh oirnne an‑còmhnaidh, ag iarraidh ar faicinn eadhon mar a tha sinne ag iarraidh ur faicinn‑se.

⁷ Air an adhbhar sin bha sinn air ar misneachadh, a bhràithrean, dhar taobh‑se, nar n‑àmhghar 's nar trioblaid uile, tro ur creideimh‑se.

⁸ Oir a‑nis tha sinne beò, ma sheasas sibhse gu daingeann san Tighearna.

⁹ Oir dè an taing as urrainn dhuinn a thoirt do Dhia a phàigheas air ar son‑ne, airson a' ghàirdeachais leis an do rinn sinne gàirdeachas dhar taobh‑se, fa chomhair ar Dè.

¹⁰ A dh'oidhche is a latha, leis a h‑uile dùrachd, dh'iarr sinn ur n‑aghaidh fhaicinn, agus gun dèanamaid suas na tha a dhìth air ur creideimh.

¹¹ A‑nis, gun stiùireadh ar Dia 's ar n‑Athair agus ar Tighearna Ìosa ar slighe thugaibh.

¹² Ach gun toireadh an Tighearna oirbh meudachadh is cur thairis ann an gràdh dha chèile agus dhan a h‑uile neach, eadhon mar a tha sinne cuideachd dhuibhse;

¹³ gus an stèidhich e ur cridheachan gun choire ann an naomhachd mu choinneamh Dhè agus ar n‑Athar, aig tighinn ar Tighearna Ìosa, leis na naoimh aige gu lèir. Amen.