1 Tesalònianaich 2 - An Tiomnadh Nuadh anns an Eadar-Theangachadh Ùr Gàidhlig 2017

Ministrealachd Phòil ann an Tesalonìca

¹ Oir tha fios agaib' fhèin, a bhràithrean, nach robh ar tighinn thugaibh dìomhain.

² Ach às dèidh fulang mar‑thà agus a bhith air ar làimhseachadh gu tàireil, mar as aithne dhuibh, ann am Philipi, gu robh sinn dàna nar Dia gus soisgeul Dhè innse dhuibh le mòran strì.

³ Oir cha robh ar tagradh o mhealltaireachd no o neòghlaine no o cheilg,

⁴ ach eadhon mar a bha sinn taitneach le Dia, 's an soisgeul air earbsadh rinn. Mar sin, tha sinn a' bruidhinn, chan ann a' toileachadh dhaoine, ach Dia, a tha a' dearbhadh ar cridheachan.

⁵ Oir cha do chleachd sinn briathran miodalach, mar as aithne dhuibh, no rùn sanntach; 's e Dia ar fianais.

⁶ Cha mhotha a bha sinn a' lorg glòir o dhaoine, no uaibhse, no o mhuinntir eile. Dh'fhaodadh sinn cuideam a leigeil oirbh mar abstoil Chrìosd,

⁷ ach 's ann a bha sinn mar leanabanan nur measg, mar a dh'altramas màthair a' chlann aice fhèin.

⁸ Mar sin, a rèir ar n‑iarrtas dhuibh, bha sinn toilichte compàirteachadh ribhse, chan e a‑mhàin soisgeul Dhè, ach eadhon ar n‑anman fhèin, oir bha sibh gràdhaichte leinn.

⁹ Oir tha cuimhne agaibh, a bhràithrean, air ar saothair 's ar n‑obair chruaidh, ag obair a dh'oidhche 's a latha gus nach biodh sinn nar n‑uallach do dhuine agaibh, agus shearmonaich sinn dhuibh soisgeul Dhè.

¹⁰ Tha sibhse nur fianaisean, agus Dia, air cho naomh is fìreanta is neochoireach 's a bha sinn leibhse a bha a' creidsinn;

¹¹ eadhon mar a tha fios agaibh, mar a bha sinn do gach aon agaibh, mar athair le a' chloinn fhèin,

¹² gur n‑earalachadh agus gur cofhurtachadh agus a' cur ìmpidh oirbh gus am biodh sibh beò gu h‑iomchaidh do Dhia, a ghairm sibh a‑steach dha rìoghachd fhèin 's dha ghlòir.

¹³ Agus air sgàth seo tha sinne cuideachd a' toirt taing do Dhia gun sgur, nuair a fhuair sibh facal Dhè uainne, gun do ghabh sibh ris, cha b' ann mar fhacal dhaoine, ach mar a tha e dha‑rìribh, facal Dhè, a tha ag obair annaibhse cuideachd a tha a' creidsinn.

¹⁴ Oir thàinig sibhse gu bhith nur luchd‑leantainn, a bhràithrean, de dh'eaglaisean Dhè a th' ann an Iudèa, ann an Crìosd Ìosa: oir na dearbh rudan a dh'fhuiling sibhse cuideachd o mhuinntir ur dùthaich fhèin, mar sin cuideachd dh'fhuiling iadsan o na h‑Iùdhaich.

¹⁵ An fheadhainn a mharbh an dà chuid an Tighearna Ìosa agus na fàidhean, agus a rinn geur‑leanmhainn oirnne agus nach eil a' toileachadh Dhè, agus a tha an aghaidh a h‑uile duine:

¹⁶ a tha gar bacadh o bhith a' bruidhinn ris na Cinnich airson 's gum biodh iad air an sàbhaladh, ach gum biodh an cuid pheacaidhean nas lìonmhoire; oir thàinig fearg orra chun na crìch.

Miann Phòil a Bhith còmhla ris na Tesalònianaich

¹⁷ Ach tha sinne, a bhràithrean, às dèidh a bhith air ar dealachadh uaibh airson ùine ghoirid, ann am pearsa 's chan ann an cridhe, 's ann a bu mhotha a rinn sinn ar dìcheall air ur n‑aghaidh fhaicinn, le mòr‑iarrtas.

¹⁸ Mar sin b' e ar toil tighinn thugaibh, gu dearbh bha mise, Pòl, ag iarraidh sin uair is uair eile, agus bhac Sàtan sinn.

¹⁹ Oir dè ar dòchas, no ar toileachas, no ar crùn bòstaidh? Nach e sibhse fhèin, an làthair ar Tighearna Ìosa, aig a thighinn?

²⁰ Oir is sibhse ar glòir agus ar n‑aoibhneas.