1 Peadar 3 - An Tiomnadh Nuadh anns an Eadar-Theangachadh Ùr Gàidhlig 2017

Mnathan‑Phòsta agus Fir‑Pòsta

¹ San aon dòigh, a mhnathan‑phòsta, bithibh umhail dhur fir‑pòsta fhèin, airson 's, eadhon ma tha fir‑pòsta sam bith eas‑umhail dhan fhacal, gum bi iad air am buannachadh, gun fhacal, tro dhòigh‑beatha nam mnathan‑phòsta aca,

² le bhith a' faicinn ur dòigh‑beatha a th' ann an naomhachd is eagal,

³ chan ann air ur brèaghachadh air an taobh a‑muigh le figheachain agus le rudan òir a chur oirbh no air ur sgeadachadh le aodach,

⁴ ach le na tha falaichte ann an cridhe neach, leis an nì neo‑thruaillidh sin anns a bheil luach mòr mu choinneamh Dhè – spiorad iriosal is sìtheil.

⁵ Oir 's ann mar sin cuideachd a bha na boireannaich naomha o shean gam brèaghachadh fhèin, iadsan aig an robh dòchas ann an Dia, umhail dham fir.

⁶ Mar Shàra a bha umhail do dh'Abrahàm, a' gabhail ‘maighstir’ air, bhon tàinig sibhse gus a bhith nur cloinn, agus gun eagal a bhith oirbh o oillt sam bith.

⁷ San aon dòigh, fheara‑pòsta, bithibh beò còmhla ri ur mnathan‑phòsta le tuigse, a' toirt urraim dhaibh, mar le soitheach a tha nas laige, mar cho‑oighreachan air gràs na beatha, gus nach bi ur n‑ùrnaighean air am bacadh.

A' Fulang airson Maith a Dhèanamh

⁸ A‑nis, mu dheireadh, bithibh de dh'aon inntinn, co‑fhaireachdail, a' gràdhachadh mar bhràithrean, teò‑chridheach, iriosal nur n‑inntinn,

⁹ gun a bhith ag ath‑phàigheadh olc airson uilc, no droch‑bheul airson droch‑bheòil, ach an àite sin beannaichibh, oir is ann chun a seo a chaidh ur gairm, gus an sealbhaich sibh beannachadh.

¹⁰ Oir: “Esan a tha ag iarraidh beatha a ghràdhachadh agus làithean matha fhaicinn, cumadh e a theanga o olc, agus a bhilean o cheilg a bhruidhinn.

¹¹ Tionndaidheadh e o olc agus dèanadh e math, sireadh e sìth agus rachadh e an tòir oirre.

¹² Oir tha sùilean an Tighearna orrasan a tha fìreanta agus a chluasan rin ùrnaighean, ach tha gnùis an Tighearna an aghaidh nam muinntir a tha a' dèanamh an uilc.”

¹³ Agus cò esan a nì cron oirbh ma bhios sibh eudmhor airson a' mhaith?

¹⁴ Ach eadhon ma dh'fhuilingeas sibh air sgàth fìreantachd, tha sibh beannaichte. “Ach na biodh eagal oirbh on chùis‑eagail acasan 's na bithibh air ur buaireadh.”

¹⁵ Ach naomhaichibh an Tighearna Crìosd nur cridheachan, an‑còmhnaidh deiseal airson freagairt a thoirt dhan a h‑uile neach a dh'iarras cunntas oirbh mun dòchas a th' annaibh,

¹⁶ ach dèanaibh seo le caomhalachd is eagal, le deagh chogais, gus am bi iadsan a chàineas ur deagh chaitheamh‑beatha ann an Crìosd air an nàrachadh.

¹⁷ Oir tha e nas fheàrr, mas e toil Dhè, gum fulaing sibh airson maith a dhèanamh na airson uilc a dhèanamh.

¹⁸ Oir dh'fhuiling Crìosd cuideachd aon uair airson pheacaidhean, fìrean airson nan neo‑fhìrean, airson 's gun toireadh e sibhse gu Dia, às dèidh a bhith air a chur gu bàs san fheòil ach air a dhèanamh beò san Spiorad;

¹⁹ agus tron a seo shearmonaich e dha na spioradan a bha sa phrìosan,

²⁰ dhaibhsan a bha eas‑umhail, air an robh Dia aig an àm sin a' feitheamh le fad‑fhulangas ann an làithean Nòah, fhad 's a bha an àirc ga togail, anns an robh beagan, eadhon ochd anaman, air an sàbhaladh tro uisge.

²¹ Tha am baisteadh, a tha na choileanaidh air a seo, a‑nis a' sàbhaladh, chan ann le salchar a thoirt on chorp, ach le freagairt an deagh chogais mu choinneamh Dhè, tro aiseirigh Ìosa Crìosd,

²² a tha aig deas làimh Dhè, às dèidh dha a dhol do nèamh, 's e air ainglean is ùghdarrasan is cumhachdan a chur fo smachd.