1 Eòin 5 - An Tiomnadh Nuadh anns an Eadar-Theangachadh Ùr Gàidhlig 2017

Creideamh ann am Mac Dhè

¹ Tha gach neach a tha a' creidsinn gur e Ìosa an Crìosd air a bhreith o Dhia, agus tha gach neach aig a bheil gràdh dhan Athair, a' toirt gràidh cuideachd dhàsan a chaidh a bhreith leis.

² Mar sin, tha fios againn gu bheil gràdh againn air clann Dhè; nuair a tha gràdh againn air Dia agus nuair a chumas sinn na h‑àithntean aige.

³ Oir is e seo gràdh Dhè – gun cùm sinn na h‑àithntean aige, agus chan eil na h‑àithntean aige trom.

⁴ Oir tha gach neach a th' air a bhreith o Dhia a' toirt buaidh air an t‑saoghal. 'S e seo a' bhuaidh a thug buaidh air an t‑saoghal, ar creideamh.

⁵ Cò a bheir buaidh air an t‑saoghal, mura h‑e esan a chreideas gur e Ìosa Mac Dhè?

⁶ Is e seo esan a thàinig tro uisge agus tro fhuil – Ìosa Crìosd. Chan ann tro uisge a‑mhàin, ach tro uisge agus tro fhuil. Agus 's e an Spiorad a tha a' toirt fianais, a chionn 's gur e an Spiorad an fhìrinn.

⁷ Oir tha triùir ann a tha a' toirt fianais,

⁸ an Spiorad, agus an t‑uisge, agus an fhuil agus tha an triùir sin nan n‑aon.

⁹ Ma ghabhas sinn ri fianais dhaoine, tha teisteanas Dhè nas motha. Oir is i seo fianais Dhè, gun tug e fianais mu a Mhac.

¹⁰ Esan a tha a' creidsinn ann am Mac Dhè, tha an fhianais ann fhèin. Esan nach eil a' creidsinn Dhè, tha e air breugaire a dhèanamh dheth, oir chan eil e air creidsinn san fhianais a thug Dia mu a Mhac fhèin.

¹¹ Agus is i seo an fhianais, gun tug Dia dhuinne a' bheatha shìorraidh; agus tha a' bheatha seo na Mhac‑san.

¹² An neach aig a bheil am Mac, tha beatha aige; an neach aig nach eil Mac Dhè, chan eil beatha aige.

Co‑Dhùnaidhean Deireannach

¹³ Sgrìobh mi na rudan seo thugaibh airson 's gum bi fios agaibh gu bheil a' bheatha shìorraidh agaibhse a tha a' creidsinn ann an ainm Mhic Dhè.

¹⁴ 'S e seo an earbsa a th' againn annsan, ma dh'iarras sinn rud sam bith a rèir a thoil, èistidh e rinn.

¹⁵ Agus ma tha fios againn gun èist e rinn – a thaobh rud sam bith a dh'iarras sinn – tha fios againn gu bheil na h‑iarrtasan a dh'iarr sinn air, againn.

¹⁶ Ma chì neach sam bith a bhràthair a' dèanamh peacaidh nach eil idir gu bàs, iarradh e, agus bheir Dia beatha dhàsan agus dhaibhsan nach eil a' dèanamh peacaidh a tha gu bàs. Tha peacadh ann a tha gu bàs. Chan eil mi ag ràdh gum bu chòir dha guidhe mun t‑seòrsa sin.

¹⁷ 'S e peacadh a th' anns a h‑uile h‑eucoir; agus tha peacadh ann nach eil gu bàs.

¹⁸ Tha fios againn nach peacaich neach sam bith a th' air a ghineadh le Dia, agus tha am fear a chaidh a ghineadh le Dia ga chumail, agus cha bhean an droch fhear ris.

¹⁹ Tha fios againn gur ann le Dia a tha sinne agus gu bheil an saoghal gu lèir na laighe fo chumhachd an fhir uilc.

²⁰ Agus tha fios againn gun tàinig Mac Dhè agus gun tug e dhuinne tuigse airson 's gum bi eòlas againn airsan a tha fìor, agus tha sinne annsan a tha fìor, na Mhac, Ìosa Crìosd. Is esan an Dia fìor agus a' bheatha shìorraidh.

²¹ A chlann bheaga, cumaibh sib' fhèin bho iodhalan.