1 Eòin 4 - An Tiomnadh Nuadh anns an Eadar-Theangachadh Ùr Gàidhlig 2017

Dearbhaibh na Spioradan

¹ A mhuinntir ghràdhaichte, na creidibh a h‑uile spiorad, ach dearbhaibh na spioradan – an ann o Dhia a tha iad, oir tha mòran fhàidhean‑brèige air a dhol a‑mach dhan t‑saoghal.

² Mar sin, aithnichidh sibh Spiorad Dhè. Tha a h‑uile spiorad a dh'aidicheas gun tàinig Ìosa Crìosd san fheòil o Dhia,

³ ach chan ann o Dhia a tha spiorad sam bith nach aidich Ìosa. 'S e seo spiorad an ana‑crìosd, a chuala sibh a tha ri thighinn agus a tha eadhon a‑cheana san t‑saoghal.

⁴ Tha sibhse, a chlann bheaga, o Dhia agus thug sibh buaidh orrasan, oir tha am fear a tha annaibh‑se nas motha na am fear a th' anns an t‑saoghal.

⁵ Tha iadsan on t‑saoghal agus mar sin tha iad a' bruidhinn mun t‑saoghal, agus tha an saoghal ag èisteachd riutha.

⁶ Tha sinne le Dia, agus ge b' e cò aig a bheil eòlas air Dia, èistidh e rinne; ach ge b' e cò nach eil o Dhia, chan èist e rinne. 'S e seo mar a bhios eòlas againn air Spiorad na fìrinne agus air spiorad a' mheallaidh.

Gràdh Dhè agus ar Gràdh‑ne

⁷ A mhuinntir ghràdhaichte, biodh gràdh againn air càch‑a‑chèile on a tha gràdh o Dhia. Agus rugadh gach neach aig a bheil gràdh, o Dhia agus tha eòlas aige air Dia.

⁸ An neach aig nach eil gràdh, chan eil eòlas aige air Dia a chionn 's gur gràdh Dia.

⁹ Mar sin, chaidh gràdh Dhè a nochdadh dhuinne – gun do chuir Dia aonghin Mic dhan t‑saoghal airson 's gum bitheamaid beò troimhesan.

¹⁰ Is ann an seo a tha gràdh; chan e gun do ghràdhaich sinne Dia ach gun do ghràdhaich esan sinne, agus gun do chuir e a Mhac mar ìobairt‑rèite airson ar peacaidhean.

¹¹ A mhuinntir ghràdhaichte ma ghràdhaich Dia sinne, mar sin bu chòir dhuinne cuideachd gràdh a bhith againn air càch‑a‑chèile.

¹² Chan fhaca neach sam bith Dia riamh; ach ma tha gràdh againne air càch‑a‑chèile, tha Dia a' fantainn annainne agus tha a ghràdh‑san air a choileanadh annainn.

¹³ Mar sin, tha fios againn gu bheil sinn a' fantainn annsan agus esan annainne, a chionn 's gun tug e dhuinn an Spiorad aige.

¹⁴ Agus chunnaic sinn, agus thug sinn fianais, gun do chuir an t‑Athair am Mac gu bhith na Shlànaighear dhen t‑saoghal.

¹⁵ Ma dh'aidicheas neach sam bith gur e Ìosa Mac Dhè, tha Dia a' fantainn annsan agus esan ann an Dia.

¹⁶ Agus tha fios againn air agus tha sinn air creidsinn anns a' ghràdh a th' aig Dia air ar son. Is gràdh Dia. Agus esan a tha a' fantainn ann an gràdh, tha e a' fantainn ann an Dia agus Dia a' fantainn annsan.

¹⁷ Mar sin tha gràdh air a choileanadh annainne, airson 's gum bi misneachd againn air Latha a' Bhreitheanais, agus dìreach mar a tha esan, tha sinne cuideachd san t‑saoghal seo.

¹⁸ Chan eil eagal ann an gràdh. Ach tha gràdh coileanta a' tilgeil eagal a‑mach, oir tha peanas san eagal. Agus chan eil neach air a bheil eagal air a dhèanamh coileanta ann an gràdh.

¹⁹ Tha sinne a' gràdhachadh a chionn 's gun do gràdhaich esan sinne an toiseach.

²⁰ Ma chanas neach sam bith, “Tha gràdh agamsa air Dia,” ach gu bheil fuath aige dha bhràthair, 's e breugaire a th' ann. Oir chan urrainn dhàsan aig nach eil gràdh air a bhràthair, a tha e air fhaicinn, gràdh a bhith aige air Dia, nach eil e air fhaicinn.

²¹ Agus tha an àithne seo againn uaithe‑san: Esan aig a bheil gràdh air Dia, feumaidh e cuideachd gràdh a bhith aige air a bhràthair.