1 Eòin 2 - An Tiomnadh Nuadh anns an Eadar-Theangachadh Ùr Gàidhlig 2017

¹ Mo chlann bheaga, tha mi a' sgrìobhadh nan rudan seo thugaibh airson 's nach peacaich sibh. Ach ma pheacaicheas neach sam bith, tha fear‑tagraidh againn còmhla ris an Athar – Ìosa Crìosd, am fìrean.

² Agus is esan an ìobairt‑rèite airson ar peacaidhean, agus chan ann a‑mhàin airson ar feadhna ach cuideachd airson feadhna an t‑saoghail gu lèir.

Gràdh is Fuath do Cho‑Chreidmheich

³ Agus mar sin tha fios againn gu bheil sinn air eòlas fhaighinn airsan, ma chumas sinn àithntean‑san.

⁴ Esan a chanas, “Tha eòlas agam air,” ach nach eil a' cumail àithntean, tha e na bhreugaire 's chan eil an fhìrinn ann.

⁵ Ach ge b' e cò a chumas fhacal‑san, gu fìrinneach tha gràdh Dhè air a choileanadh ann, mar sin tha fios againn gu bheil sinne annsan.

⁶ Ge b' e cò a chanas gu bheil e beò annsan, feumaidh e coiseachd mar a choisich esan.

⁷ A mhuinntir ghràdhaichte, chan eil mi a' sgrìobhadh àithne ùr thugaibh ach seann tè, a bh' agaibh on toiseach. 'S e an t‑seann àithne am facal a chuala sibh.

⁸ A‑rithist tha mi a' sgrìobhadh àithne ùr thugaibh; a tha fìor annsan agus annaibh‑se, oir tha an dorchadas a' dol seachad agus tha an solas fìor a' deàlradh a‑cheana.

⁹ Ge b' e cò a chanas gu bheil e san t‑solas agus aig a bheil fuath dha bhràthair, tha e san dorchadas chun an‑dràsta fhèin.

¹⁰ Am fear a ghràdhaicheas a bhràthair, tha esan beò san t‑solas, agus chan eil adhbhar tuislidh ann.

¹¹ Ach an neach aig a bheil fuath dha bhràthair, tha esan san dorchadas agus tha e a' coiseachd san dorchadas, agus chan eil fios aige càit a bheil e a' dol, oir dhall an dorchadas a shùilean.

Adhbharan airson Sgrìobhaidh

¹² Tha mi a' sgrìobhadh thugaibhse, a chlann bheaga, oir tha ur peacaidhean air am mathadh air sgàth ainme‑san.

¹³ Tha mi a' sgrìobhadh thugaibhse, athraichean, a chionn 's gu bheil eòlas agaibh airsan on toiseach. Tha mi a' sgrìobhadh thugaibhse, fhir òga, a chionn 's gun tug sibh buaidh air an droch fhear.

¹⁴ Tha mi a' sgrìobhadh thugaibhse, a chlann bheaga, a chionn 's gu robh eòlas agaibh air an Athair. Sgrìobh mi thugaibhse, athraichean, a chionn 's gu bheil eòlas agaibh airsan a th' air a bhith ann on toiseach. Sgrìobh mi thugaibhse, fhir òga, a chionn 's gu bheil sibh làidir, agus gu bheil facal Dhè a' fantainn annaibh, agus gun tug sibh buaidh air an droch fhear.

Na Gràdhaichibh an Saoghal

¹⁵ Na gràdhaichibh an saoghal no na rudan a th' anns an t‑saoghal. Ma ghràdhaicheas duine sam bith an saoghal, chan eil gràdh an Athar ann.

¹⁶ Oir tha a h‑uile sìon san t‑saoghal – ana‑miannan na feòla, ana‑miannan nan sùilean agus pròis seilbh na beatha – a' tighinn, chan ann on Athair, ach on t‑saoghal.

¹⁷ Agus tha an saoghal a' dol seachad, 's a chuid ana‑miann; ach mairidh am fear a nì toil Dhè gu sìorraidh.

Rabhadh an aghaidh Ana‑Crìosdan

¹⁸ A chlann bheaga, tha an uair mu dheireadh ann, agus mar a chuala sibh gu bheil an t‑ana‑crìosd a' tighinn, eadhon a‑nis, tha mòran ana‑crìosdan air nochdadh. Mar sin, tha fios againn gu bheil an uair mu dheireadh ann.

¹⁹ Chaidh iad a‑mach bhuainne, ach cha bhuineadh iad dhuinne. Oir nam b' ann dhuinne a bhuineadh iad, bhiodh iad air fuireach còmhla rinn; ach tha an fhàgail aca a' dèanamh follaiseach nach ann dhinne a bha iad.

²⁰ Ach tha ungadh agaibhse on Aon Naomh agus tha fios agaibh uile.

²¹ Cha do sgrìobh mi thugaibh a chionn 's nach eil fios agaibh air an fhìrinn, ach, a chionn 's gu bheil fios agaibh oirre agus a chionn 's nach eil breug sam bith on fhìrinn.

²² Cò e am breugaire ach esan a dh'àicheas gur e Ìosa an Crìosd? Is e seo an t‑ana‑crìosd, a tha ag àicheadh an Athar 's a' Mhic.

²³ Gach neach a tha ag àicheadh a' Mhic, chan eil an t‑Athair aige: an neach a tha ag aideachadh a' Mhic, tha an t‑Athair aige cuideachd.

²⁴ Mar sin, fanadh na chuala sibh on toiseach annaibh. Ma dh'fhanas na chuala sibh on toiseach annaibh, fanaidh sibhse cuideachd anns a' Mhac agus anns an Athair.

²⁵ Agus 's e seo an gealladh a gheall e dhuinn – a' bheatha shìorraidh.

²⁶ Sgrìobh mi na rudan seo thugaibh mu dheidhinn na feadhna a tha gur cur air seachran.

²⁷ Ach mur deidhinn‑se, tha an t‑ungadh a fhuair sibh uaithesan a' fantainn annaibh, agus chan eil feum agaibh air neach sam bith airson ur teagasg. Ach mar a theagaisgeas a' cheart ungadh sibhse mun a h‑uile sìon agus gu bheil e fìor, agus nach e breug a th' ann – dìreach mar a theagaisg e sibhse, fanaibh annsan.

Clann Dhè agus am Peacadh

²⁸ Agus a‑nis, a chlann bheaga, fuirichibh annsan airson 's nuair a nochdas e gum bi misneachd againn agus nach bi nàire oirnn ma choinneamh, aig a thighinn.

²⁹ Ma tha fios agaibh gu bheil e fìreanta, tha fios agaibh gu bheil a h‑uile duine a nì fìreantachd air a bhreith uaithesan.