1 Corintianach 9 - An Tiomnadh Nuadh anns an Eadar-Theangachadh Ùr Gàidhlig 2017

Còraichean Phòil mar Abstol

¹ Nach eil mise saor? Nach e abstol a th' annam? Nach fhaca mi Ìosa Crìosd ar Tighearna? Nach sibhse m' obair san Tighearna?

² Mur a h‑eil mi nam abstol do dh'fheadhainn eile, co‑dhiù tha mi dhuibhse, oir is sibhse seula m' abstolachd san Tighearna.

³ Is e seo mo dhìon dhaibhsan a chuireadh ceist orm.

⁴ Nach eil còir againne ithe agus òl?

⁵ Nach eil còir againn bean‑phòsta a thoirt leinn, mar a th' aig na h‑abstoil eile agus aig bràithrean an Tighearna agus Cèphas?

⁶ No an e mise 's Barnabas a‑mhàin an aon fheadhainn aig nach eil còir obair a sheachnadh?

⁷ Cò a bhios a' dèanamh seirbheis mar shaighdear air a chosgais fhèin? Cò a bhios a' cur fìon‑lios gun a bhith ag ithe sìon dhen toradh aige? No cò a bhios a' frithealadh treud gun a bhith a' faighinn sìon dhen bhainne aige?

⁸ A bheil mi ag ràdh nan rudan seo air ùghdarras dhaoine? Nach eil an Lagh ag ràdh an aon rud?

⁹ Oir tha e sgrìobhte ann an lagh Mhaois, “Cha chuir thu glas‑ghuib air an damh nuair a bhios e a' saltairt an arbhair.” An ann do dhaimh a tha Dia a' gabhail cùram?

¹⁰ Nach eil e a' bruidhinn uile‑gu‑lèir air ar sgàth‑ne? Bha e sgrìobhte air ar sgàth‑ne, a chionn 's gum bu chòir dhan treabhaiche treabhadh ann an dòchas, agus dhan neach‑buailidh bualadh ann an dòchas, is roinn fhaighinn dhen toradh.

¹¹ Ma tha sinne air rudan spioradail a chur nur measg, a bheil e cus ma bhuaineas sinn rudan stuthail uaibh?

¹² Ma tha còir aig feadhainn eile air taic uaibh, nach eil barrachd, buileach againne? A dh'aindeoin sin cha do chleachd sinn a' chòir seo, ach tha sinn a' fulang rud sam bith an àite cnap‑starra a chur ro shoisgeul Chrìosd.

¹³ Nach aithne dhuibh gu bheil iadsan a tha a' saothrachadh ann an seirbheis an teampaill a' faighinn am biadh on teampall, agus gu bheil iadsan a tha a' dèanamh seirbheis aig an altair a' faighinn pàirt dhe na th' air ìobradh air an altair?

¹⁴ San aon dòigh, dh'àithn an Tighearna gum bu chòir dhaibhsan a tha a' cur an cèill an soisgeul am bith‑beò fhaighinn on t‑soisgeul.

¹⁵ Ach chan eil mi air na còraichean seo a chleachdadh, cha mhotha a tha mi a' sgrìobhadh nan rudan seo airson 's gun dèan sibh a leithid seo dhòmhsa. Oir b' fheàrr leam bàsachadh na gum falmhaicheadh neach sam bith mo bhòstadh.

¹⁶ Oir ma tha mise a' searmonachadh an soisgeul, chan eil adhbhar bòstaidh agam. Oir tha èiginn orm. Is mairg dhomh mura searmonaich mi an soisgeul!

¹⁷ Oir ma nì mi seo om rùn fhèin, tha duais agam, ach mura h‑ann om rùn fhèin, tha stiùbhardachd air a h‑earbsa dhomh.

¹⁸ Dè mar sin an duais a th' agam? Gum faodainn, nam shearmonachadh, an soisgeul a thairgsinn saor o chosgais, airson 's nach dèanainn làn‑fheum dhen chòir a th' agam san t‑soisgeul.

Pòl a' Cleachdadh a Shaorsa

¹⁹ Oir ged a tha mi saor o na h‑uile, tha mi air mi fhèin a dhèanamh nam sheirbheiseach dha na h‑uile, airson 's gum buannaichinn barrachd dhiubh.

²⁰ Dha na h‑Iùdhaich thàinig mi gus a bhith mar Iùdhach, airson 's gum buannaichinn Iùdhaich. Dhaibhsan a tha fon lagh thàinig mi gus a bhith fon lagh (ged nach eil mi fhèin fon lagh) airson 's gum buannaichinn iadsan a tha fon lagh.

²¹ Dhaibhsan air taobh a‑muigh an lagha thàinig mi gus a bhith mar aon air taobh a‑muigh an lagha (chan ann air taobh a‑muigh lagh Dhè, ach fo lagh Chrìosd) airson 's gum buannaichinn iadsan a tha air taobh a‑muigh an lagha.

²² Dhaibhsan a bha lag thàinig mi gus a bhith lag, airson 's gum buannaichinn iadsan a bha lag. Tha mi air tighinn gus a bhith nam uile nì dhan a h‑uile neach, airson 's – sa h‑uile dòigh – gun sàbhailinn cuid.

²³ Tha mi ga dhèanamh uile air sgàth an t‑soisgeil, airson 's gum faodainn compàirt a ghabhail na bheannachdan.

Feum air Fèin‑Smachd

²⁴ Nach aithne dhuibh gu bheil, ann an rèis, an luchd‑ruith uile a' ruith, ach chan fhaigh ach aon dhiubh an duais? Mar sin ruithibh airson 's gum buannaich sibh i.

²⁵ Tha a h‑uile lùth‑chleasaiche a' cur fèin‑smachd an sàs sa h‑uile sìon. Tha iad ga dhèanamh airson crùin a thèid a dhìth fhaighinn, ach sinne, tè nach tèid a dhìth.

²⁶ Mar sin chan ann gun amas a tha mise a' ruith; chan eil mi a' bogsadh mar aon a bhuaileas an t‑adhar.

²⁷ Ach tha mise a' smachdachadh mo chorp is ga chumail fo smachd gun fhios – às dèidh dhomh searmonachadh do dh'fheadhainn eile – nach bithinn fhèin air mo chur air chùl.