1 Corintianach 8 - An Tiomnadh Nuadh anns an Eadar-Theangachadh Ùr Gàidhlig 2017

Biadh air Ìobradh do dh'Iodhalan

¹ A‑nis a thaobh bìdh air ìobradh do dh'iodhalan, tha fios againn “gu bheil eòlas againn uile.” Tha eòlas a' sèideadh suas; tha gaol a' togail suas.

² Ma tha neach sam bith a' saoilsinn gur aithne dha rud sam bith, chan aithne dha fhathast mar bu chòir dha aithneachadh.

³ Ach ma tha gaol aig neach sam bith air Dia, tha esan air aithneachadh leis‑san.

⁴ Mar sin, a thaobh a bhith ag ithe biadh air ìobradh do dh'iodhalan, is aithne dhuinn “nach eil fìor bhith aig iodhal san t‑saoghal,” agus “nach eil Dia ann ach an t‑aon.”

⁵ Oir ged a dh'fhaodadh diathan, mar a chanar, a bhith ann an nèamh no air thalamh (mar dha‑rìribh a tha mòran “dhiathan” agus mòran “thighearnan” ann)

⁶ chan eil ann dhuinne ach aon Dia, an t‑Athair, bhon a bheil a h‑uile sìon agus dham bheil sinn beò, agus aon Tighearna, Ìosa Crìosd, trom bheil a h‑uile sìon agus trom bheil sinn beò.

⁷ Ge‑tà, chan eil an t‑eòlas seo aig na h‑uile. Ach tha cuid a tha cleachdte ris an iodhal thuige seo, ag ithe biadh mar gun robh e dha‑rìribh air ìobradh do dh'iodhal, agus tha an cogais, a chionn 's gu bheil i lag, air a truailleadh.

⁸ Cha mhol biadh sinn do Dhia. Chan eil sinn nas miosa dheth idir mura h‑ith sinn, agus chan eil sinn nas fheàrr dheth ma dh'itheas sinn.

⁹ Ach gabhaibh an aire nach bi ur còir, air dhòigh air choireigin, a' tighinn gus a bhith na ceap‑tuislidh dhaibhsan a tha lag.

¹⁰ Oir ma chì neach sam bith thusa, aig a bheil eòlas, ag ithe ann an teampall iodhail, nach bi e air a mhisneachadh, ma tha a chogais lag, gus a bhith ag ithe biadh air ìobradh do dh'iodhalan?

¹¹ Mar sin, tron eòlas agadsa, tha an neach lag seo air a sgrios, am bràthair dhan do bhàsaich Crìosd.

¹² Ach mar sin, a' peacachadh an aghaidh do bhràithrean, agus a' lotadh na cogais lag aca, tha thu a' peacachadh an aghaidh Chrìosd.

¹³ Mar sin, ma tha biadh a' toirt air mo bhràthair tuisleadh, chan ith mi feòil a‑chaoidh, airson 's nach toir mi air mo bhràthair tuisleadh.