1 Corintianach 6 - An Tiomnadh Nuadh anns an Eadar-Theangachadh Ùr Gàidhlig 2017

Cùisean‑Lagha am measg Chreidmheach

¹ Nuair a bhios cùis aig aon agaibh an aghaidh aoin eile, a bheil de dhànadas aige a dhol gu lagh mu choinneamh nan eucoireach an àite mu choinneamh nan naomh?

² No nach aithne dhuibh gun toir na naoimh breith air an t‑saoghal? Agus ma tha an saoghal gu bhith air a chur fo bhreitheanas leibhse nach eil sibh an comas air a bhith nur britheamhan air cùisean suarach.

³ Nach aithne dhuibh gun toir sinne breith air ainglean? Nach mòr nas motha na sin, ma‑thà, cùisean na beatha seo?

⁴ Mar sin ma tha a leithid sin de chùisean agaibh, carson a tha sibh gan sìneadh sìos mun coinneamh‑san aig nach eil seasamh sam bith san eaglais?

⁵ Tha mi ag ràdh seo gur nàire. An urrainn dha a bhith nach eil neach sam bith nur measg a tha glic gu leòr airson breith a thoirt eadar a bhràithrean,

⁶ ach tha bràthair a' dol gu lagh an aghaidh bràthar, agus seo mu choinneamh nan eas‑creidmheach?

⁷ Ann am fìrinn, tha e na chall dhuibh gu bheil cùisean‑lagha agaibh mu thràth. Carson nach b' fheàrr leibh ceàrr fhulang? Carson nach b' fheàrr leibh foill fhulang?

⁸ Ach tha sibhse sib' fhèin a' dèanamh ceàrr is foill – fiù 's air ur bràithrean fhèin.

⁹ Nach aithne dhuibh nach sealbhaich na h‑eucoirich rìoghachd Dhè? Na bithibh air ur mealladh, cha shealbhaich luchd‑strìopachais, no luchd‑iodhal‑adhraidh, no luchd‑adhaltranais, no daoine boireannta no fir a tha ri fearas‑feise,

¹⁰ no mèirlich, no luchd‑sannta, no misgeirean, no luchd‑cùl‑chàinidh, no luchd‑foille, rìoghachd Dhè.

¹¹ Agus bha cuid agaibhse mar sin. Ach chaidh ur nighe, chaidh ur naomhachadh, chaidh ur fìreanachadh ann an ainm an Tighearna Ìosa Crìosd agus le Spiorad ar Dè‑ne.

Feise Mhì‑Mhoralta

¹² “Tha a h‑uile sìon laghail dhòmhsa,” ach chan eil a h‑uile sìon buannachdail. “Tha a h‑uile sìon laghail dhòmhsa,” ach cha bhi mi air mo chur fo smachd le nì sam bith.

¹³ “Tha am biadh airson na stamaig is an stamag airson a' bhìdh” – agus sgriosaidh Dia an dà chuid – aon fhear 's am fear eile. Chan ann airson feise mhì‑mhoralta a tha an corp, ach airson an Tighearna, agus an Tighearna airson a' chuirp.

¹⁴ A‑nis thog Dia suas an Tighearna agus togaidh e sinne cuideachd le a chumhachd.

¹⁵ Nach aithne dhuibh gu bheil ur cuirp nam buill do dh'Ìosa? An gabh mi mar sin buill Chrìosd agus an dèan mi nam buill strìopaich iad? Na tachradh e gu bràth!

¹⁶ No nach aithne dhuibh gu bheil esan a th' air aonadh ri strìopaich na aon chorp leatha? Oir tha e air a ràdh, “Thig an dithis gus a bhith nan aon fheòil.”

¹⁷ Ach tha esan a th' air aonadh ris an Tighearna a' tighinn gus a bhith na aon spiorad leis‑san.

¹⁸ Teichibh o fheise mhì‑mhoralta. Tha a h‑uile peacadh a nì neach air taobh a‑muigh a' chuirp, ach tha an neach a tha ri feise mhì‑mhoralta a' peacachadh an aghaidh a chuirp fhèin.

¹⁹ No nach aithne dhuibh gu bheil ur corp na theampall dhan Spiorad Naomh a tha nur broinn, a th' agaibh o Dhia, agus nach ann leib' fhèin a tha sibh?

²⁰ Oir chaidh ur ceannach le prìs. Mar sin glòirichibh Dia le ur cuirp.