1 Corintianach 15 - An Tiomnadh Nuadh anns an Eadar-Theangachadh Ùr Gàidhlig 2017

Aiseirigh Chrìosd

¹ A‑nis dhèanainn aithnichte dhuibh, a bhràithrean, an soisgeul a shearmonaich mi dhuibh, a fhuair sibhse cuideachd, agus anns a bheil sibh nur seasamh,

² trom bheil sibh cuideachd air ur sàbhaladh – ma chumas sibh gu daingeann am facal a shearmonaich mi dhuibh – mur do chreid sibh gu dìomhain.

³ Oir thug mi dhuibh mar phrìomh rud an nì a fhuair mise cuideachd: gun d' fhuair Crìosd bàs airson ar peacaidhean a rèir nan Sgriobtar,

⁴ agus gun deach adhlacadh, is gun do dh'èirich e a‑rithist air an treas latha a rèir nan Sgriobtar

⁵ agus gun do nochd e do Chèphas is an uair sin dhan dà‑fhear‑dheug.

⁶ Às dèidh sin, nochd e e fhèin do bharrachd air còig cheud bràthair aig an aon àm, a' mhòr chuid dhiubh a tha beò gus a‑nis, ach tha cuid dhiubh air tuiteam nan cadal.

⁷ Às dèidh sin nochd e e fhèin do Sheumas, an uair sin dha na h‑abstoil gu lèir,

⁸ agus mu dheireadh thall, nochd e e fhèin dhòmhsa cuideachd, mar neach a rugadh ann an an‑àm.

⁹ Oir is mise as lugha dhe na h‑abstoil, nach eil airidh air abstol a ghabhail orm, a chionn 's gun robh mi a' geur‑leanmhainn eaglais Dhè.

¹⁰ Ach tro ghràs Dhè is mi an nì a th' annam, agus cha robh a ghràs dham thaobh‑sa gun buaidh; ach shaothraich mi barrachd na iad uile, a dh'aindeoin sin cha bu mhise, ach gràs Dhè a tha còmhla rium.

¹¹ Mar sin, ge b' e mise a bh' ann no iadsan, mar seo tha sinne a' searmonachadh agus mar seo chreid sibhse.

Aiseirigh nam Marbh

¹² A‑nis ma tha Crìosd air a shearmonachadh, gun deach a thogail o na mairbh, ciamar a tha cuid nur measg‑se ag ràdh nach eil aiseirigh nam marbh ann?

¹³ Ach mura h‑eil aiseirigh nam marbh ann, cha deach fiù 's Crìosd a thogail suas.

¹⁴ Agus mura deach Crìosd a thogail suas, mar sin tha ar searmonachadh dìomhain, agus tha ur creideamh‑se dìomhain cuideachd.

¹⁵ Agus tha sinne air ar faighinn nar fianaisean brèige air Dia, a chionn 's gun tug sinn fianais a thaobh Dhè, gun do thog e suas Crìosd – am fear nach do thog e suas, mura h‑eil na mairbh air an togail suas.

¹⁶ Oir mura h‑eil na mairbh air an togail suas, cha mhotha a chaidh Crìosd a thogail suas.

¹⁷ Agus mura deach Crìosd a thogail suas, tha ur creideamh‑se dìomhain; tha sibh fhathast nur peacaidhean.

¹⁸ Mar sin cuideachd tha iadsan a chaidil ann an Crìosd air an sgrios.

¹⁹ Mas ann sa bheatha seo a‑mhàin a tha dòchas againn ann an Crìosd, tha sinn nas airidh air truas na daoine sam bith.

²⁰ Ach a‑nis chaidh Crìosd a thogail suas o na mairbh, ciad‑thoradh na feadhna a chaidil.

²¹ Oir mar a thàinig am bàs tro dhuine, thig aiseirigh nam marbh cuideachd tro dhuine.

²² Oir mar a tha a h‑uile neach a' bàsachadh ann an Àdhamh, mar sin cuideachd, thèid a h‑uile neach a dhèanamh beò ann an Crìosd.

²³ Ach gach neach na òrdugh fhèin: Crìosd a' chiad‑thoradh, às dèidh sin iadsan a tha le Crìosd aig a thighinn.

²⁴ An uair sin thig an deireadh, nuair a bheir e suas an rìoghachd do Dhia an t‑Athair, nuair a chuireas e às dhan a h‑uile riaghaltas agus dhan a h‑uile h‑ùghdarras is cumhachd.

²⁵ Oir feumaidh esan riaghladh gus an cuir e a nàimhdean gu lèir fo a chasan.

²⁶ Is e an nàmhaid mu dheireadh a thèid a sgrios, am bàs.

²⁷ Oir “chuir e a h‑uile sìon fo smachd – fo a chasan.” Ach nuair a tha e ag ràdh gun do chuir e “a h‑uile sìon” fo smachd, tha e follaiseach gu bheil esan a chuir a h‑uile sìon fo smachd air leth on a seo.

²⁸ Nuair a thèid a h‑uile sìon a chur fo a smachd, an uair sin bidh am Mac fhèin fo smachd an Aoin a chuir a h‑uile sìon fo a smachd‑san, airson 's gum bi Dia nan uile anns na h‑uile.

²⁹ No, dè a nì iadsan a chaidh a bhaisteadh airson nam marbh? Mura h‑eil na mairbh air an togail suas idir, carson mar sin a tha iad air am baisteadh air an son?

³⁰ Agus carson a tha sinne ann an cunnart gach uair?

³¹ Tha mi a' dearbhadh, a bhràithrean, tron bhòstadh agam mur deidhinn ann an Crìosd Ìosa ar Tighearna; gu bheil mi a' bàsachadh a h‑uile latha.

³² Mas ann a rèir dòchais dhaonna a rinn mi sabaid ri beathaichean fiadhaich ann an Ephesus, dè a' bhuannachd a th' agam? Mura h‑eil na mairbh air an togail an‑àirde, “Itheamaid agus òlamaid, oir a‑màireach gheibh sinn bàs.”

³³ Na bithibh air ur mealladh, “Truaillidh droch chuideachd deagh bheusan.”

³⁴ Thigibh gur ciall mar a bu chòir dhuibh, agus na peacaichibh; oir tha aineolas air Dia aig cuid, tha mi ag ràdh seo gu ur nàire.

Corp na h‑Aiseirigh

³⁵ Ach canaidh cuideigin, “Ciamar a dh'èireas na mairbh? Agus dè an seòrsa cuirp leis an tig iad?”

³⁶ Amadain! An nì sin a chuireas tu, cha tig e beò, mura bàsaich e an toiseach.

³⁷ Agus an nì a chuireas tu, chan e an corp a bhios ann a chuireas tu, ach gràinne lom, faodaidh e a bhith de chruithneachd, no de sheòrs air choreigin eile.

³⁸ Ach tha Dia a' toirt cuirp dha mar as toigh leis, agus do gach seòrsa sìl, a chorp fhèin.

³⁹ Chan e an aon fheòil a th' anns a h‑uile feòil, ach tha aon fheòil aig daoine, agus feòil eile aig ainmhidhean, feòil eile aig eòin, agus feòil eile aig èisg.

⁴⁰ Agus tha cuirp nèamhaidh ann, is cuirp thalmhaidh, ach tha aon ghlòir aig an fheadhainn nèamhaidh agus glòir eile aig an fheadhainn thalmhaidh.

⁴¹ Tha aon ghlòir aig a' ghrèin, agus glòir eile aig a' ghealaich, agus glòir eile aig na rionnagan; oir tha rionnag eadar‑dhealaichte o rionnaig eile a thaobh glòire.

⁴² Agus 's ann mar seo a bhios aiseirigh nam marbh: tha e air a chur ann an truaillidheachd, tha e air a thogail suas ann an neo‑thruaillidheachd.

⁴³ Thèid a chur ann an eas‑urram, tha e air a thogail suas ann an glòir. Tha e air a chur ann an laigse, èiridh e ann an cumhachd.

⁴⁴ Tha e air a chur na chorp nàdarra, tha e air a thogail suas na chorp spioradail. Ma tha corp nàdarra ann, tha corp spioradail ann cuideachd.

⁴⁵ Mar sin cuideachd tha e sgrìobhte, “Thàinig a' chiad duine, Àdhamh, gus a bhith na anam beò”; an t‑Àdhamh mu dheireadh, na Spiorad a bheothaicheas.

⁴⁶ Ach chan e an rud spioradail a bh' ann an toiseach, ach an rud nàdarra; agus an uair sin an rud spioradail.

⁴⁷ Bha a' chiad duine on talamh, dèante on ùir; an dara duine, an Tighearna, o nèamh.

⁴⁸ Mar a bha esan dèante on ùir, mar sin cuideachd tha iadsan dèante on ùir, agus mar a tha an duine nèamhaidh, mar sin cuideachd tha iadsan a tha nèamhaidh.

⁴⁹ Agus dìreach mar a ghiùlain sinn ìomhaigh an duine dèante on ùir, giùlainidh sinn cuideachd ìomhaigh an duine nèamhaidh.

⁵⁰ A‑nis tha mi ag ràdh seo, a bhràithrean, nach urrainn do dh'fheòil is do dh'fhuil rìoghachd Dhè a shealbhachadh, cha mhotha a shealbhaicheas truaillidheachd neo‑thruaillidheachd.

⁵¹ Seallaibh! Tha mi ag innse dìomhaireachd dhuibh. Cha chaidil sinn uile, ach thèid sinn uile atharrachadh,

⁵² ann an tiota, ann am priobadh na sùla, aig an trompaid dheireannach. Oir sèididh an trompaid, agus thèid na mairbh a thogail neo‑thruaillidh, is thèid sinne ar n‑atharrachadh.

⁵³ Oir feumaidh an corp truaillidh seo neo‑thruaillidheachd a chur air, agus an corp bàsmhor seo neo‑bhàsmhorachd a chur air.

⁵⁴ Ach nuair a chuireas an corp truaillidh seo neo‑thruaillidheachd air, agus a chuireas an corp bàsmhor seo neo‑bhàsmhorachd air, an uair sin thèid am facal a tha sgrìobhte a choileanadh, “Chaidh am bàs a shlugadh suas ann am buaidh.”

⁵⁵ “A bhàis, càit a bheil do bhuaidh? A bhàis, càit a bheil do ghath?”

⁵⁶ Is e gath a' bhàis, am peacadh, agus is e cumhachd a' pheacaidh, an lagh.

⁵⁷ Ach taing do Dhia, a tha a' toirt na buaidhe dhuinn, tro ar Tighearna Ìosa Crìosd.

⁵⁸ Mar sin, mo bhràithrean gràdhaichte, bithibh daingeann, neo‑ghluasadach, an‑còmhnaidh a' meudachadh ann an obair an Tighearna, is fios agaibh nach eil ur saothair dìomhain san Tighearna.