1 Corintianach 10 - An Tiomnadh Nuadh anns an Eadar-Theangachadh Ùr Gàidhlig 2017

Rabhaidhean o Eachdraidh Israeil

¹ Oir chan eil mi ag iarraidh gum biodh sibh aineolach, a bhràithrean, gun robh ar n‑athraichean uile fon sgòth, agus gun deach iad uile tron mhuir,

² agus gun robh iad uile air am baisteadh a‑steach do Mhaois san sgòth is sa mhuir,

³ agus gun do dh'ith iad uile an aon bhiadh spioradail,

⁴ agus gun do dh'òl iad uile an aon deoch spioradail. Oir dh'òl iad on chreig spioradail a lean iad, agus b' e a' chreag sin Crìosd.

⁵ Ach cha robh Dia toilichte leis a' mhòr‑chuid dhiubh: bha an cuirp air an sgaoileadh air feadh an fhàsaich.

⁶ A‑nis thachair na rudan seo mar eisimpleirean dhuinne, airson 's nach miannaicheamaid droch rudan mar a mhiannaich iadsan.

⁷ Na bithibh nur luchd‑iodhal‑adhraidh mar a bh' ann an cuid dhiubhsan; mar a tha e sgrìobhte, “Shuidh an sluagh sìos a dh'ithe 's a dh'òl agus dh'èirich iad a chluiche.”

⁸ Chan fhaod sinn pàirt a ghabhail ann am feise mhì‑mhoralta mar a rinn cuid dhiubhsan, agus thuit trì air fhichead mìle dhiubh marbh air an aon latha.

⁹ Chan fhaod sinn Crìosd a bhuaireadh, mar a rinn cuid dhiubhsan agus a chaidh an sgrios le nathraichean.

¹⁰ Agus na dèanaibh‑se gearan, mar a rinn cuid dhiubhsan 's a chaidh an sgrios leis an sgriosadair.

¹¹ A‑nis thachair na rudan seo dhaibh mar eisimpleirean, ach bha iad air an sgrìobhadh sìos airson ar teagasg‑ne, air a bheil deireadh nan linntean air tighinn.

¹² Mar sin gabhadh neach sam bith a shaoileas gu bheil e a' seasamh an aire nach tuit e.

¹³ Chan eil buaireadh sam bith air breith oirbh nach eil cumanta dhan duine. Tha Dia dìleas, agus cha leig e leibh a bhith air ur buaireadh thar ur comais, ach leis a' bhuaireadh bheir e cuideachd slighe airson teicheadh, airson 's gum faod sibh a bhith an comas fhulang.

Fèistean Iodhalan agus Suipeir an Tighearna

¹⁴ Mar sin, a mhuinntir mo ghràidh, teichibh o iodhal‑adhradh.

¹⁵ Tha mi a' bruidhinn mar gum biodh ri daoine ciallach; thoirib' fhèin breith air na tha mi ag ràdh.

¹⁶ An cupa beannachaidh a tha sinne a' beannachadh, nach e compàirteachadh ann am fuil Chrìosd a th' ann? An t‑aran a tha sinne a' briseadh, nach e compàirteachadh ann an corp Chrìosd a th' ann?

¹⁷ A chionn 's gu bheil aon aran ann, tha sinne a tha nar mòran nar n‑aon chorp, oir tha sinn uile a' gabhail pàirt dhen aon aran.

¹⁸ Smaoinichibh mu shluagh Israeil; nach eil iadsan a tha ag ithe nan ìobairtean nan luchd‑compàirt dhen altair?

¹⁹ Dè a tha mi a' ciallachadh ma‑thà? Gu bheil biadh a th' air a thairgsinn do dh'iodhal na nì sam bith, no gur e nì sam bith a th' ann an iodhal?

²⁰ Chan eil, ach gu bheil na rudan a tha iad ag ìobradh air an ìobradh do dheamhain is chan ann do Dhia agus chan eil mi ag iarraidh gum bi sibh nur luchd‑compàirt de dheamhain.

²¹ Chan urrainn dhuibh cupa an Tighearna òl agus cupa dheamhnan. Chan urrainn dhuibh compàirt a ghabhail de bhòrd an Tighearna agus de bhòrd dheamhnan.

²² Am brosnaich sinn an Tighearna gu eud? A bheil sinn nas làidire na esan?

Saorsa a' Chreidmhich

²³ “Tha a h‑uile sìon laghail,” ach chan eil a h‑uile sìon buannachdail. “Tha a h‑uile sìon laghail,” ach chan eil a h‑uile sìon a' togail suas.

²⁴ Na sireadh neach sam bith a mhaith fhèin ach maith a choimhearsnaich.

²⁵ Ithibh ge b' e dè a th' air a reic sa mhargadh‑feòla gun cheist sam bith a thogail air sgàth cogais.

²⁶ Oir “Is ann leis an Tighearna a tha an talamh, agus a lànachd.”

²⁷ Ma bheir aon dhe na h‑ana‑creidmhich cuireadh gu dinneir dhuibh agus gu bheil sibh ag iarraidh a dhol ann, ithibh ge b' e dè a th' air a chur mur coinneamh gun a bhith a' togail cheist air sgàth cogais.

²⁸ Ach ma chanas cuideigin ribh, “Chaidh seo a thairgsinn ann an ìobairt,” mar sin na ithibh e, air sgàth an neach a dh'innis dhuibh, agus air sgàth cogais –

²⁹ chan eil mi a' ciallachadh ur cogais‑se, ach a chogais‑san. Oir carson a bu chòir dham shaorsa‑sa a bhith air a cur fo bhreith le cogais neach eile?

³⁰ Ma tha mise a' compàirteachadh le taingealachd, carson a tha mi air mo chàineadh air sgàth an rud sin a thug mi taing air a shon?

³¹ Mar sin, co‑dhiù a dh'itheas no a dh'òlas sibh, no ge b' e dè a nì sibh, dèanaibh a h‑uile sìon gu glòir Dhè.

³² Na toiribh oilbheum do dh'Iùdhaich no do Ghreugaich no do dh'eaglais Dhè,

³³ dìreach mar a bhios mise a' feuchainn ris a h‑uile neach a thoileachadh sa h‑uile rud a nì mi – chan ann a' sireadh mo bhuannachd fhèin ach buannachd nam mòran, airson 's gum bi iad air an sàbhaladh.