Yohanesi 21 - Anegisemee'm Mina Kapuge

Yesiusi wai wa'm tupinaa se bage ekii dada, ku mbo waya pi-agidimami se mina da

¹ Ku semana ndo waa ko Yesiusi'm tupinaa se bage ekii waya uwa pana Yesiusi yadesi na wai Gadidea Uu Ndoo ii da kaa kiyoo pi-ade se. Wa'm ekii mbo uwa pana pi-ade simea se mina ku se de.

² Ea na gapi wa'm tupinaa se bage ekii dada, ku Gadidea Uu Ndoo da pasi kaa tomu se. Kiyoo tomu sita mugo ndoe, ona me ko me Simoni Petadusi. Ona me ko me Tomasi (Didimusi se ekaa da aoo se Tomasi mei). Ona me ko Nataneo (Gadidea maa kaa Kana okaa yoo tomi se mee me me). Kena Sebedeusi yombai akaa wiya ku nuwa, waya ogu tupinaa se bage akaa wiya ku nuwa, ku namba kiyoo tomu nakea.

³ Ekii dada ku kiyoo tomu sita mugo ndoe Simoni Petadusi wa'm asina ko “Maminapedi yaao kan maminapedi yaasi na aya me uu ndoo da nda pi-wamaanka ndeo,” aseke. Kena ekii'm asina ko “Enii namba a mesema meenka,” se aseke. Se asemana pedona uu daii nda kuma da kaa pakaaniina peta mugo ndoe maminapedi yaasi na aya me uu ndoo da nda wamoo-pamoo semuu nakea. Ndee nda se awawoona aumai se gumba ndoe maminapedi ona kaa miya yaan tau. Aii bada ndo.

⁴ Ku semana ndo waa ko ese au mbimbi se dodo me kaa Yesiusi wa'm tupinaa se bage ekii'm se dena ko ii da kaa kiyoo mee ona inewena tai ae se deke. Mee me me, me Yesiusi koya “O, me Yesiusi ae,” se ku ekii si nige-neke ndo. “Me aii miga mee to ae,” se nigimata mugo ndoe

⁵ Yesiusi wa'm ekii se asina ko “Nemugoi nakawaa woe. Maminapedi yaapea yee? Yaan tau yee?” aseke. “Iyo, ona kaa miya yaan tau,” aseke.

⁶ Kena wa'm asina ko “Maminapedi yaasi na aya me kuma da kaa kam meyaa yato waya wamaae,” aseke. “Me kaa wamaake kindo maminapedi aoo kaambi,” aseke. Wa'm se asemai yako kiyoo wamaata mugo ndoe maminapedi kooda ku se ene! Ese edo kan kuma da kaa wegeana yataao kana kidai.

⁷ Se dei yako Yesiusi wa'm ese embaake se tupinaa se mee to me ko wai wa'm Petadusi se asina ko “Me ko me enii'm ebo Tuhani ae se deo!” aseke. “Me enii'm Tuhani ae,” se mina yemata mugo ndoe Petadusi wai wa'm eduu se duka waya matake. Dee, yimkaa wa'm ndanda awaao kan bea-mapi kumana waya matana dama bamitake. Dama bamitana Yesiusi mbo peao kan kuma kaa kam uu ndoo da nda widana endaanina bedenani petai.

⁸ Petadusi wa'm se awatai ndoe ii da me ko me ese bende namba tau. Aii 100 mendede ebeabea da me ndo. Ku kumana ogu tupinaa se bage ekii nde miya uu daii nda kuma da kaa dona Petadusi ogudi dowoo nakea. Aii se dowoo nakea se ku tau. Ese puseopi se maminapedi yaasi na aya me namba uu dai nda koowewoo nakea.

⁹ Se awawoo semuuna ii da kaa peaneke. Ii da kaa pemana ndo waa ko “O, maminapedi ona me bidea epuu sese kaa yino nai ae,” se deke. “Kena edoondi namba aoo ae,” se deke.

¹⁰ Kena Yesiusi wa'm ekii se asina ko “Eki'm yaapea se maminapedi waa, ebanaa ku ni mbo naado-mewee,” aseke.

¹¹ Se asemana ko Simoni Petadusi wa ko wai uu daii nda kuma da me kaa waya pakaaneke. Waya pakaanina me maminapedi yaake aya me koowedona ii da kaa dowaai. Ii da kaa dowaana ko “Yai, ku ese em'mbee maminapedi waa aoo ae,” se deke. Waya ku em'mbee maminapedi waa ku eake se dodo me kaa 153 aoo ae se eake. Me aya me mike puseopi. Ku kisiu maminapedi kooda aoo koya me aya me mbeenaa kaa miya gebaan tau ae se deke.

¹² Kena Yesiusi wa'm ekii se asina ko “Tukuma noke kao ku mi-nowee,” aseke. Wa'm se aseke se dodo me kaa ko wa'm tupinaa se bage ekii mbugu kan “A mii?” se mina asiin tau. Waya na kiyaa, “O, me mike enii'm ebo Tuhani ae,” se ku ndo nigigea.

¹³ Kena Yesiusi wai ku edoondi ku nuwa, me maminapedi me nuwa, ku pi-masewena ekii mbo “Eewee,” se aseke.

¹⁴ Anegisemee wai Yesiusi maa poo yoo yandomana dai kaa waa ko wa'm tupinaa se bage mesema ade taao kan wai ekii mbo uwa pana pi-ade si pe se. Me mina kasipa me me, wa'm ea wido aoo me pi-ade simea se mina da.

Yesiusi mesema Petadusi akaa'm mina amoe-moe simea se mina da

¹⁵ Noke kao nom'tana waa ko Yesiusi wa'm Simoni Petadusi se asina ko “Yohanesi yombai, Simoni woe. Ku ogu bage kuwa ekii naembaake koya a'm naembaake me mbeenaa ebo yee?” se aseke. Se asemana Petadusi wa'm asina ko “Tuhani, me mike mina. Ni'm kaembaake se dimina me a naeo baa,” aseke. Kena Yesiusi wa'm asina ko “Ni'm dom'mba yopaa se bage waa ku dama naamaniwoo taae,” aseke.

¹⁶ Kena ndo waa ko Yesiusi waya ea wiya aoo me se asina ko “Yohanesi yombai, Simoni woe. A mike naembaake yee?” se aseke. Waya Petadusi wa'm asina ko “Tuhani, me mike mina. Ni'm kaembaake se dimina me a naeo baa,” aseke. Se asemana Yesiusi wa'm asina ko “Ni'm dom'mba se bage waa ku dama naadito siwoo taae,” aseke.

¹⁷ Se asemana waya ea wido aoo me wa'm se asina ko “Yohanesi yombai, Simoni woe. A mike naembaake yee?” se aseke. Yesiusi wai ea wido “A naembaake yee?” se mina asita sipi kumana Petadusi wai dim bodi kidai. Dim bodi kan wa'm se asina ko “Tuhani woe. A'm si nige-neke kao ona kaa miya emi tau. Kum seta kaa ni'm kaembaake se dimina me naeo baa,” aseke. Se asemana Yesiusi wa'm waya se asina ko “Ni'm dom'mba se bage waa ku dama naadito siwoo taae,” aseke.

¹⁸ Kena Yesiusi wai Petadusi se asina ko, “Ese mike ndumbo se mina ku kasiinka ndeo. Eduga ko a eginao bea da se dodo me kaa a'm manaa se kao ku a kaa to mata taao sekii. A'm peao gai se yoo peao sekii. Ku koya anikee waa a kudoo kaase se dodo me kaa ko a'm yaa-yaa ku kiga andoe ogu bage'm one kabamaasea. One kabamana a'm peao be se yoo yaa kawedona pi-kambeasiisea,” aseke.

¹⁹ Yesiusi wa'm se aseke se dodo me kaa me aii aseke se ku tau. Dee, Petadusi wa'm anikee waa buwaasi yoo me kaa kiyoo Anegisemee ekaa da ese ebo yakiyaasi. Ku kindo aii dodo se dodo me kaa wa'm buwaasi sese ku dama masimasi na Yesiusi wai uwa pana se yanige-manemi. Ku se ku yanige-manena ndo waa ko “A ni ogudi mita taae,” se asimi.

Yesiusi wa'm embaake se tupinaa se mee to wa kaa mina da

²⁰ Petadusi mesema Yesiusi akaai mina asi pe semuu sita mugo ndoe Petadusi wai wa ogato iyamai ndoe, “O, Yesiusi yaembaake se tupinaa se mee to wa namba ana ogudi mitai ae,” se deke. Me tupinaa se mee me me, me eduga Yesiusi mesema pasi kaa animana noke kao n'takea se dodo ndoe “Tuhani woe, kaekamaambi se mee to me mii?” se asimi se mee to mei!

²¹ Kena wai akaa ogudi mitai ae se dei yako Petadusi wa'm Yesiusi se asina ko “Tuhani woe, mee me me wa kaa aoo kaasi mina me kase mina aoo kaasi naa ya?” aseke.

²² Yesiusi wa'm asina ko “Mee me me wa kaa aoo kaasi kao ku a'm dito se kao baa,” aseke. “Dee, endo gapi kam ata kise ni'm waya ukaata gapi kam miyo epopi nda kuwa mee me me, me ni'm gai kan si bona ndo towoo semuu taao ndo sekii se yaambeaseke kipii kindo bada o bada. Me ni'm keo-keo. Me a'm dito se kao tau,” aseke. “Yibanda kiyaa, a ko a ni ogudi mita taae,” se aseke.

²³ Yesiusi wa'm Petadusi mbo asipi mina ku wadobo mee'm si nige-neke kan mee kam mee kam ogu Yesiusi mbaya bage waa ekii mbo odeeniyaabuu sipea se mina me ko me se de. Me tupinaa se mee me me, wa si buwaasi ae se mina se yemagea. Ku koya “Mee me me wa mike si buwaasi ae,” se mina me ko me Yesiusi wa'm eniin tau se mina da. Waya na kiyaa wa'm mike asimi se mina me ko me se de. “Endo gapi kam ata kise ni'm waya ukaata gapi kam miyo epopi nda kuwa mee me me, me ni'm gai kan si bona ndo towoo semuu taao ndo sekii se yaambeaseke kipii kindo bada o bada. Me ni'm keo-keo. Me a'm dito se kao tau,” se asimi. Yesiusi wai ku ndo asimi.

Yohanesi wa'm pake-takanu se mina da

²⁴ Yesiusi wai wa'm tupinaa se mee to wa kaa asimi se mina me ni kaa mina, me kapuge me wudumapa mee to me ni, ni kaa mina da. Kena me kapuge me nda wudumei sima se mina waa ku ni'm emaa misi'm dema-dema se mina waa kumana ni'm wudumei sima se mina ku otuma mike mina ndo ae se ku ndo nigaao sekii.

²⁵ Yesiusi wa'm awami-awami se mina waa ku naa ndo wudumapa. Ni'm wa kaa wudumaan tau se mina waa ku ese oba ndigi. Ku otuma kapuge waa kaa wudumeke waa, ku kaa aoo kaambea se kapuge waa ku oba kam oba kigea yako kayoo mbembo siyaa? Tau, maa en'ndo otuma simi kumana mbembo se yoo mike iyo kiyaa, se nigeo. Ni'm mina se naa aoo.