Yakobusi 4 - Anegisemee'm Mina Kapuge

Se-kao we-kao ku kaa dimotai se mee to me Anegisemee wa'm yape se mee to se mina da

¹ Nemugoi nakawaa woe, dama nigi si pe taae. Eki'm a-wisine naa-wisine se nuwa, mina a-bade naa-bade se nuwa, ku kayoo kam naa aoo kiyaabuu nakea se kao waa ee? Ku bende kaa ogu yoo kam aoo kiyaake se mina waa se ku tau. Ku eki'm dim'mba nda kiyoo kam aoo kiyaake se kao waa. Kase enta mugo ndoe, eki peu-pau se kao ku kaa dim petakea kumana me dimina me kaa kiyoo kam dama awaao gai se dimina da waa ku mesema akaa yape aoo. Kena ku kaa kiyoo aoo kiyaana ko eki'm a-wisine naa-wisine se nuwa, mina a-bade naa-bade se ku nuwa, ku se ku aoo kiyaabuu nakea.

² Dee, a'm ese “Oowoo,” se kao me kaa dim peta, dim peta semuuna “Emi tau, ae,” se deta mugo ndoe yima kiki kidai. Ese mee mbatumaao gai se yima kiki mei kidai. Waya ogu bage'm kao ku kaa dimota, dimota semuuna “Maseao kana ae,” se nigimata mugo ndoe a-wisine naa-wisine se nuwa, mina a-bade naa-bade se nuwa, ku se ku awawoo nakea, se kadetaka. Eki'm “Oowoo,” se kao ku mbao kaa emi tau ee? Tau, ona me ko eki Anegisemee mbo yaedaan tau, me ona.

³ Ona me ko Anegisemee mbo yaedaake ko yaedaapea koya eki'm dim petakea kao ku ndo awaao sekii kisi na yaedaapea kumana iyo. Eki'm yaedaapea mina ese si maaneke kumana ku se ku mbeenaa kaa miya kaniin tau! Me ona.

⁴ Yai, eki Anegisemee kaa dimina ona ndo tau. Peu-pau ku kaa nde miya dim petakea kumana ese tubaka awawoo nai se ambii to wa'm sese dimina mugo dodo se kadeo. Ku kaa dimina dama kapaae. Nakayoo maa kaa peu-pau se kao kuwa, ku se ku gai kipii kindo ko Anegisemee wa'm emaa misi kaa ai wa'm yape mee to mugo dodo se kadetai. Kiyoo kam mee ona wai “O, nakayoo maa kaa se-peu we-peu ku ni'm ese gai se kao waa. Ku ni'm yaa mu-mu taamba se kao waa, ae,” se nigeke kipii kindo ko me gado me kaa kiyoo mee me me, wai wa kaa to se mbeana ko “Ni Anegisemee mesema yape se mee to,” se mbeaseke mugo dodo.

⁵ Anegisemee'm mina kapuge se nanige-manena ko “Anegisemee wa'm naanegi semami se dodo me kaa ko dimina aoo se bage naanegi semami. Kena me dimina da nda kiyoo enii'm ogu bage kaa ‘Wai, wai. Ni waa oowoo,’ se nigeke dimina da me ese asiyoo, ebata tau.” Anegisemee'm mina kapuge se nanige-maneke. Ku mina ku ko ku aii mina se ku tau. Ku ese mike mina ae se ku ndo nigaae. Kase enta mugo ndoe, wa'm nepi se dimina enii Anegisemee kaa si yaembaana ndo wa-nini kao waa ku kaa dim petakea kindo me tubaka se dimina mugo dodo. Me wa mesema yape se dimina mugo dodo, se kaseao kan sipa.

⁶ Ku koya Anegisemee'm aii se dama natoyaabuu nai ku ese oba kam oba naawawoo nai kumana ku kaa kiyoo enii'm si maaneke se dimina ku mbeedi mbeaseao sekii. Dee, me mina me ko me Anegisemee'm mina kapuge kiyoo nde miya aoo. Me mina me ko me se de. “Ekii kaa to dodo se bage waa, ‘Ni ko ebo. Ni sekii. Ogu bage ku mbeedi, ae,’ se nigeke se bage kuwa, ekii'm awaao gai ku aii bada kiyaasi na ku Anegisemee wa'm yayaamake se bage waa. Yibanda kiyaa ‘O, ni ko mbeedi. Ni aii mee to ae,’ se nigeke bage kuwa, ku mugo bage ku Anegisemee'm aii se dama yatoyaabuu nai se bage waa.” Ku Anegisemee'm kapuge me nda se wudumami se mina waa.

⁷ Kum seta kaa, eki kaa to mbeedi mbeana Anegisemee'm guna miyo towoo taae. Wa guna miyo towoo sita mugo ndoe, Ibedisi wa'm kaoya-oya taao kan sipi ku mbeedi mbeaseao kan tukuu wemana kusipimana tuwaae. Se awake kipii kindo ko Ibedisi wa'm kaoya-oya taao kan sipi ku wisin'tana aii kagimitana oika peembi, sima.

⁸ Anegisemee wai eki mbaya emba matana dama katoyaasi na, eki kita wa mbaya emba mataae. Eki ko woo-woo semuu nakea se bage waa kumana ku mbanamana dama ndo awawoo taae. Eki ko Anegisemee kaa dim wiya-wiya semuu nakea se bage waa kumana si maaneke se dimina ku wisin'tana dama awawoo taae.

⁹ Waya wada nda eki'm peu-pau sipea ku kaa kiyoo dimina dano-dano kaae. A'm kea se ku badaa? A'm bani-bani se ku badaa? Yai, ku se ku wisin'tana a'm woo-woo se ku kaa nigi simagea yako dim bodi kina yee semuu siwoo taae.

¹⁰ Dee, Anegisemee'm emaa misi kaa eki kaa to mbeedi mbeaseke kipii kindo ko wai eki'm dimina etaa kakiyaana ebo katoyaabuu taambi.

Mee agumee'm sese pikamoona wa kaa peu mina aseke me si maaneke. Ku si awaae, se mina

¹¹ Yesiusi kaa eniikinaa bage waa woe. Ogu Yesiusi mbaya bage waa ekii kaa peu mina ku mee mbo pi-aseke kipii kindo, me si maaneke. Me mugo mina si aseae. Kase enta mugo ndoe, Yesiusi mbaya bage ku kaa peu mina aseke kipii kindo ko ku mina ku kaa kiyoo Anegisemee'm okaa mee tupisi na mina me kaa nde miya peu mina asiyaa mugo dodo, me ona. Waya ona me ko mee'm sese ndamana “O, me peu, wa si maaneke aoo,” se aseke se dodo nde miya Anegisemee'm tupina mina ku kaa nde miya pikamoo siyaa mugo dodo! “O, ku mina ku si maaneke aoo kumana yito taao be,” se pikamoo siyaa mugo dodo, me ona. Yai, Anegisemee'm okaa mee tupisi na mina ku a'm guna miyo mbeana tamoo se ku badaa!

¹² Anegisemee'm okaa mee tupisi na mina me ko me Anegisemee wa'm ndo nanige-manemi se mina da. Waya wada nda enii'm awamea-awamea ku ndamana pikamoo se mee to me nde miya ese ona ndo se Anegisemee mei! Enii'm woo-woo se mbeedi naambeana omiwoo towoo natoyaao sekii se mee to me nde miya me Anegisemee mei! Enii'm woo-woo se kaa em nadaao kan bidea uwo ndoiba nadomoo taao sekii se mee to me nde miya Anegisemee mei! Ku kasipa kuwa ku Anegisemee wa'm ndo yaa mu-mu nai se kao waa. Ku kumana wa'm ndo awaao sekii se kao ku oma masewena ekimugoi nakawaa ekii'm sese pikamoo se me maaneke baa! Eki ko eki aii bage koe!

Anegisemee'm gai-gai ku si diton ndo “Ni'm gai-gai awaamba,” se aseke kindo me si maaneke se mina da

¹³ Ebanaa bage eki'm se asina ko “Endo ko ni medaa penaa taao pasi. Endo gapi ee, anikee gapi ee, medaa penaina ogiyoo okaa yoo ona me kaa pi-towee taata. Me okaa yoo me kaa pemana ko daamee endii pakei ona omiwee sita mugo ndoe me kaa se-gai we-gai a-mane naa-mane. Kipe a-bade naa-bade. Waya ku kaa kiyoo kipe oba awiwoo taata,” se aseke. Ku mugo mina atakea se bage waa woe. Ni'm mina dama nayito taae.

¹⁴ Eki'm asina ko “Ni se awaamba. Ni se awaata,” se asei se koya ku aii yima mina ndo asei sipea, tau se. Dee, eki'm toke yoo ku mbeenaa onduu nuwaa wa'm sese mugo dodo. Ese mbeenaa ndo pakemai ndoe egida seopi. Ku mugo yaa, eki'm toke yoo ku oba toke se ku tau. Ku mani dano kaambea se kao. Endo buwaambea ee, anikee buwaambea ee? Si nige-neke.

¹⁵ Ku kaa kiyoo eki'm se asigea waa bada ae se mina ku se de. “O, Tuhani wa gai kipii kindo ko wa'm gai ku kaa kiyoo ni si bona ndo se awaamba. Se awaata,” se aseke. “Tuhani be kipii kindo iyo. Aii bada kaamba, ae,” se aseke. Ku mugo mina ku ndo aseao bada.

¹⁶ Ku mugo mina aseao daan sipea koya tau. Eki kaa to dodo se kan “Ni ko ni disi. Ni oyu. Ni'm gai-gai ku mike awaamba ndeo. Waya wadobo nde miya mike awawoo taata ndeo,” se eniwoo nakea. Yai, ku mugo eki kaa to dodo se mina waa ku ese si maaneke se mina waa. Ese peu se mina enei nakea se kadeo.

¹⁷ Ni'm kasipa mina waa ku dama sese awawoo sisea na se mina waa. Kena ku kaa kiyoo mee ona wai dama se kao awaao epi ko epi koya dime kan wisin'take kindo ko “O, mee me me, wai woo-woo semapi ae,” se ku ndo yanigaao sekii. Kum seta kaa, ni'm dama awasi na mina kasipa kuwa ku dama dito taae. Ku si awake kindo ku kaa woo-woo taambea koena.