Yakobusi 2 - Anegisemee'm Mina Kapuge

Mee kaa dene-wene se me ese si maaneke se dimina, me kaa mina da

¹ Yesiusi kaa eniikinaa bage waa woe. Eki ko eki Tuhani Yesiusi Keditusi kaa “Mike ae,” se nigeke se bage waa. Ese asiyoo kam asiyoo abayai toi se Tuhani me me, me kaa “Mike ae,” se nigigea se bage waa, eki. Ku kaa kiyoo kam ogu bage ndamata mugo ndoe, “O, mee me me, wai ebo kumana ni gai. O, mee me me wai mbeedi kumana ni be,” se dimina se ku si nigaae. Me mugo mee kaa dene-wene se me ko me si maaneke kumana ku mbeenaa kaa miya si awaae.

² Ku masimasea na mina ebeabea da ona me ko me se de. Ea na gapi Yesiusi kaa yapapa taao kan andagatake se dodo me kaa mee akaa wiya ukeke. Akaa wiya ukimana ko ona me ndamata mugo ndoe wa yaamo da kaa matapi me eamasi matapi ae, se deke. Ese yai, deao disi se manaa se kao ku nde miya matapi ae, se deke. Ku se ku degea yako “O, wa sinowi se mee to ae,” se nigeke. Se nigeke koya ona me ndamata mugo ndoe, O me ese bakata se mee to ae se deke. Wa'm manaa se kao ese niga, maa aoo, se manaa se kao matapi ae, se deke.

³ Ku se ku degea yako eki'm sinowi se mee to me dama yaditona se asina ko “Nemugoi kiyoo mee. Ese dama se animake yoo me kaa kiyoo animaae,” se aseke. Se asemana ko eki'm bakata mee to me se asina ko “Woe. A ogu kaa inewena taas! Eé, animaao gai kipii kindo ko ni'm bado pasi kaa kiyoo ae da kaa ndo animaa,” se aseke.

⁴ Sinowi mee to wa-nini, bakata mee to wa-nini, ku mugo mina aseke waa, me mee kaa dene-wene se se dimina aoo kiyaa. Ese si maaneke se dimina da me ko. Kena mee kaa dene-wene se me ko me ese dama se dimina kiyoo kam mee kaa dene-wene se se ku tau. Me ese peu se dimina me kaa ndo dene-wene siyaa. Kase enta mugo ndoe, me mugo dene-wene se waa, eki'm nigiyaa me ko me se de. “O, mee me me, wai oto kao niimbi kumana dama se mee to ae. Kena bakata se mee to wai si niimbi kumana peu se mee to ae,” se nigiyaa. Yai, me mugo mee kaa dene-wene se me ese si maaneke se kao, se ene!

⁵ Ni'm ese kaembaake se eniikinaa bage waa woe. Ni'm mina ku dama nayito taae. Anegisemee wa'm sese mee pikamoo se me ko me enii'm sese pikamoo se tau. Wa'm dito se kao wa-nini koena. Dee, ese eduga edugana ko Anegisemee wai ese ba-gamitaao kana se mina me se asina ko “Ni kaa naembaake se bage waa ku en'ndo otuma ku ni'm guna miyo ese dama yatoyaabuu taata se bage waa,” se asimi. Waya kiyoo kam Anegisemee wa'm se mbeana ko “Mee'm emaa misi kaa bakata se bage waa ku ni kaa ‘Mike ae,’ se nigeke kipii kindo ko me ni'm emaa misi kaa ese sinowi se bage waa mugo dodo se detaka. Ku ni'm ese dimi se bage waa se detaka. Ku ni'm guna miyo yambeana dama tosi na aya yadotaa taata se bage waa,” se aseke. Anegisemee wa'm aii dodo se mbeasimi.

⁶ Dee, ku mugo bakata bage waa ku Anegisemee wa'm dimi se bage waa koya a'm nigeke wa-nini. A'm se nigina ko “Tau, ku mbeedi se bage waa, ku eaa!” a'm se nigeke. “Sinowi se bage ekii'm ekaa da waa ku ebo yambeaseao ndo bada ae,” a'm se nigeke. Yai! Me kase bage kao? Ese widigi katoyaabuu nakea se bage waa ku bakata bage waa se ku tau. Ku sinowi se bage waa ekii'm ndo se kaawawoo nakea, me ona. Kena ona me ko “Nagapee! Nagapee!” se katakea mina ku nde miya sinowi se bage ekii'm kasiwoo nakea se mina waa, me ona.

⁷ Kena ona me ko sinowi se bage waa ekii Yesiusi ekaa da peu kiyaao kan si maaneke mina eniwoo nakea, me ona. Yai! Yesiusi wa ekaa da ko me enii'm ese asiyoo kam asiyoo yapapa se se ekaa da. Me ekaa da me kaa kiyoo enii Anegisemee wa'm mbaya bage nakiyaami se ekaa da. Ku koya tau. Ku sinowi se bage kasipa kuwa ekii ku mugo peu-pau awawoo nakea koya enii ekii ekaa da waa ebo yambeana yapapa se. Yai ku badaa!

⁸ Anegisemee'm mina kapuge ndamata mugo ndoe mee tupisi na mina ona me ko me se de. “A kaa to embaake se dimina ku kisiu masewena a'm yau-yau bage ku kaa nde miya yaembaae,” se natupitai. Me mina me ko me ese ata emi tau ebo toke se Keditusi, wa'm enimi se mina da. Ku kindo ko eki me mina me dama yaa mu-mu semagea yako mee agumee kaa yaembaake kipii kindo ko “O, eki ese dama awagea ae,” se kadeo.

⁹ Koya mee kaa dene-wene se kan “O, mee me me ni gai. Mee me me ni be,” se pikamoo se kipii kindo tau. Mee kaa dene-wene se me ko me Anegisemee wa'm tupina mina kasipa me me, me tamana peu se kao awake mugo dodo. Waya kiyoo kam Anegisemee'm tupina mina tamoo sipe kumana wa mesema mina aoo kidai.

^10-11 Kase enta mugo ndoe, Anegisemee wa'm okaa mee tupisi na mina nemi se dodo me kaa mina ona ndo nemi se ku tau. Mina oba nemi. Ona me ko “Tubaka ku si awaae,” me ona. Ona me ko “Mee si mbatumaae,” me ona. Ku mugo tupeke mina waa oba aoo. Ku otuma Anegisemee wa'm nanige-manemi mina waa. Ku kumana tubaka ku si awan ndo mee mbatumake kipii kindo naa tamake, naa si tamake se ku tau! Wa'm tupeke mina otuma mike tamape kidai. Ku kaa waya kasiinka ndeo. Wa'm tupeke mina ku otuma dama yaa mu-mu se koya ese mina mbee to me ndo tamape kipii kindo tau. Anegisemee wa'm kadena ko wa'm mina otuma tamape se kadetai. Kena wa'm mina tamoo sipe kumana ku kaa kiyoo ai Anegisemee mesema mina aoo kiyaape kidai. Se.

¹² Endo se gumba ko enii'm moo wado kiyoo me enii'm woo-woo se ku mbeedi naambeana Anegisemee'm gai-gai yaawaao sekii kisi na se okaa mina kiyoo aoo. Ku okaa mina ku kaa kiyoo kam Anegisemee'm gai-gai awaao sekii kumana anikee waa se gumba Anegisemee wai enii'm tomea sese ku nandamata mugo ndoe wai “Ni'm gai-gai awamea ee? Si awamea ee?” se ku nigimana napikamoo taasi. Se napikamoo taasi kumana eki'm eneke-eneke nuwa, awake-awake nuwa, ku otuma wa'm gai-gai ku ndo yaawawoo taae.

¹³ Waya ku kaa uketake mina me ko me se de. Mee'm awake-awake kapikamoo taasi se gumba me kaa kiyoo ko mee agumee kaa gane tau kan oyu kan yaawamea se bage waa ku mugo bage ku Anegisemee wa nde miya gane tau kan em yadaasi se bage waa kui. Yibanda kiyaa, mee agumee kaa gane kan tunaa kan yaawamea bage waa ku ko ku tau. Ku ese bani-bani siwoo taasea se bage waa. Ku mugo bage ku Anegisemee'm em si yadaasi se bage waa koena. Ku wa'm aii se gane kan dama yatoyaabuu taao kan wa'm em yadake yoo yadano kiyaasi koena.

Ebe'm ndo “Mike ae,” se nigeke se dimina me aii bada kaasi se dimina da, me kaa mina da

¹⁴ Yesiusi kaa eniikinaa bage waa woe. Mee ona wai “Ni Anegisemee kaa ‘Mike ae,’ se nigeo,” se aseke koya wa'm uwa da kaa awake, ku dama se kao si awake kipii kindo ko me mugo sese me maaneke yee? Tau na! Me mugo ebe'm ndo “Mike ae,” se nigeke se dimina me me, me omiwoo towoo toyaasi na se dimina tau. Me ese mike aii bada kaasi se dimina me ndo.

¹⁵ Ku kaa mina ebeabea da ona kasiinka ndeo. Ea na gapi eki'm se dena ko Yesiusi kaa eniikinaa bage ona wai ese bakata aoo ae, se deke. Wa'm manaa se kao ku nde miya peu. Nam tapoo nde miya omiwoo nai ae, se deke.

¹⁶ Se dena ko ogu Yesiusi mbaya bage ona wa'm me bakata se mee me se asina ko “Ni'm egi nda widigi tau kan peae! Ai si odibi kaae. Noke kao bikeke kan dama tuta taae,” se aseke. Me mugo aseke ko aseke koya dama tosi na se kao ona kaa miya maniin tau waa, me maaneke yee? Tau na. Ku mike aii bada kaasi se mina me ndo asiyaa mugo dodo.

¹⁷ Ku mugo yaa, mee ona wai Anegisemee kaa “Mike ae,” se nigeke ko nigeke koya dama se kao si awake kipii kindo tau. Wa'm “Mike ae,” se nigeke se dimina me mike aii bada kaambi se dimina da. Aii ebe'm ndo asipi se dimina da koena.

¹⁸ Ebanaa bage ku ni'm asipa mina ku kaa beagea yako ekii'm nasiimbea mina ku se de. “Tau, Yakobusi, a eo. Omiwoo towoo sisi na sese enda wiya aoo. Ona me ko ‘Mike ae,’ se nigeke dimina da me kaa nde miya sekii. Kena ona me ko ‘Mike ae,’ se si nigina ni'm dama awawoo sipa se kao ku kaa nde miya sekii. Ku sese wiya kuwa ku Anegisemee'm emaa misi kaa omiwoo towoo sisi na sese waa ae,” se nasiimbea. Ku koya mee ona wa'm se naseke waa, ni'm ambewaake mina me ko me se de. “Tau, a'm dama se kao awaan tau yoo a'm ‘Mike ae,’ se nigeke dimina naadeyaao kana. Ku koya ni'm dama awawoo taamba sese ku kaa kiyoo kam ni'm ‘Mike ae,’ se nigeke dimina me uwa da kaa kadeyaamba ndeo,” se asiimba. Dee, mee'm “Mike ae,” se nigeke se dimina da me kaa kiyoo kam uwa da kaa dama se kao nde miya awake kipii kindo ko ku akaa ndepi dipinimana awake kindo ko me maaneke. Tau kipii kindo tau.

¹⁹ Waya mina ona me ko me se de. A'm “Mike ae,” se nigeke dimina ona me ko me se de. “Anegisemee wa ko wai ese ona ndo aoo, ae,” se nigeke. Me mugo nigeke me dama se kao koya tau. Me mbeedi. Kase enta mugo ndoe, me mina me ko me mbaa waa ku nde miya ekii'm “Mike ae,” se nigeke se mina da mei! Mbaa waa ku Anegisemee kaa “Mike ae,” se nigeke koya ekii'm peu-pau awawoo nakea ku ndigi. Kena ku kaa kiyoo ekii Anegisemee kaa ese yawidaana pipi se nde miya aoo. Dee, Anegisemee kaa “Mike ae,” se nigimana si maaneke ndo awawoo nakea kindo me maaneke se kao baa!

²⁰ Yai, a ko ese dim kapaan tau se mee to ae se kadeo. Ku kumana a'm dimina kapise na, ku kaa mina katupaanka ndeo. Ni'm katupaao kan sipa mina me ko me se de. Mee ona wai Anegisemee kaa “Mike ae,” se nigeke koya dama se kao si awake kipii kindo ko wa'm “Mike ae,” se nigeke dimina me aii bada kaambi se dimina da. Aii ebe'm ndo asipi se dimina da mei!

²¹ Ku kaa masimasea na enii'm tai, Abedaham me me, wa'm sese ku kaa dama nigi si pe taae. Ese eduga ko Abedaham wai wayombai, Isiaki me me, me yapamitana mesiba bidea tukuu me kaa yadotaami, Anegisemee tao bidea kaa yaaponoyaao kan. Wa'm awapi ku dei yako Anegisemee wa'm wa kaa se asina ko “A ko ai dim ndumbo se mee to, se kadeo,” se asimi.

²² Dee, Abedaham wa ko wai ebe'm ndo “Mike ae,” se asimi se ku tau. Wa'm dimina da nda nigeke ku uwa da kaa awami kui. Wa'm “Mike ae,” se nigeke dimina mesema dama se kao awake mesema dipinimami kumana wa'm “Mike ae,” se nigeke se dimina me uwa da kaa deao sekii kidai. “Ebe'm ndo asimi se dimina tau ae,” se yanigaao sekii kidai.

²³ Abedaham wa kaa se yanigaao sekii koya me bage dama se kao awaan tau yoo nde miya Anegisemee'm mina kapuge me nda kiyoo wa kaa amanimami mina ona aoo. Me mina me ko me se de. “Abedaham wai Anegisemee kaa ‘Mike ae,’ se yanigimai yako Anegisemee wa'm Abedaham kaa se yanigina ko ‘Tau! Abedaham wa ese dim ndumbo se mee to ae, se deo,’ se yanigimi.” Dama se kao awaan tau yoo Anegisemee wa'm se asimi. Kisena ndo waa ko Abedaham wa'm Isiaki kaa yaawami me kaa kiyoo “O, Anegisemee wa'm aii dodo enimi mina ku mike mina ae,” se ku uwa pana deao sekii kidai. Waya wada nda Anegisemee'm mina ona me ko me se de. “Abedaham wai Anegisemee mesema akaamoo se mee to,” se wudumami.

²⁴ Ku kindo ku mina ku kaa kiyoo enii'm deao sekii se mina me ko me se de. A ko aii ebe'm ndo “Mike ae,” se aseke kipii kindo ko Anegisemee wai dim ndumbo se mee to si kakiyaambi. Koya a'm “Mike ae,” se nigeke se dimina da me kaa kiyoo kam uwa da kaa dama se kao mesema awawoo nae kipii kindo ko me Anegisemee wa'm emaa misi kaa maaneke se dimina da. Me mugo dimina aoo se mee to me Anegisemee wa'm dim ndumbo yakiyaambi se mee to mei!

²⁵ Ku mugo yaa, ese eduga tomi se Edahabi, wa'm dimina dim ndumbo kiyaake me ko me Abedaham wa'm sese kui, tau se. Kase enta mugo ndoe, Edahabi wa ko wai kipe aweao kan mee mbo tubaka awatai se ambii to. Wai me bage ambii se tomi koya tau. Me Anegisemee wa'm dim ndumbo yakiyaapi ambii to ae, se ku nigaao sekii. Kase enta mugo ndoe, Kanakani maa ndamanaa se se Ibedani bage ku ko ku Edahabi mbo ukeke se dodo me kaa, Edahabi wa ko wai wa mbaya bage, akaa'm yape bage kuwa, ekii'm yaa da kaa yambeasiin tau. Aii dama yaedimeke ndo. Dama yaedimaao kan wa-nini se enda me nda pi-yaometana “Me enda da me nda aka'm ee kaa peae. Yape bage'm kawiimbea koena,” se asimi. Dee, wa'm dama awake sese ku degea yako “O, Edahabi wa ko wa'm ‘Mike ae,’ se nigeke dimina me ebe'm ndo aseke mina se ku tau. Ku kindo ko me Anegisemee wa'm dim ndumbo yakiyaapi se ambii to ae,” se yanigaao sekii.

²⁶ Ni'm kaseao kan sipa mina me kaa mina ebeabea da me ko me se de. Mee ona wa'm maa buboo ndamata mugo ndoe, dim nuwaa, emi tau ae, se deke kipii kindo ko “O mee me me bomapi ae,” se ku ndo nigaao sekii. Ku mugo yaa, mee ona wa'm asina ko “Ni ko ni Anegisemee kaa ‘Mike ae,’ se nigeke mee to,” se aseke koya wa'm sese ndamata mugo ndoe, dama awake sese emi tau ae se deke kipii kindo ko tau. Me mugo me ebe'm ndo “Mike ae,” se nigeke se dimina me ese bota kam bota da se dimina. Ese dim nuwaa, emi tau se mee bota da mugo dodo.