Wahayu 17 - Anegisemee'm Mina Kapuge

Tubaka awaao kan edeke se ambii to nuwa, ese dim peu se emii to nuwa, akaai kaa mina da

¹ Ken ndo waa ko keo-poo dada dopea se epo wado bage, ona me ni mbo memake. Ni mbo memana se nasina ko “Mee. Ni mesema peao nde. Anegisemee wai ese em'mbee mee en'ndo otuma epi se kota okaa yoo me kaa em yadaambi,” aseke. “Me kaa em yadaambi kumana ku dese nde ni mesema mee,” se naseke. “Me okaa yoo me'm sese ko ese tubaka awaao kan edeke se ambii to wa'm sese mugo dodo se okaa yoo. Kena me tubaka aoo se ambii me me, wa'm tomu se yoo me uwo oba aoo se yoo ku wado animana tomu nai mugo dodo,” se aseke.

² “Kena wa mesema tubaka awapea se bage ku ko ku maa kaa ese ata emi tau ebo togea se bage waa ku nuwa, aii maa en'ndo otuma mee en'ndo otuma ku nuwa, ku se ku me ambii mbato me mesema tubaka awawoo sipea mugo dodo,” aseke. “Wa mesema tubaka awawoo sipea kumana ekii'm dimina ku ese si yamaaniyaabuu nai. Ese aniguda poo odi nona edidi kiyaabuu nai mugo dodo. Ese mike dim'mba tau se yakiyaabuu nai koena,” aseke. “Kum seta kaa wa kaa em yadaambi yoo a namba dese nde, ‘Ni mesema mee,’ se kasipa ndeo,” se nasimi.

³ Se nasemana ko Anegisemee Dim'mba wai namugu-mugu siyaai yako me epo wado mee me me, wa'm ni nadopeana mee tuwaan tau yoo maa ndani se maa me kaa pi-nambeaseke. Me kaa pi-nambeana se dembea ndoe ese em'mbee emo da se emii mbato deke. Me emii me ko moo gea dada se emii to. Kena ku moo gea dada ku kaa wado piya poo haas aoo ae, se dema. Kena wa'm maa buboo kaa wudumapea ku ko ku ekaa da waa oba wudumapea se dema. Ku ese peu se ekaa da waa. Ku Anegisemee ekaa da peu kiyaasi se ekaa da waa se wudumei sipea. Ku mugo ekaa da waa dema. Kena wa'm em'kaa kiyoo animana tomu nai se ambii to ona aoo se dema.

⁴ Me ambii me ko wa'm manaa se kao ku uuwou epoo da me namba aoo, emo da me namba aoo, ku mugo manaa nai, se dema. Waya wa maa buboo kaa se manaana ko eamasi nuwa, edeao kana se se-oma we-oma ku nuwa, musiada oma mugo kaampo ku nuwa, ku se ku namba manaa nai se dema. Kena wa'm yaa da kaa kiyoo eamasi awe da yaatoo nai se dema. Me awe da me puseoyaapi koya uwo kaa puseoyaapi se ku tau. Ese eaa apea se kao waa ku kaa puseoyaapi se awe da. Ese eaa apea se kao kuwa ku wa'm tubaka awana aoo kiyaabuu nai se kao waa. Ku mugo kao ku kaa puseoyaapi se dema.

⁵ Kena wa etu kaa kiyoo wudumapi me ko mee'm nige-neao kana se ekaa da waa wudumapi se dema. Ku ekaa da waa ku se de. Babeo okaa yoo, me ona. Ese em'mbee mee en'ndo otuma epi se okaa yoo, me ona, wiya. Tubaka awaao kan edeke se ambii waa aoo kiyaake okaa yoo, me ona, wido. Maa kaa se-apea we-apea en'ndo otuma aoo kiyaake okaa yoo, me ona, wui. Wa'm sese epi kisi na se ekaa da waa se dema.

⁶ Waya wadobo se dena ko me ambii me me edidi aoo ae se dema. Mbao kaa edidi ee? Tau. Wa'm emu ogayaabuu sipi ku nona edidi kii se dema. Wa'm emu ogayaabuu sipi ku ko ku Anegisemee wa'm bage waa, Yesiusi kaa dimina ona ndo kumana mbatumei siwoo sipi se bage kuwa. Ku kooda waa mbatumei-pai siwoo sipi kumana bani-bani se aoo. Kena wa'm bani-bani se ese asiyoo kumana ese edidi mugo dodo ae se dema. Me ambii me deta mugo ndoe ni ese “Abayai! Me kase bage kao?” se nigima.

⁷ Ni'm se nigeke koya me epo wado mee me me, wa'm se nasina ko “Tau de. A'm ‘Abayai!’ se nigeke ku tau de. Kase enta mugo ndoe, ku kaa mee'm si nige-neke se mina kuwa ku ni'm kanige-maniimba mina waa,” aseke. “Me ambii me kaa mina nuwa, kena wa'm donaa se emii to, moo gea dada, piyapoo haas aoo se emii to me me, me kaa mina nuwa, ku mina ku kanige-maniimba,” aseke. “Ku kindo ‘Abayai!’ se dimina me mbeas. Me si nigaae,” se nasimi.

⁸ “Dee, a'm depe se emii me me, me eduga tomi se emii to. Eduga tomi se emii me epopi nda dodo si detakea koya waya ukaao pasi se emii to. Wai ogiyoo kiyoo otou - kima otou tau se gumo da kaa kiyoo kam pakemaao pasi se emii to. Kiyoo kam pakemana ko Anegisemee wa ko wai me emii me me, okaa em yadamana yadano kiyaasi,” se nasimi. “Me emii me me, me eduga tomi, epopi nda se dodo me kaa si deke, anikee waa waya diisea se emii to. Kena waya ukipi ae se degea yako maa kaa togea bage waa ekii wa kaa ese ‘Abayai,’ se yanigaasea. Anegisemee wa mbaya tau se bage waa ekii'm ndo se yanigaasea. “Ese eduga edugana ko maa nuwa, epo nuwa, ku se ku anegi semaan tau se dodo me kaa omiwoo towoo tuwaasea bage waa ekii ekaa da waa ku kapuge ona me nda wudumami, Kisena ndo waa ko me emii me kaa ‘Abayai,’ se yanigaasea bage kuwa ku me kapuge me nda wudumaan tau se bage waa. Ekii'm ndo ‘Abayai,’ se yanigaasea. Se.

⁹ “Ku kasipa mina kuwa ku dim pame aoo se bage waa ekii'm ndo masimaao sekii se mina kumana ku kaa dim pame aoo se dimina kapaae! Dee, me emii me me, wa'm moo gea dada kuwa ku kaa mina ebeabea da wiya aoo. Mina ebeabea da ona me ko me moo gea dada ku ko ku ndii waa dada mugo ku kaa mina ebeabea da, me ona. Ku ndii waa dada kuwa ku ni'm kasipa tubaka aoo se ambii to wa'm animana ta se ndii waa mugo dodo,” se nasimi.

¹⁰ “Kena mina ebeabea da ona me ko moo gea dada kuwa ku ebo toke se edaya bage waa ekii dada mugo dodo, ku kaa mina ebeabea da, me ona. Ku ebo toke se edaya bage dada kuwa, edibi ku eduga bomea se ebo bage. Ona me ko me endo se gumba ebo toi se mee to. Ona me ko anikee waa ukaasi se ebo mee to. Anikee waa ukaasi me ko wai paga mbeenaa ndo ebo tuwaao sekii. Kam dano kaasi,” se nasimi.

¹¹ “Kena, wagoo aoo me edaya mee to me nde miya aoo kaasi koya yipi se edaya mee to me tau. Ku dada kuwa ona me ko ea wiya ebo tuwaasi kumana mee me me wagoo aoo me edaya mee to aoo kaasi se kasipa. Wagoo aoo me edaya mee me ko me ese dim peu se emii mugo dodo. Me dim peu se emii me me eduga tomi, kena epopi nda diin tau, waya anikee waa ukaasi se mee to kumana wagoo aoo me se asipa. Me wagoo aoo se edaya mee me ko me waya ukimana dai kaa waa ko wa'm ese okaa em yadana yadano kiyaasi yoo kiyoo pi-yatoyaasi,” aseke. Me epo wado mee me me wa'm se nanige-manemi.

¹² Kena me epo wado mee to wa'm waya se nasina ko “Me emii me kaa piyapoo haas depe kuwa ku ebo toke edaya bage ekii haas ku kaa mina ebeabea da mugo dodo,” aseke. “Ku haas kuwa ku eduga ebo tuwaan tau se bage waa. Ku ebo tuwaan tau koya ebo tosi na se yaa mani da manina dai kaa waa ko ekii me dim peu se emii to me mesema anewena ekii ndepo ebo tuwaambea. Ekii ndepo ebo toke koya ekii'm ebo toke yoo me kidaa-kidaa se ebo toke. Mbeenaa 1 yam mugo dodo, ku kisiu ebo tuwaasea.

¹³ Ku kisiu ebo tona ndo waa ko ekii'm oyu se yaa mani da ku nuwa, ekii'm mee wado ebo toke yoo ku nuwa, ku se ku masewena me dim peu se emii me tao ‘Ee,’ se asiisea. Ese dimina ona ndo kan ekii kaa to mbeedi mbeana me emii me guna miyo togea se bage waa kaasea,” se asimi.

¹⁴ “Ku semana ndo waa ko ku ebo bage haas kuwa ekii Dom'mba Yuwa me mbeedi yambeaseao kan yape pi-masiisea. Yape pi-maseke ko masiisea koya aii bada kaasea ndo. Kase enta mugo ndoe, se-ebo we-ebo se bage en'ndo otuma ku Dom'mba Yuwa wa guna miyo se bage waa. Ku otuma mbeedi. Dom'mba Yuwa wa ndo ese ebo kam ebo se edaya mee to. Wa ndo ese ebo kam ebo se Tuhani. Kum seta kaa ku edaya bage haas kuwa ku Dom'mba Yuwa mbo yape pi-masiisea se dodo me kaa iyo kaasea. Wa'm ndo ku haas kuwa mbeedi yambembo-pambo semaasi koena,” se nasimi. “Ku se ku mbeedi mbeaseke se dodo me kaa me Dom'mba Yuwa wa mba nda penaa nakea bage ku ko ku aii bage waa se ku tau. Ku wa'm mina woewepi se bage waa. Ku wa'm ese dimi, wa-nini pikimami se bage waa. Ku wa kaa dimi wiya-wiya se mbeenaa kaa miya emi tau se bage waa. Ku mugo bage ku wa mbaya anewena wa ogudi penaa nakea se bage waa,” se nasimi.

¹⁵ Kena me epo wado mee to wa'm waya se nasina ko “Yimkaa a'm se dena ko tubaka awaao kan edeke se ambii to ona wai uwo waa ku wado animana tomu nai, se depe, tau se?” aseke. “Uwo waa oba kuwa ku nde miya mina ebeabea da aoo. Ku mee kooda waa ku kaa mina ebeabea da,” aseke. “Ku kooda kuwa ku bage ona ndo se ku tau. Ku maa ona ndo se epoo bage se ku tau. Ku mina tuma ona ndo se bage se ku tau. Ku ese se-mee we-mee ku oba aoo ae, se nigi sisi na ebeabea da,” se nasimi.

¹⁶ “Kena ese dim peu se emii to me mesema ese ebo toke edaya se bage waa, a'm piyapoo haas depe ku mesema ekii ndepo mbaya ona ndo anewena tubaka awaao kan edeke se ambii to wa kaa ese yabeana yawisinaambea. Ese yawisinigea yako wa'm oto kao en'ndo otuma oma yamasiimbea. Kena wa'm manaa se kao ku nde miya yabeai-pai semana amaa ndago kaa yakiyaambea. Kena wa'm oi ku nde miya nom'taambea. Ku nom'tana waa ko koma naan tau ku bidea kaa yita-pata semana yaponoyaambea. Otuma dano! Ese yawisinigea yako se yaawaasea,” se nasimi.

¹⁷ “Ekii'm awaasea ku ekii'm ndo nigita kaa awaasea kao se ku tau. Ku Anegisemee wa'm yakumamoo sipi se dimina waa ku kaa kiyoo se awaasea. Waya wada nda ekii'm dimina ona ndo kan ekii'm ebo tosi na se yaa mani da me emii me tao maneke se dodo me kaa me nde miya ekii'm nigita kaa awake se kao se ku tau. Me Anegisemee'm gai-gai yaa-awasi na yakumamoo sipi se dimina waa kiyoo kam se awaasea. Anegisemee wa'm aii dodo amanimami mina ku pi-pamiyaasi na Anegisemee wa'm se yakumamoo sipi koena,” se nasimi.

¹⁸ “Me tubaka awaao kan edeke se ambii to depe me me, me ese em'mbee mee en'ndo otuma epi se kota okaa yoo me kaa ebeabea da. Kena maa en'ndo otuma mee en'ndo otuma ekii'm ebo togea se edaya bage waa ku otuma ebo ko ebo koya mbeedi. Kase enta mugo ndoe, ekii'm moo wado ebo togea ku ko ku me kota okaa yoo me nda togea se ebo bage waa. Ku ndo ese ebo kam ebo togea se bage waa. Ogu maa en'ndo otuma ebo bage waa ku mbeedi,” se aseke. Epo wado mee to wa'm se nasimi.