Wahayu 11 - Anegisemee'm Mina Kapuge

Anegisemee kaa mina yaa-enei se bage wiya, akaai kaa mina da

¹ Ken ndo waa ko piya poo ona nemi. Piya poo ona neke me ko me ebeabea da ebeasi na se piya poo nemi. Me bage piya poo nena ko ni mina ona se yena ko “Yahawee'm okaa ee me kaa peae,” nasimi. “Me kaa pemana ko Anegisemee kaa yapapa nakea se bage waa ku eaae,” nasimi. “Ku eamana Yahawee wa'm okaa ee me nuwa, mesiba bidea tuku me nuwa, ku ndo ebeabea da ebeae,” nasimi.

² “Ku se ku ebeabea da ebeamake koya Yahawee'm okaa ee yau-yau yoo da waa ku tau. Me ebeabea da si ebeae. Kase enta mugo ndoe, yau-yau yoo da waa ku Anegisemee kaa si yapapa se se bage waa, ekii'm yoo da. Me yoo da me Anegisemee wa'm ekii tao se manipi se yoo da kumana ku ebeabea da si ebeae,” se nasimi. Kena wa'm waya se nasina ko “Dee, me gado me kaa ko Anegisemee kaa si yapapa se bage waa ekii'm awake ku se de. Ao 42 ku kisiu omitakea se dodo ndoe ekii Yedusedem okaa yoo si maaniyaabuu nakea. Me Anegisemee wa'm wa kaa wa tao wa-nini wenimami se okaa yoo koya, tau. Si maaniyaabuu nakea ndo. Ese ekii'm bado miyo ine-bane nakea se maa mugo dodo kiyaabuu nakea. Anegisemee kaa si yapapa se bage waa ekii'm se awawoo taasea,” se nasimi.

^3-4 Se nasemana ni'm dena ko mee akaa wiya aoo se dema. Akaa wiya se deke se dodo me kaa akaai Tuhani wa'm egi kaa kiyoo inewena takea se dema. Me Tuhani me ko me maa en'ndo otuma, mee en'ndo ku wado ebo toke se Tuhani wa'm egi kaa kiyoo inewena takea se dema. Kena akaa dito se dodo me kaa ko akaa'm sese ko ese seaituni piya wiya ku mugo dodo se dema, me ona. Ona me ko osee mbembo se kipaii wiya ku mugo dodo se dema, me ona. Mbao kaa se dema ee? Tau. Akaai Yahawee'm mina yemana uwa da kaa eniwoo nakea se bage waa kumana akaa'm sese kui se dema. Se dena ko Anegisemee wa'm akaai kaa se asina ko “Ni'm yaa mani da ku akaa tao manina yapeyaata. Akaa yapeyaana ko ni'm eniwoo sipa mina ku akaai masewena mee mbo naa-eniwoo taasea,” aseke. “Onu 1.260 mugo, ku kisiu omaasea se dodo me kaa akaai ni'm mina naa-eniwoo taasea. Ni'm mina ku naa-eniwoo nakea se dodo me kaa ko dama se maawiya manaa se se ku tau. Akaai ko ese dim bodi kan peu se maawiya mata-pata semana ni'm mina naa-eniwoo taasea,” se asimi.

⁵ Anegisemee wa'm se asemana ko akaa'm wadobo awaasea-awaasea ku kaa se dena ko akaai Yahawee'm mina pi-yaa-eniwoo sita mugo ndoe, mbeedi yambeaseao gai se bage en'ndo otuma ku aii bada kiyaabuu taasea ndo. Ku mugo bage mike buwai-pai taasea koena. Kase enta mugo ndoe, ku bage kuwa ekii akaai kaa peu se kao yaawaankea ae se dodo ndoe, akaa kita ebe nuwaa yapeyaake. Akaa'm ebe nuwaa yapeyaasea me mike miga bidea mugo dodo kumana bidea yaponoyaabuu taasea ndo. Ooke sekii tau. Mike buwai-pai siyaabuu taasea koena. Yahawee'm mina yaa-enei se bage akaa'm se awaasea ae se dema.

⁶ Kena akaa'm awaasea mina ni waya se dena ko akaai Yahawee'm mina yaa-enei se se dodo me kaa ko wa'm akaa tao manina ko ese asiyoo kam asiyoo se yaa mani da maniwoo taasi. Me yaa mani da me kaa kiyoo “Edii ku si weae,” se aseke kipii kindo ko edii ku weke iyo. Kena “Uwo ku emu kaae,” se aseke nde miya dano. Uwo ku emu ndo keopi. Eé, mee buwaa nuwa, bodi ababa sisi na kao ku nuwa, ku se ku meaniyaabuu taao sekii. Akaa'm gai se gumba, pasi-pasi nde miya ku se ku meaniyaabuu taao sekii. Akaa'm yaa mani da ese asiyoo kam asiyoo maniwoo taasi koena, se dema.

⁷ Kena akaai kaa amanimake mina ni waya se dena ko akaa'm Anegisemee kaa eneao kan sipea mina ku otuma eniwoona dano kiyaake se dodo me kaa ko ese dim peu se emii ona wai yape maseao kan akaa mbo ukii. Me ese dim peu se emii me ko me kiyoo ndigi kima ndigi se gumo da me nda kam pakemana akaa mbo ukii. Akaa mbo ukimana yape maseke se dodo me kaa wa'm akaai mbeedi yambeaseke. Akaai mbeedi mbeana mbatumake. Mbatumake kindo Anegisemee'm mina yaa-enei se bage, akaa ndepi buwaasea, se dema.

⁸ Akaa'm boke yoo me ese em'mbee Yedusedem okaa yoo me kaa kiyoo boke. Yedusedem okaa yoo me ko me eduga akaa'm Tuhani wa'm eda piya aoo se piya tukuu me kaa yugumana bomi se okaa yoo, mei! Kiyoo togea se bage ekii'm dimina waa ku ese si maaneke kumana me okaa yoo me waya ekaa wiya aoo. Ona me ko Sedomi okaa yoo. Ona me ko Mesida. Ku mugo ekaa da waa aoo, epoo bage ekii dimina mbiseoo kumana. Kena me okaa yoo me kaa kiyoo Yahawee'm mina yaa-enei se bage akaa ndepi mbatumaasea se dema. Akaai boke se dodo waa ko akaa bota da ku me okaa yoo me nda em'mbee enda da me kaa boke. Me kaa bona ko maa yiba manemaan tau. Kiyoo ndo omitakea, se dema.

⁹ Onu wido omana wui aoo gapi kibe da kam miyo akaa bota ku em'mbee enda da me kaa ndo se takea. Se takea se dodo me kaa akaa bota da dito nakea se bage taii ona ndo se ku tau. Bage ona ndo se ku tau. Mee tuma da eba epoda ona ndo se ku tau. Mina tuma ona ndo se bage se ku tau. Ese mee en'ndo maa en'ndo otuma akaa bota da waa yadito nakea. Yadito nakea se gumba ndoe maa yiba manemake sekii tau. Ku bage ku yamake kumana maa yiba manemaan tau. Aii yadito se ndo sekii.

¹⁰ Akaa bota da dito sita mugo ndoe mee en'ndo otuma maa en'ndo otuma ese bani-bani se aoo. “O, ku dee. Enii kaa bodi naababa siyaabuu sipea ku mike bomapea ae,” se nigeke kumana ese bani-bani se aoo. Ku kaa kiyoo badii n'takea nde miya aoo. Se-gai we-gai aii se a-mane naa-mane nakea nde miya aoo. Akaa bota da ku kaa ese bani-bani nakea kumana ekii'm se awawoo taasea, se dema.

¹¹ Ekii'm se awawoo taasea koya onu wido omana wui aoo gapi me kaa kibe da pakemai ndoe, Anegisemee wa ko wai akaa nduwawe toyaasi na nuwaa “Puu,” ata mugo ndoe iyaao yatoyaake. Iyaao yatoyaai yako ineweke. Inewemana ku se ku dito nakea bage en'ndo otuma ese widaake aoo, eneke sekii tau!

¹² Waya wada nda asiyoo Siduga kaa kam mina ebo yeke. “Akai pakewee! Akai nakayoo pakewee!” se mina yeke. Me mugo mina yemana akaai maa wanda pakeke. Maa wanda paketakea se dodo me kaa sinu ona me nda tomu sita mugo ndoe Siduga maa me kaa paketakea. Akaa'm yape bage waa, ekii'm emaa misi kaa kiyoo se paketakea. Se dema.

¹³ Se detaka ndoe, ese me gado me kaa kiyoo ese em'mbee maapui meyaai. Ese em'mbee maapui meyaai yako me okaa yoo me nda kiyoo ee waa oba mugo omiyaabuu se. Ona omiyaake, iyee ku toyaake. Ona omiyaake, iyee ku toyaake. Kisee ee en'ndo otuma kui. Kena me maapui me kaa buwai-pai semapea bage ku ese oba. Ese 7.000 mugo ku kisiu buwai-pai semapea. Ku semai ndoe buwaan tau se bage waa ku ese widaagea. Ku ese widaagea yako Anegisemee kaa yapapa se. “Yai, Siduga kaa toi se Anegisemee wa ese asiyoo! Wa'm yaa mani da ese wa-nini kumana mataae!” se asiisea se dema.

¹⁴ Ku semana ndo waa ko ese yai se peu aya wiya aoo me, me dano ko dano koya ni'm mina yewee! Ese yai se peu aya wido aoo me me ndigi nde! Ni iya-iya da kaa se dema.

Tuwoo-tuwoo awe da dada aoo me minai se dodo aoo kiyaai se kao waa ku kaa mina da

¹⁵ Ku semana ndo waa ko waya wa-nini epo wado mee to ona wai wa'm tuwoo-tuwoo awe da minasiyaake. Dada aoo me wa'm “Puu,” ata mugo ndoe Siduga kaa kam mina ebo se mina waa ku yema. Ku mina ebo se mina waa kum se asina ko “Endo ko enii'm Tuhani Anegisemee me nuwa, wa'm wa-nini wenimana daa mbeaseke se Keditusi me nuwa, akaa'm ebo toke yoo me maa en'ndo otuma mee en'ndo otuma ku wado ebo towoo semuu nakea,” asimea. “Kena Anegisemee wa'm ebo toke yoo me taa kiyaake sekii tau. Aii omiwoo towoo semuu nai kui,” se asimea. Mina ebo se mina waa kum se asimea.

¹⁶ Se aseke se dodo me kaa ko kudoo-padoo se ebo bage waa, 24 kuwa, ku dema. Ku bage kuwa ekii'm ebo animana takea yoo ku Anegisemee wa'm egi kaa kiyoo animana tomu se, se dema. Ku kudoo-padoo se ebo bage waa 24 kuwa, ekii egi gamana maa nda mbato. Se awamagea ndoe Anegisemee kaa yapapa se, se dema.

¹⁷ Kena Anegisemee yapapa taao kan ekii'm se asina ko “Tuhani Anegisemee paamee! A'm yaa mani da me me ese asiyoo kam asiyoo se yaa mani da kumana paamee! Kena a'm toke me ese eduga edugana kam ata kise endo nde miya towoo semuu nae kumana paamee! Endo kam wado ai mee en'ndo otuma maa en'ndo otuma ku wado ese me kaa ata emi tau ebo towoo semuu nae. Me ebo toke yoo me me, me a'm ese yai se yaa mani da me kaa kiyoo ebo towoo nae. Ku kindo ku kaa kiyoo nde miya paamee!

¹⁸ Kena maa en'ndo otuma togea se-bage we-bage ku ko ekii a kaa yima kiki kiwoo nakea. A kaa kagodeta siwoo sipea koya endo se gumba pi-pam'dai se dodo ndoe a'm ekii'm woo-woo se kaa yima kiki me nde miya uwa da kaa deyaabuu nae kumana paamee Anegisemee, paamee! Ku kaa kiyoo endo se gumba me kaa ko me eduga bomea bage ekii'm awamea-awamea ku ndamana em yadasi na gumba. Me ona. Ona me ko endo se gumba me kaa ko me maa en'ndo otuma ku nuwa, mee tuma kaa bage ku nuwa, ku se ku si maaniyaabuu sipea bage waa ku nde miya em yadana yambatumei sisi na se gumba. Me ona. Ona me ko endo se gumba me kaa ko me a ekaa da ebo mbeana kapapa nakea bage waa ekii tao dama aya yadotaa sisi na se gumba. Ebo se bage ku nde miya, mbeedi se bage ku nde miya kui. Ku kaa kiyoo a'm dama aya yadotaake se bage kuwa ku nabi bage waa. Ku nabi bage kuwa ku a kaa a tao a'm gai-gai kaawanaa sipea bage waa. Kena a'm a tao wenimapi bage waa ku nde miya dama aya yadotaa taambe. Me ona. Endo se gumba ku se ku pi-pam'dai se gumba kumana paamee Anegisemee! Paamee!” se aseke. Kudoo-padoo se ebo bage, eki maa nda mbatona Anegisemee kaa yapapa se se dodo me kaa ku mugo mina asetoo nakea, se yema.

¹⁹ Kena ndo waa ko ni waya se dena ko Anegisemee wa'm Siduga nda okaa ee me gine watai se dema. Gine watana esimba nda deke se dodo me kaa Anegisemee'm okaa mee tupisi na mina awe da se dema. Se deta mugo ndoe yaabebeo nuwa, bo ndukuu nuwa, geemuu tatakea ku nuwa, maapui ona me nuwa, kena ese yai sida uwo mugo oma mbane-mbane mugo edii wetai ku nuwa, ku se ku aoo kidai se dema. Gine watai ndoe se dema.