Titusi 2 - Anegisemee'm Mina Kapuge

Anegisemee wa kaa mike mina ku ndo tupiwoo sisi na se mina waa

¹ Ku mugo bage ekii mbae da mina ku ndo tupitakea koya Titusi a ko tau. A ko ai Anegisemee wa kaa mike mina waa ku ndo masewena ndumbo ndo tupiwoo taae.

² Kiyoo kam enao se bea da se mbayuwaa waa yatupise na se mina ku se de. Dimina andimata kaae, se tupeke me ona. Kena adomoo se dimina me mbeana mee'm emaa misi kaa dama se kao ku ndo awaae, se tupeke me ona. Kena, a kaa to a yimbi maneae se mina me nde miya tupeke bada, me ona. Anegisemee kaa mike mina ku kaa dimina ona ndo kan “Mike ae,” se dimina me ndo yaa mu-mu taae, me ona. Ona me ko mee agumee kaa yaembaake se dimina da me oyu kan yaa mu-mu taae, me ona. Ona me ko ekii'm toke yoo widigi aoo nde miya Anegisemee kaa dimina tukuu wemana kusipimana tuwaae, se tupeke me ona. Ku kasipa mina kuwa ku enao bea da se mbayuwaa waa ku mbo tupita sise na se mina waa.

^3-4 Kena enao bea da se ambii waa eki mbo yatupise na mina ku se de. Anegisemee wa'm guna miyo tutai se ambii to ae se desi na se kao ku ndo awawoo taae, me ona. Kena mee agumee kaa peu mina ku dopeana mee mbo pi si yaasei taae, se tupeke me ona. Kena aniguda poo odi uwo ku oba naao gai se dimina da, me mugo dimina me guna miyo si tuwaae, se tupeke me ona. Kena enao bea da se ambii waa ku eginao bea da se ambii waa ku dama ndo awasi na se mina waa ku ndo yatupiwoo taao bada, me ona. Ku kindo enao se ambii waa ekii'm eginao se ambii ku mbo pi-tupiwoo sisi na mina ku se de. “A'm yimee nuwa, a'm yopaa waa ku nuwa, ku kaa yaembaawoo taae,” se tupeke me ona.

⁵ Ona me ko ekii yimbi dama maneae se mina, me ona. Ona me ko tubaka ku si awaae, me ona. Ona me ko ee nda awake se ndanda ku kaa si yambayaa kaae. Ku dama ndo awawoo taae, me ona. Ona me ko dimi bada kan mee agumee kaa dama yaawaae, me ona. Ona me ko ekii'm yimee'm guna miyo ndo dama tuwaae, me ona. Se. Ku enao se ambii waa ku'm eginao se ambii mbo se pi-yatupiwoo sisi na mina waa. Ekii'm se yatupiwoo taao bada. Enao se ambii waa ekii'm se yatupiwoo se kipii kindo ko ku kaa kiyoo eginao se ambii waa ekii namba dama ku ndo awawoo taambea. Kena ekii dama ndo awawoo sipea ku mee agumee'm degea yako aseao kana kaambea se mina ku se de. “O, Anegisemee'm mina si maaneke aoo. Ese niga se mina waa, ae,” se mina se ku mike aseao kana kaambea. Eginao bea da se ambii waa ku dama ndo awawoo nakea ae se depea koena.

⁶ Kena eginao bea da se mbayuwaa waa ku nde miya Anegisemee'm dimi ku ndumbo ndo dowoo sisi na mina pi-yatupiwoo taao bada. Ekii'm dimina pi-yakoei se se dodo me kaa ko ekii kaa to ekii yimbi maneae se mina ku yatupiwoo taao bada.

⁷ Kena Titusi woe. Mee agumee dama awasi na a kita ekii'm emaa misi kaa dama yaawaae. A'm awake-awake en'ndo otuma ku ekii'm emaa misi kaa dama se kao ku ndo awawoo taae. Kena mee mbo mina tupeke se dodo nde miya adomoo se dimina me mbeana ekii'm emaa misi kaa dama ndo yatupiwoo taae, me ona. Ona me ko mina tupeke se dodo me a kaa to dama toyaase na se dimina me kaa kiyoo tupeke me tau de. Dim ndumbo kan tupiwoo taae, me ona.

⁸ Waya, dama, ndumbo se mina ku ndo tupiwoo taae, me ona. Ona me ko mina tupeke se dodo me kaa ko “O, me si maaneke aoo ae,” se nigaambea se mina waa ku si tupaae, me ona. Ku kasipa kuwa ku kase enta mugo ndoe, enii yau-yau mbeedi nambeaseao gai se bage waa ku nde miya aoo. Ku nde miya aoo koya a ko ai mike mina ku ndo tupiwoo nae kipii kindo ko ku yegea yako ku mugo bage ekii enii kaa peu se mina naseao kana kaambea. Waya wadobo ku kaa kiyoo ego kaambea. Ku kindo ko ekii'm Yesiusi mbaya bage kaa peu naawaao kan sipea ku si maaniyaase na a'm ndumbo mina ku ndo tupiwoo taae. Se.

⁹ Endo ko yaa pineana masii matakea se bage waa ekii kaa tupeke mina ku se de. Ona me ko yaa pineana masii yaamata se se dodo me kaa kiyoo, ekii'm moo wado masii maseke dito se bage waa ekii'm guna miyo dama tuwaae, me ona. Ona me ko ekii'm moo wado dito se bage ku mesema mina si abade taae, me ona. Ona me ko ekii'm awake-awake en'ndo otuma ku ekii'm moo wado dito se bage'm mina si taman ndo ekii'm gai-gai ku ndo awawoo taae, me ona.

¹⁰ Ona me ko ekii'm moo wado dito se bage'm oto kao ku oma si yaamaseae, me ona. Ku peu-pau ku si awan ndo dama se kao ku ndo awawoo taae. Ekii'm moo wado dito se bage ku “O, yadito se nde miya, si yadito se nde miya, ni'm yaa pineana masii naamata se mee to wai dama ndo awawoo nai ae,” se ku nigisi na dama ndo awawoo taae se mina tupeke bada. Kena yaa pineana masii yaamata se dodo me kaa ko dama awake se dodo me kaa ku aii se dama awake se ku tau. Kase enta mugo ndoe, wa'm dama awake ku degea yako ogu bage waa ekii'm yanigaambea ku se de. “Abayai! Me masii mata se mee me me, me Anegisemee kaa mina yaa mu-mu nakea kumana dama ndo awawoo nai ae,” se yanigaambea. “Ku kindo wa'm yaa mu-mu nai mina ku ni namba yeo waa ‘Oowoo,’ ae,” se nigaambea. Mbao kaa mina yeao gai kaambea ee? Tau na. Anegisemee wa ko, wai mee tuma kaa bage tao em si nadan ndo dama natoyaake mee to se mina mei! Me kaa mina yeao gai kaambea. Se.

¹¹ Ni'm kasipa mina waa, ku mee mbo tupisi na mina kuwa ni mbao kaa nigina kasipa ee? Tau na. Anegisemee wa ko wai enii mee tuma da bage dama natoyaao gai. Wa'm aii se dama natoyaao gai se dimina ku mike deao sekii. Wai mee en'ndo otuma enii tao enii'm woo-woo se kaa em si nadan ndo dama natoyaasi na se enda da naawadimapi koena. Wa'm enii tao se naawami kumana ku kaa kiyoo “Wa'm aii se nagane kan dama natoyaao gai se dimina da, me uwa da kaa nakiyaapi ae,” se ku deao sekii kidai. Kena wa'm enii tao dimina ku deao sekii kumana mee en'ndo otuma wa'm gai-gai ku ndo awawoo sisi na mina waa se kasipa kui.

¹² Waya ku kaa uketake mina ku se de. Anegisemee wa'm aii se dama natoyaake se dimina da kasipa me me, me enii nduwawe wakiki semuu nai se dimina da. Wa'm aii se dama natoyaake se dimina da natupiwoo nai koena. Kum seta kaa enii maa kaa ndigi se dodo me kaa, “O, Anegisemee wa'm be se kao ku ni nde miya awaao be, ae,” se nigaao sekii. “O, Anegisemee wa'm gai se kao ku ndo awaao gai, ae,” se ku nde miya nigaao sekii. “O, mee tuma kaa dimina da me kaa dimoke kao waa ku nde miya wisin'taao sekii, ae,” se nigaao sekii. Kena enii kaa to enii yimbi manina “Dama, ndumbo se kao ku ndo awaao gai ae,” se nigaao sekii. Ku nigaao sekii se dimina kuwa ku Anegisemee wa'm dama natoyaao gai se dimina da me kaa wakiki semapea se bage waa, enii'm se nigaao sekii se dimina waa.

¹³ Kena Anegisemee wa'm gai se kao ku ndo awawoo sita mugo ndoe, enii'm em'ndoo nakea se kao ona aoo. Ku kaa kiyoo enii ese dimina ona ndo kan se ditona ko “Yesiusi Keditusi wa'm ukaambi yoo me kaina gumba ukaambi ee?” se dito siwoo nakea. Kase enta mugo ndoe, wa'm wadobo ukaasi mina ku mike pi-pamii se gumba ndoe, enii'm bani-bani se ese wa-nini kaasea. Dee, ese asiyoo abayai toi se Anegisemee to, me Yesiusi mei! Kena enii'm woo-woo se kaa si naboyaana ndo dama natoyaabuu nai se mee to me nde miya me Yesiusi mei! Ku kaa kiyoo wa'm waya ukaasi yoo me enii'm bani-bani taasea ku se ene!

¹⁴ Me Yesiusi me me wai wa kaa to ekamana enii tao naabomi. Wa'm enii tao naabomi ona me ko me enii'm peu-pau ku otuma mbeedi nambeana yaa napatatake mugo dodo. Kena wa'm enii tao naabomi ona me ko me enii'm woo-woo se naawise-mbeaseao kan naabomi. Mbao awasi na naawise-mbeasimi ee? Tau. Ona me ko, enii wa kaa wa tao dau se bage waa nakiyaao kan enii'm woo-woo se ku naawise-mbeasimi, me ona. Ona me ko enii dimina ona ndo kan dama se kao ku ndo awaao gai se bage waa kisi na enii'm woo-woo se ku naawise-mbeasimi, me ona. Ku mugo bage ku wa kaa wa tao se bage waa nakiyaao kan Yesiusi wai enii tao naabomi. Yai, Anegisemee wa'm aii se dama natoyaao gai se dimina da me ese mike deao sekii, sima!

¹⁵ Ku kindo ko Titusi woe, ku kasipa mina kuwa ku dopeana Yesiusi mbaya bage mbo dama pi-yatupiwoo taae. Pi-tupiwoo se se dodo me kaa ko a'm ndanda me Anegisemee'm kanepi se ndanda kumana ku se ku awaao kan si dim wiya-wiya kaae. Wa'm kambeasipi ku kaa kiyoo aii oyu kan “Ni'm katupipa mina ku dodo ndo awawoo taae,” se mina ku ndo yakoewoo taae, me ona. Kena, si maaneke yaa mu-mu nakea se bage waa ku nde miya “Ku tau de! Tau de!” se mina yakoewoo taae, me ona. Kena mee ona kawisineke nde miya tau. “Katupaanka ndeo! Ni'm mina yitos!” se aseao bada, me ona. Ku se ku Anegisemee'm kambeasipi se ndanda waa kumana ese oyu kan se awawoo taao ndo bada. Se.