Ibedani 5 - Anegisemee'm Mina Kapuge

¹ Ni'm Keditusi kaa kasipa mina ku kaa “Mike ae,” nigi sisea na aii miga ese ata emi tau imam mee to wa'm sese ku kaa nde miya dama nigi si pe taae. Dee, Ibedani bage waa ekii ese ata emi tau imam mee to yambeaseao gai kindo ko mee tuma kaa mee to ona wa-nini wenimana ese ata emi tau imam mee to se yambeaseke. Mbao awasi na se yambeaseke ee? Tau. Wai ogu mee tuma kaa bage ekii kaa ekii tao Anegisemee mesema epota kaa mee to keosi na ese ata emi tau imam mee to se yambeaseke. Se yambeana ko ogu bage ekii'm Anegisemee tao daa yambeaseao gai se kao kuwa ku wa'm masewena Anegisemee'm emaa misi kaa “Ee,” se yaasetaake, me ona. Ona me ko mee'm woo-woo se kaa yaatabesi na me imam mee me me wai Anegisemee'm emaa misi kaa dom'mba mugo masewena yaambatumake. Yaambatumana bidea kaa yaaponoyaake. Me mugo epota kaa mee to tosi na ese ata emi tau imam mee to yambeaseke.

² Kena ese ata emi tau imam mee me me, wai miga mee to kumana dimina maboo nde miya aoo. Wa namba woo-woo taao sekii. Ku kaa nigimai yako wai ogu bage kaa yagane kaao sekii. Ku kaa kiyoo ogu bage waa, si nige-neke kan woo-woo sipea bage waa ku nuwa, ndumbo se enda da waa ku kowitana kupoo se enda da waa ku nda penaa nakea se bage waa ku nuwa, ku mugo bage ku kaa wai tunaa kan yaawawoo taao sekii. Wa namba Anegisemee kaa dimina maboo aoo se mee to koena.

³ Waya wada nda wa namba maboo aoo kumana wai ogu bage'm woo-woo se ku kaa Anegisemee tao daa yambeana bidea kaa yaponoyaake se dodo ndoe, wa'm woo-woo se ku kaa nde miya bidea kaa yaaponoyaao ndo sekii. Wisin'take ku iyo.

⁴ Me miga ese ata emi tau imam mee me ko wa'm ndanda me wa'm ebo tona yaa mu-mu nai se ndanda. Ku kumana mee ona wai wa nigita kaa ndo wa kaa to ebo kiyaana ese ata emi tau imam mee to toke sekii tau. Ku kaa dama nigi si pe taae. Eduga ko Anegisemee wa'm Haduni se asina ko “Ese ata emi tau se imam mee to kambeaseao,” se asimi. Ku mugo yaa, Anegisemee wa'm mina woewena ebo yambeasipi se mee to wa ndo ese ata emi tau imam mee tuwaao sekii. Koya wa kaa to ebo kiyaana toke sekii tau.

⁵ Ku kumana Keditusi wa namba kui. Keditusi wai ese ata emi tau se imam mee to kaao kan wa kaa to ebo mbeasiin tau. Me Anegisemee wa'm ndo ebo yambeasii yako ese ata emi tau imam mee to se yakiyaami. Ku taao kan Anegisemee wa'm Keditusi se asina ko “Endo gapi ni mee'm emaa misi kaa kiyoo se kaadeyaana ko a ko mike Niyombai se kaadeyaake. Ni ko mike a'm Naamee, se kaadeyaake,” se asimi.

⁶ Kena Anegisemee'm mina kapuge nda wa-nini mina me kaa kiyoo nde miya Anegisemee wa'm Keditusi mbo waya se asina ko “Eduga ko Meokisedeki wai Imam se mee to se towoo simi. Endo ko a namba wa'm sese mugo dodo se Imam mee to se towoo nae. Ese si dan ndo omiwoo towoo sita mugo ndoe Imam se mee to se towoo semuu nae, se kadeo,” se asimi.

⁷ Eduga ko Yesiusi Keditusi wa ko wai mee tuma kaa mee to mugo maa kaa tomi se dodo me kaa ko wa'm Anegisemee mbo asetoo simi mina nuwa, edaawoo simi se mina nuwa, ku ese wa-nini kimi. Dee, wa asetoo nai se dodo ndoe mina ebo mbeana se asetoo simi. Kena yee gumba nde miya aoo. Kena wa'm se edaana ko “Anegisemee woe. Ni'm boke yoo me mbeedi naambeana dama natoyaae,” se edaawoo simi. Se edaawoo sita mugo ndoe, Anegisemee wa'm se yadena ko “O, wai ni guna miyo tona ni'm gai-gai ku ndo awawoo taao gai ae,” se yademi. Se yadei yako Anegisemee wai Yesiusi'm asetoo simi mina yaayito simi. Wa'm bomi yoo me wa tao mbeedi yaambeana waya iyaao yatoyaami.

⁸ Yesiusi wai Anegisemee Yombai koya maa kaa endemaan tau yoo “Ni dama awaamba ee? Peu awaamba ee?” ku wa kaa to se pikamoo taao sekii se gumba ona kaa miya diin tau. Yibanda kiyaa maa kaa ukimana dai kaa waa ko bodi ababa siwoo simi kumana ku kaa kiyoo wai dama awaao kan pikamoo taao sekii se gumba aoo kidai. Ku kaa kiyoo wai Anegisemee'm gai-gai ku awaao kan pikeke sese epi kiwoo simi, ese miga mee to wa'm sese mugo dodo.

^9-10 Yesiusi wai Anegisemee'm mina mbeenaa kaa miya tamaan tau ae, se dena ko Anegisemee'm waya se yanigina ko “O, ese ata emi tau se imam mee to yambeaseke kipii kindo maan'dai taambi ae,” se yanigimi. Se yanigii yako “Endo ko ai ese ata emi tau imam mee to se kambeaseo,” se asimi. Se yambeasita mugo ndoe ese eduga tomi se imam mee to, Meokisedeki me me, wa'm sese mugo dodo se imam mee to se yambeasimi. Kena Anegisemee wa'm se yambeasimi kumana mee tuma da bage ekii Yesiusi wa'm mina yaa mu-mu se kipii kindo ko ku mugo bage ku Yesiusi wa'm ekii'm woo-woo se kaa em si yadake. Em si yadan ndo omiwoo towoo yatoyaabuu taasi se bage waa kui.

Adomoo se dimina me mbeana Yesiusi kaa en'kiki se dimina da me kapimaae se mina da

¹¹ Yesiusi wai Meokisedeki wa'm sese mugo dodo ae nigi sisi na se mina waa ku ese oba ndigi. Yibanda kiyaa ku kaa mbeenaa kanige-maneao kana ae se kadeo. Kase enta mugo ndoe, eki ese dim si pisinigea yako enii'm mina yeao kana ae se kadetaka.

¹² Ese ndumbo mina kasiinka ndeo. Eki'm Anegisemee'm mina kaa epi keke me ko me endo ndo epi kumapea se ku tau. Me eki'm ese eduga edugana kam ata yemea se mina waa. Ku yena dai kaa oba omimea kumana endo se gumba pakemai ndoe Anegisemee'm mina tupeke se bage waa keowaao daan sipea baa. Ku koya eki Anegisemee'm amba yato se mina waa ku kaa nde miya si nige-neke aoo se kadeo. Kum seta kaa, Anegisemee'm amba yato se mina ku ndo waya katupaao ndo sekii. Amba yato se mina tupeke me ko me yuwa mbee to ama uwo noke se mina mugo dodo. Kena enii'm katupaao kan sipa mina ku ko ku yito se kipii kindo ko me oi noke mugo dodo se mina waa. Ku kindo ko enii'm eki kaa se kanigina ko “Ama uwo noke se mina ku ndo naa katupaao sekii ee? Oi mugo noke se mina ku naa katupaao sekii ee?” se nigeke. Kena ku kaa nigi si pe sita mugo ndoe, “Tau. Oi mugo noke se mina katupaao iyo ae,” se kadeo.

¹³ Dee, eki ko eki “Me ndumbo ae, me peu, ae,” se ku wenemoo taao kana se bage waa se kadeo. Ese adomoo se yuwa mbee waa mugo dodo se kadeo. Kum seta kaa, ama uwo noke mugo mina ku ndo katupaao sekii. Oi noke mugo mina ku mike iyo.

¹⁴ Eki ko eki en'kiki se bage, se waa, oi noke mugo mina ku katupiyaa. Dee, en'kiki se bage ekii'm sese ku se de. Ku mugo bage ku ko omiyaa siyaa ku ndo dama se kao awawoo taao kan “Me dama ae. Me peu ae,” se wenemoo nakea se bage waa. Kena omiyaa siyaa ku ndo se wenemoo semuu nakea kumana ekii'm wenemoo taao epi se dimina da me ese asiyoo kidai. Yibanda kiyaa, eki'm dimina da waa wa-nini. Ese adomoo se bage waa se tutakea se kadeo.